തിരുവനന്തപുരം: ഇന്ത്യയിലെ മുസ്ലിം പിന്നാക്കാവസ്ഥയെ കുറിച്ച് പഠിച്ച് നിർദേശങ്ങൾ സമർപ്പിച്ച ജസ്റ്റിസ് രജീന്ദർ സച്ചാർ കമ്മീഷന്‍റ റിപ്പോർട്ട് കേരളത്തിൽ അട്ടിമറിക്കുകയാണെന്ന് സച്ചാർ സംരക്ഷണ സമിതി. സച്ചാർ റിപ്പോർട്ട് മറ്റ് സംസ്ഥാനങ്ങൾ നടപ്പാക്കിയപ്പോൾ കേരളത്തിലെ മുസ്ലിം പിന്നാക്ക ജനവിഭാഗത്തിന് നിഷേധിക്കുന്ന നടപടിയാണ് സംസ്ഥാന സർക്കാർ സ്വീകരിച്ചതെന്ന് സെക്രട്ടേറിയറ്റിനുമുന്നിൽ സമിതി നടത്തിയ ധർണയിൽ നേതാക്കൾ ആരോപിച്ചു.
സംസ്ഥാനത്തെ 16 മുഖ്യധാര മുസ്ലിം സംഘടനകളുടെ പ്രതിനിധികൾ ഉൾക്കൊള്ളുന്ന, സാദിഖലി ശിഹാബ് തങ്ങൾ ചെയർമാനായ സച്ചാർ സംരക്ഷണ സമിതിയാണ് സമരത്തിനു നേതൃത്വം നൽകുന്നത്. ധർണക്കു ശേഷം സമിതി നേതാക്കൾ മുഖ്യമന്ത്രിയെ കണ്ട് നിവേദനം സമർപ്പിക്കും. സ്കോളർഷിപ് വിഷയത്തിൽ കോടതി വിധിക്കെതിരെ മേൽക്കോടതിയെ സമീപിക്കുകയോ നിയമ നിർമാണം നടത്തുകയോ ചെയ്യണമെന്നുമുള്ള മുസ്ലിം സംഘടനകളുടെ ആവശ്യം സർക്കാർ തള്ളിയതോടെയാണ് സംഘടനകൾ ഒറ്റക്കെട്ടായി പ്രത്യക്ഷ സമരവുമായി രംഗത്തു വരുന്നത്.
സച്ചാർ ശിപാർശകൾ പ്രത്യേക സെൽ രൂപവത്കരിച്ച് നടപ്പാക്കുക, മുന്നാക്ക-പിന്നാക്ക സ്കോളർഷിപ് തുക ഏകീകരിക്കുക, സർക്കാർ സർവിസിലെ പ്രാതിനിധ്യം സമുദായം തിരിച്ച് കണക്ക് പ്രസിദ്ധീകരിക്കുക, പിന്നാക്കം പോയവർക്ക് ജനസംഖ്യാനുപാതികമായി പ്രാതിനിധ്യം വർധിപ്പിക്കുക തുടങ്ങിയ ആവശ്യങ്ങൾ ഉന്നയിച്ചാണ് സമരം.
സമിതി ചെയർമാൻ സാദിഖലി ശിഹാബ് തങ്ങൾ അധ്യക്ഷത വഹിച്ചു. പി.കെ. കുഞ്ഞാലിക്കുട്ടി എം.എൽ.എ ഉദ്ഘാടനം ചെയ്തു. പി.എം.എ. സലാം, ഡോ. ബഹാഉദ്ദീൻ മുഹമ്മദ് നദ്‌വി, എം.ഐ. അബ്ദുൽ അസീസ്, കടക്കൽ അബ്ദുൽ അസീസ് മൗലവി, ടി.പി. അബ്ദുല്ലക്കോയ മദനി, പി.എൻ. അബ്ദുൽ ലതീഫ് മദനി തുടങ്ങിയവർ സംസാരിച്ചു.
സച്ചാർ കമ്മിറ്റി പദ്ധതികൾ പ്രത്യേക പദ്ധതി ആവിഷ്‌കരിച്ച് മുസ്ലിംകൾക്ക് മാത്രമായിത്തന്നെ നടപ്പാക്കണം. ന്യൂനപക്ഷ വിഭാഗങ്ങൾക്കുള്ള മറ്റ് പദ്ധതികൾ ജനസംഖ്യാനുപാതികമായി നടപ്പാക്കണം. മറ്റ് ന്യൂനപക്ഷ വിഭാഗങ്ങൾക്കായി പ്രത്യേക കമീഷനുകൾ സമർപ്പിക്കുന്ന ശിപാർശകൾ നടപ്പാക്കുന്നതിന് പൂർണ പിന്തുണ നൽകും. ലളിതമായി പരിഹരിക്കാവുന്ന വിഷയം സങ്കീർണമാക്കി ന്യൂനപക്ഷ സമുദായങ്ങളെ തമ്മിലടിപ്പിക്കുകയും മുസ്ലിം ജനവിഭാഗം അവിഹിതമായി അവകാശങ്ങൾ നേടി എന്ന പ്രതീതി സൃഷ്ടിക്കുകയും ചെയ്യുന്ന എൽ.ഡി.എഫ് സർക്കാർ സമീപനത്തിൽ പ്രതിഷേധിച്ചു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.