നിതയുടെ മരണം; നാടുണർന്നത് നടുക്കുന്ന വാർത്തകേട്ട്

പന്തീരാങ്കാവ്: ഭർത്താവിനൊപ്പം സന്തോഷപൂർവ്വം ഉല്ലാസ യാത്ര പോയ മകളുടെ മരണ വാർത്തയുടെ നടുക്കത്തോടെയാണ് ഒളവണ്ണ കൊടിനാട്ട് മുക്കിലെ പെരിങ്ങാടൻ റഫീഖും കുടുംബവും ഉണർന്നത്. ഞായറാഴ്ച ഉച്ചയോടെയാണ് നിത ഷെറിനേയും ഒന്നര വയസ്സുകാരൻ സയാനേയുമായി ഭർത്താവ് അബൂബക്കർ സിദ്ധീഖ് ഊട്ടിയിലേക്ക് ഉല്ലാസ യാത്രക്കെന്ന് പറഞ്ഞ് വീട്ടിൽ നിന്ന് കൊണ്ട് പോയത്. വഴിയിൽ റഫീഖിന്റെ പനമരത്തുള്ള സഹോദരിയുടെ വീട്ടിൽ കയറുകയായിരുന്നു. വീടിന്റെ മുകൾ നിലയിലാണ് ഞായറാഴ്ച രാത്രി ദമ്പതികൾ കിടന്നിരുന്നത്. ഇവിടെ വെച്ചാണ് കൊല ചെയ്തത്. തിങ്കളാഴ്ച പുലർച്ചക്ക് അബൂബക്കർ സിദ്ധീഖ് തന്നെയാണ് നിതയുടെ സഹോദരിയുടെ ഭർത്താവിനെ വിളിച്ച് കൊലപാതക വാർത്ത അറീയിക്കുന്നത്. എല്ലാവരോടും സന്തോഷപൂർവ്വം ഇടപെടുന്ന നിദയുടെ മരണ വാർത്ത വിശ്വാസിക്കാനാവുന്നില്ല സമീപ വീട്ടുകാർക്ക്. ഇരുവരും തമ്മിൽ നേരത്തെ പിണക്കമുണ്ടായിരുന്നു. പിന്നീട് കുടുംബം ഇടപെട്ട് പരിഹരിക്കുകയായിരുന്നു. പക്ഷേ കൊലപാതകത്തിലേക്ക് നയിക്കാവുന്ന തരത്തിലുളള പ്രശ്നങ്ങളൊന്നും ഇവർ തമ്മിലുണ്ടായിരുന്നില്ലെന്ന് ബന്ധുക്കൾ പറയുന്നു. അത് കൊണ്ട് തന്നെ നാട്ടുകാർക്കൊന്നും കൊലപാതക വാർത്ത വിശ്വസിക്കാനുമാവുന്നില്ല. പോസ്റ്റ്മോർട്ടത്തിന് ശേഷം തിങ്കളാഴ്ച വൈകിട്ട് ഏഴ് മണിയോടെ വീട്ടിലെത്തിച്ച മൃതദേഹം എട്ട് മണിയോടെ ഒടുമ്പ്ര ജുമഅത്ത് പള്ളിയിൽ ഖബറടക്കി.