കനത്ത മഴയിൽ പാലാ-തൊടുപുഴ റൂട്ടിൽ പ്രൈവറ്റ് ബസ്സ്റ്റാൻഡിന് സമീപം വെള്ളം കയറി റോഡ് പുഴയായപ്പോൾ
തൊടുപുഴ: ജില്ലയിൽ വിവിധ ഇടങ്ങളിൽ മഴ തുടരുന്നു. ജില്ലയില്‍ വ്യാഴാഴ്ച 24 മണിക്കൂറില്‍ 64.5 മുതല്‍ 115.5 മില്ലിമീറ്റര്‍ വരെയുള്ള ശക്തമായ മഴക്ക് സാധ്യതയുള്ളതിനാല്‍ കേന്ദ്ര കാലാവസ്ഥ വകുപ്പ് യെല്ലോ അലര്‍ട്ട് പ്രഖ്യാപിച്ചിട്ടുണ്ട്. ജില്ലയിൽ പലയിടത്തും ബുധനാഴ്ച മഴ ലഭിച്ചു.
ബുധനാഴ്ച മൂന്ന് മണിയോടെയാണ് തൊടുപുഴയിൽ മഴ തുടങ്ങിയത്. ഒന്നര മണിക്കൂറോളം നീണ്ട ശക്തമായ മഴയില്‍ നഗരത്തിൽ പലയിടങ്ങളിലും വെള്ളം കയറി. മണക്കാട് ജങ്ഷന്‍, പ്രൈവറ്റ് ബസ് സ്റ്റാന്‍ഡിന് സമീപം, കിഴക്കേയറ്റം, റോട്ടറി ജങ്ഷന്‍ എന്നിവടങ്ങളിലെല്ലാം വെള്ളം പൊങ്ങി.
തുലാമഴ തകർത്ത് പെയ്തതോടെ സംസ്ഥാനത്ത് ഇതുവരെ ലഭിച്ചത് 12 ശതമാനം അധിക മഴയാണ്. കേന്ദ്ര കാലാവസ്ഥ വകുപ്പിന്റെ കണക്കുപ്രകാരം പത്തനംതിട്ട, തിരുവനന്തപുരം ജില്ലകളിലാണ് ഏറ്റവും കൂടുതൽ മഴ ലഭിച്ചത്.
പത്തനംതിട്ടയിൽ 67 ശതമാനവും തിരുവനന്തപുരത്ത് 57 ശതമാനവും അധിക മഴ ലഭിച്ചു. ഇടുക്കി, വയനാട്, കണ്ണൂർ, കോഴിക്കോട് ജില്ലകളിൽ മാത്രമാണ് ശരാശരിയെക്കാൾ കുറവ് മഴ ലഭിച്ചത്. വയനാട് 30 ശതമാനവും കണ്ണൂർ 14 ശതമാനവും ഇടുക്കിയിൽ 11 ശതമാനവും കുറവ് മഴ ലഭിച്ചു. ആലപ്പുഴ 34 ശതമാനവും കാസർകോട് 13, കൊല്ലം 12, കോട്ടയം 16, മലപ്പുറം 6, പാലക്കാട് 10, തൃശൂർ 3, എറണാകുളം 20 ശതമാനം എന്നിങ്ങനെയാണ് മറ്റ് ജില്ലകളിൽ ലഭിച്ച അധിക മഴ.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.