സ്വാശ്രയ മെഡിക്കൽ ഫീസ്​ സർക്കാർ സുപ്രീംകോടതിയിൽ

തിരുവനന്തപുരം: സ്വാശ്രയ മെഡിക്കൽ ഫീസ്​ കുത്തനെ വർധിപ്പിക്കാൻ വഴിയൊരുക്കുന്ന ഹൈകോടതിവിധി സ്​റ്റേ ചെയ്യണമെന്നാവശ്യപ്പെട്ട്​ സംസ്​ഥാന സർക്കാർ സുപ്രീംകോടതിയിൽ പ്രത്യേകാനുമതി ഹരജി സമർപ്പിച്ചു.

ഫീസ്​ നിർണയ സമിതി നിശ്ചയിച്ച ഫീസ്​ റദ്ദാക്കിയ 2020 മേയ്​ 19ലെ വിധിയും കോളജ്​ മാനേജ്​മെൻറുകൾ നൽകുന്ന ഒാഡിറ്റ്​ ചെയ്​ത ബാലൻസ്​ ഷീറ്റ്​ മാത്രം പരിഗണിച്ച്​ ഫീസ്​ നിർണയിക്കണമെന്ന കഴിഞ്ഞ 27ലെ ഉത്തരവും സ്​റ്റേ ചെയ്യണമെന്നാവശ്യപ്പെട്ടാണ് സർക്കാർ സുപ്രീംകോടതിയെ സമീപിച്ചത്​.

കോളജുകൾ സമർപ്പിക്കുന്ന ഒാഡിറ്റ്​ ചെയ്​ത ബാലൻസ്​ ഷീറ്റ്​ മാത്രം പരിഗണിച്ച്​ ഫീസ്​ നിർണയിച്ചാൽ മതിയെന്ന ഉത്തരവ്​ 2003ലെ ഇസ്​ലാമിക്​ അക്കാദമി കേസിൽ സുപ്രീംകോടതി വ്യക്തമാക്കിയ ഫീസ്​ നിർണയ സമിതിയുടെ ചുമതലയെ തുരങ്കം വെക്കുന്നതാണെന്ന്​ ഹരജിയിൽ ചൂണ്ടിക്കാട്ടി​.

കോളജുകളുടെ വരവുചെലവ്​ കണക്കുകൾ സംബന്ധിച്ച രേഖകൾ വിളിച്ചുവരുത്തി സമിതി 'സൂപ്പർ അക്കൗണ്ടിങ്' ന​ടത്തേണ്ടതില്ലെന്ന ഹൈകോടതി നിർദേശം കണക്കുകൾ സൂക്ഷ്​മ പരിശോധന നടത്തണമെന്ന ഇസ്​ലാമിക്​ അക്കാദമി കേസിലെ വിധിക്ക്​ വിരുദ്ധമാണ്​. ​വരവുചെലവ്​ കണക്ക്​ സംബന്ധിച്ച വൗച്ചറുകൾ, ഒാഡിറ്റ്​ ചെയ്​ത അക്കൗണ്ട്​ ബുക്കുകൾ തുടങ്ങിയവ പരിശോധിക്കരുതെന്ന നിർദേശം സമിതി പ്രവർത്തനം തടസ്സപ്പെടുത്തുന്നതും ഫീസ്​ നിർണയം അപ്രായോഗികമാക്കുന്നതുമാണ്​. ഫീസ്​ നിർണയത്തിനുമുമ്പ്​ കോളജ്​ മാനേജ്​മെൻറുകൾക്ക്​ പറയാനുള്ളത്​ കേട്ടില്ലെന്ന കോടതി നിരീക്ഷണം തെറ്റാണ്​.

ഒാരോ ​മാനേജ്​മെൻറുകളെയും വെവ്വേറെ കേട്ടാണ്​ സമിതി ഫീസ്​ നിർണയം നടത്തിയത്​. ഹരജിയിൽ പറയുന്നു.

പ്രധാനമന്ത്രിക്ക്​ പരാതി

തെറ്റായ കണക്കുകളുടെ പിൻബലത്തിൽ സ്വാശ്രയ മെഡിക്കൽ ഫീസ്​ കുത്തനെ ഉയർത്താനുള്ള ഗൂഢാലോചന നടക്കുന്നതായും ഇതുസംബന്ധിച്ച്​ സി.ബി.​െഎ അന്വേഷണം വേണമെന്നും ആവശ്യപ്പെട്ട്​ വിദ്യാർഥികളും രക്ഷാകർത്താക്കളും പ്രധാനമന്ത്രിക്ക്​ കത്തയച്ചു. ​പെരുപ്പിച്ച കണക്കുകളാണ്​ വിവിധ മാനേജ്​മെൻറുകൾ ഫീസ്​ നിർണയത്തിനായി സമർപ്പിച്ചതെന്നും ഇവരുടെ മറ്റ്​ ചെലവുകൾ കൂടി വിദ്യാർഥികളുടെ തലയിൽ കെട്ടിവെക്കാനുള്ള ​ശ്രമമാണ്​ നടക്കുന്നതെന്നും പരാതിയിൽ പറയുന്നു. ഫീസ്​ വർധനക്ക്​​ കളമൊരുക്കാൻ ഉന്നതർ ഉൾപ്പെടെയുള്ള സംഘം ആസൂത്രിത ശ്രമം നടത്തുന്നെന്നും ഇതുസംബന്ധിച്ച്​ അന്വേഷണം വേണമെന്നും പരാതിയിലുണ്ട്​.