കെ.പി.സി.സി നേതൃത്വം പുന:സംഘടന നടപടികളുമായി മുന്നോട്ട് പോകുന്ന സാഹചര്യത്തിൽ ഉമ്മൻചാണ്ടി കേന്ദ്ര നേതൃത്വത്തെ പ്രതിഷേധമറിയിച്ചു. പുന:സംഘടനാ നടപടികൾ നിർത്തിവെക്കണമെന്ന് അദ്ദേഹമാവശ്യപ്പെട്ടു.
എ.കെ.ആന്‍റണി, കെ.സി. വേണുഗോപാൽ, താരിഖ് അൻവർ എന്നിവരുമായി ഉമ്മൻചാണ്ടി ഡൽഹിയിൽ കൂടിക്കാഴ്ച നടത്തി. പാർട്ടി പ്രസിഡന്‍റ് സോണിയ ഗാന്ധിയെ ഇന്നു കാണും.
പുന:സംഘടന നടപടികൾ തുടരുന്നെങ്കിൽ സംസ്ഥാനത്തെ മുതിർന്ന നേതാക്കളെ വിശ്വാസത്തിലെടുക്കണമെന്ന് അദ്ദേഹം കേന്ദ്ര നേതൃത്വത്തോട് ആവശ്യപ്പെട്ടു. കെ.പിസിസി നേതൃത്വം സ്വീകരിക്കുന്ന അച്ചടക്ക നടപടികളിൽ പാർട്ടി ഭരണഘടനയിലെ വ്യവസ്ഥകൾ പാലിക്കണം എന്നും അദ്ദേഹം ആവശ്യപ്പെട്ടു. താനടക്കമുള്ള മുതിർന്ന നേതാക്കളെ വിശ്വാസത്തിലെടുക്കാതെ പുനഃസംഘടനയുമായി കെ.പി.സി.സി നേതൃത്വം മുന്നോട്ടു പോകുന്നതിലുള്ള അതൃപ്തി ഉമ്മൻ ചാണ്ടി സോണിയയെ നേരിട്ട് അറിയിക്കും.
പുനഃസംഘടന സംബന്ധിച്ച് പരാതികൾ ലഭിച്ചിട്ടുണ്ടെന്നും കെ.പി.സി.സി നേതൃത്വവുമായി ഇക്കാര്യം ചർച്ച ചെയ്യുമെന്നും താരിഖ് പറഞ്ഞു. എന്നാൽ, പുന:സംഘടന നടപടികൾ നിർത്തിവെക്കുന്നതിന്‍റെ സൂചനയൊന്നും അേദ്ദഹം നൽകിയില്ല.
ബെന്നി ബഹനാനും ഉമ്മൻചാണ്ടിയുമാണ് ഡൽഹിയിലെത്തി നേതാക്കളെ കാണുന്നത്. ഇരുവരും എ ഗ്രൂപ്പിന്‍റെ ഭാഗമാണ്. ഐ ഗ്രൂപ്പിൽ നിന്നുള്ള രമേശ് ചെന്നിത്തലയും നേതാക്കളെ കാണാൻ ഡൽഹിയിലേക്ക് വരുന്നുണ്ട്.
അതേസമയം, പുന:സംഘടന നടപടികളുമായി മുന്നോട്ട് പോകുകയാണ് കെ.പി.സി.സി പ്രസിഡന്‍റ് കെ. സുധാകരൻ. അദ്ദേഹത്തിന്‍റെ നീക്കങ്ങൾക്ക് പ്രതിപക്ഷ നേതാവ് വി.ഡി സതീശന്റെ പിന്തുണയുണ്ട്. സംഘടനയെ നവീകരിക്കുന്ന നീക്കങ്ങൾക്ക് മുതിർന്ന നേതാക്കൾ തടസം നിൽക്കുകയാണെന്നാണ് കേന്ദ്ര നേതൃത്വത്തിന് മുന്നിൽ സുധാകരനും സതീശനും വിശദീകരിക്കുന്നത്
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.