അതിർത്തി വനത്തിൽ നായാട്ട് സംഘത്തി​െൻറ അക്രമം; വനപാലകന് വെട്ടേറ്റു

കുമളി: സംസ്ഥാന അതിർത്തിയിലെ വനമേഖലയിൽ കേരളത്തിൽ നിന്നുള്ള നായാട്ട് സംഘത്തി​െൻറ അക്രമത്തിൽ തമിഴ്നാട് വനപാലകന് പരിക്ക്. തലക്ക്​ വെ​േട്ടറ്റ കുമളി സ്വദേശി ഖാജാ മൈതീനെ (41) തേനി മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. ബുധനാഴ്ച രാത്രിയാണ് സംഭവം. തമിഴ്നാട് അതിർത്തി വനമേഖലയായ മേഘമല വന്യജീവി സങ്കേതത്തിൽ ഉൾപ്പെട്ട ചെല്ലാർകോവിൽമെട്ട്, മച്ചക്കൽ -ചുരങ്കനാർകാട്ടിലാണ് നായാട്ടുകാർ വനപാലകർക്കുനേരെ ആക്രമണം അഴിച്ചുവിട്ടത്​.

ഈ ഭാഗത്ത് കഴിഞ്ഞമാസം 16ന് കാട്ടുപോത്തിനെ വേട്ടയാടിയ ശേഷം അവശിഷ്​ടങ്ങൾ ഉപേക്ഷിച്ചനിലയിൽ കണ്ടെത്തിയിരുന്നു. ഇതേതുടർന്ന് കമ്പം റേഞ്ച് ഓഫിസർ അൻപി​െൻറ നിർദേശപ്രകാരം വനപാലകരായ ഇളവരശൻ, ഖാജാ മൈതീൻ, ജയകുമാർ, മനോജ്കുമാർ, മഹാദേവൻ എന്നിവർ രാത്രി നിരീക്ഷണത്തിന്​ എത്തി. പ്രദേശത്ത് ടോർച്ച് പ്രകാശം കണ്ട്​ കാട്ടിനുള്ളിലെ സംഘത്തെ പിടികൂടാൻ ശ്രമം നടത്തുന്നതിനിടെ വേട്ടക്കാർ വനപാലകർക്കുനേരെ നിറയൊഴിക്കുകയായിരുന്നു.

ഒഴിഞ്ഞുമാറിയ വനപാലകർ തോക്കിൽ പിടിമുറുക്കിയതോടെ ഏഴംഗസംഘം വനപാലകരെ ആക്രമിച്ചശേഷം ഓടിമറഞ്ഞു. തോക്ക് പിടിച്ചുവാങ്ങാനുള്ള ശ്രമത്തിനിടെയാണ് ഖാജാ മൈതീന് വെട്ടേറ്റത്.

സംഭവസ്ഥലത്തുനിന്ന്​ നാടൻ തോക്ക്, കത്തികൾ, മ്ലാവി​െൻറ കൊമ്പ് എന്നിവ കണ്ടെടുത്തു. തമിഴ്നാട് ഡി.ഐ.ജി വിജയകുമാരിയുടെ നേതൃത്വത്തിലുള്ള ഉന്നതസംഘവും തേനി ഡി.എഫ്.ഒ ലിയാഖത്തും സ്ഥലം സന്ദർശിച്ചു. തമിഴ്നാട്ടിൽനിന്നും വനം വകുപ്പി​െൻറ പരിശീലനം നേടിയ നായ്​ക്കളെയും തെളിവെടുപ്പിനെത്തിച്ചു. വനപാലകരുടെ പരാതിയെത്തുടർന്ന് അണക്കര, ചക്കുപള്ളം, അമരാവതി മേഖലകളിലെ ഏഴുപേർക്കെതിരെ ഗൂഡല്ലൂർ പൊലീസ്​ കേസെടുത്തു.