കോഴിക്കോട്: മാധ്യമം ദിനപത്രവും ഇലാൻസ് ലേണിങ്ങും സംയുക്തമായി സംഘടിപ്പിക്കുന്ന വിദ്യാഭ്യാസ രംഗത്ത് മികച്ച പ്രകടനം കാഴ്ചവെച്ച പ്രതിഭകൾക്കുള്ള ആദരം ‘ടോപ്പേഴ്സ് ഓണറിങ്’ ഇന്ന് കോഴിക്കോട്ട്. ഞായറാഴ്ച രാവിലെ 9.30 മുതൽ മുഹമ്മദ് അബ്ദുറഹ്മാൻ സാഹിബ് മെമ്മോറിയൽ ജൂബിലി ഹാളിലാണ് പരിപാടി. ജില്ല സബ് ജഡ്ജി എം.പി. ഷൈജൽ ടോപ്പേഴ്സ് ഓണറിങ് ഉദ്ഘാടനം നിർവഹിക്കും.
എസ്.എസ്.എൽ.സി പരീക്ഷയിൽ മുഴുവൻ വിഷയങ്ങൾക്കും ഒമ്പതു വിഷയങ്ങൾക്കും എ പ്ലസ് നേടിയവരെയും പ്ലസ് ടു പരീക്ഷയിൽ മുഴുവൻ വിഷയങ്ങളിലും എ പ്ലസ് നേടിയ വിദ്യാർഥികളെയുമാണ് ആദരിക്കുക. പ്രശസ്ത മോട്ടിവേഷനൽ സ്പീക്കർ ബക്കർ കൊയിലാണ്ടി വിദ്യാർഥികളുമായി സംവദിക്കും. ഇലാൻസ് ലേണിങ് ആപ് ഡയറക്ടർ ഹബീബ് റഹ്മാൻ കെ.പി, ഇലാൻസ് ഫാക്കൽറ്റി ഗോപിക മംഗലശ്ശേരി എന്നിവർ വിവിധ ക്ലാസുകൾ നയിക്കും.
വിദ്യാഭ്യാസ രംഗത്തെയും മറ്റു മേഖലകളിലെയും നിരവധി പ്രമുഖർ പരിപാടിയിൽ സംബന്ധിക്കും. ടോപ്പേഴ്സ് ഓണറിങ്ങിൽ സ്പോട്ട് രജിസ്ട്രേഷൻ സൗകര്യം ഒരുക്കിയിട്ടുണ്ട്. പത്താം ക്ലാസിനും പ്ലസ് ടുവിനും ശേഷം ഇനിയുള്ള പഠനം എന്താകണം എന്ന ആശങ്കയിൽ നിൽക്കുന്നവർക്ക് മുന്നോട്ടുള്ള കരിയറിന് പ്രചോദനം നൽകുന്നതു കൂടിയായിരിക്കും പരിപാടി.
രക്ഷിതാക്കൾക്കും അധ്യാപകർക്കും വിദ്യാർഥികൾക്കും പങ്കെടുക്കാം. നാളെയുടെ വാഗ്ദാനങ്ങളാകേണ്ട തലമുറക്ക് മാധ്യമവും ഇലാൻസും നൽകുന്ന പ്രോത്സാഹനംകൂടിയാകും ടോപ്പേഴ്സ് ഓണറിങ് വേദി.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.