കെ.എസ്​.ആർ.ടി.സിക്ക്​ പുതിയ ആക്​ഷൻ പ്ലാൻ; പുതിയ കമ്പനി 'കെ.എസ്​.ആർ.ടി.സി-സ്വിഫ്​റ്റ്​'

കോഴിക്കോട്​: കിഫ്​ബി സഹായമുപയോഗിച്ച്​ കെ.എസ്​.ആർ.ടി.സി നടപ്പാക്കുന്ന പദ്ധതികൾ പുതിയ ഉപകമ്പനിക്കു​ കീഴിലാക്കും. 'കെ.എസ്​.ആർ.ടി.സി-സ്വിഫ്​റ്റ്​' എന്ന പേരിലാണ്​ കമ്പനി രൂപവത്​കരിക്കുകയെന്ന്​ ഗതാഗതമന്ത്രി എ.കെ. ശശീന്ദ്രൻ, എം.ഡി ബിജു പ്രഭാകർ എന്നിവർ വാർത്തസമ്മേളനത്തിൽ അറിയിച്ചു. പുതിയ ബസുകളോടൊപ്പം ദീർഘദൂര സർവിസുകളുടെയും ചുമതല ഉപകമ്പനിക്കായിരിക്കും. കമ്പനി ജനുവരി ഒന്നിന്​ ആരംഭിക്കും.

കെ.എസ്.ആർ.ടി.സി ചെയർമാൻ ആൻഡ് മാനേജിങ്​ ഡയറക്ടറായിരിക്കും ഉപകമ്പനിയുടെയും എക്സ് ഒഫിഷ്യോ ചെയർമാൻ ആൻഡ് മാനേജി​ങ്​ ഡയറക്ടർ. കിഫ്ബിയിൽനിന്ന്​ എടുക്കുന്ന കടം യഥാസമയം തിരിച്ചടക്കുക, ബാങ്കുകളുടെ കൺസോർട്യത്തിൽനിന്നും എടുക്കുന്ന കടം തിരിച്ചടക്കാൻ കെ.എസ്.ആർ.ടി.സിയെ സഹായിക്കുക എന്നിവയാണ്​ ഉപകമ്പനിയുടെ പ്രധാന ചുമതലകൾ.

നാലു വർഷത്തിനകം 2800ഓളം പുതിയ ബസുകൾ ഇറക്കും. നിലവിൽ സ്ലീപ്പർ, സെമി സ്ലീപ്പർ ബസ്​ ഇല്ല. നടപ്പ് സാമ്പത്തികവർഷം സർക്കാർ അനുവദിച്ച 50 കോടി ഉപയോ​ഗിച്ച് എട്ട്​ സ്ലീപ്പർ, 20 സെമി സ്ലീപ്പർ, 72 എക്സ്​പ്രസ് ബസുകൾ വാങ്ങും. 2012നുശേഷം ശമ്പള പരിഷ്കരണം നടന്നിട്ടില്ല. നവംബർ മുതൽ ചർച്ച ആരംഭിക്കും. ശമ്പള പരിഷ്കരണം നടപ്പാക്കുന്നതുവരെ സ്ഥിരം ജീവനക്കാർക്ക് ഇടക്കാല ആശ്വാസമായി 1500 രൂപ അടുത്ത മാസം മുതൽ തന്നെ നൽകാൻ ശ്രമം നടത്തിവരുകയാണ്. 10​ വർഷത്തിലധികം സർവിസുള്ള എംപാനൽ കാരെ കെ.എസ്​.ആർ.ടി.സിയിലും 10​ വർഷത്തിൽ താഴെ സർവിസുള്ളവരെ പുതിയ കമ്പനിയിലും സ്​ഥിരപ്പെടുത്തും.

ഇന്ധനലാഭം ഉണ്ടാക്കുന്നതിനും നഷ്​ടം കുറക്കുന്നതിനും ബസുകൾ സി.എൻ.ജി (ക​ംപ്രസ്​ഡ്​ നാച്വറൽ ഗ്യാസ്​), എൽ.എൻ.ജി (ലിക്വിഫൈഡ്​ നാച്വറൽ ഗ്യാസ്)​ തലത്തിലേക്ക് മാറ്റും. സി.എൻ.ജി ബസുകൾ വാങ്ങാൻ ടെൻഡർ ആരംഭിച്ചു. വർക്​ഷോപ്പുകളുടെ നവീകരണത്തിനു 31.93 കോടി അനുവദിച്ചു. നവീകരണത്തിനായി ടെൻഡർ നടപടികൾ ആരംഭിച്ചു. സമ്പൂർണ കമ്പ്യൂട്ടർവത്​കരണം നടപ്പാക്കും. രണ്ടാം പുനരുദ്ധാരണ പാക്കേജി​െൻറ ഭാ​ഗമായി കെ.എസ്.ആർ.ടി.സിയിൽ നാലു ലാഭകേന്ദ്രങ്ങൾ നിലവിൽ വരും. ഇപ്പോഴുള്ള മൂന്നു സോണുകളും, സ്വിഫ്​റ്റ്​്​ കമ്പനിയുമായിരിക്കും ഇവ. ഈ ലാഭകേന്ദ്രങ്ങളിൽ ജോലിയിൽ കാണിക്കുന്ന പ്രകടനത്തി​െൻറ അടിസ്ഥാനത്തിൽ ഇൻസെൻറിവ്​ സ​മ്പ്രദായം നടപ്പാക്കും. ജീവനക്കാർക്ക് സ്ഥലംമാറ്റം അതത് ലാഭകേന്ദ്രത്തി​െൻറ പരിധിയിലാക്കും.