വന്ദേഭാരത് എക്സ്പ്രസ്: സർവീസ് കാസർകോട് വരെ

ന്യൂഡൽഹി: കേരളത്തിന്‍റെ പൊതുവായ താൽപര്യം മാനിച്ച്​ വന്ദേഭാരത്​ എക്സ്​പ്രസ്​ ട്രെയിൻ സർവീസ്​ തിരുവനന്തപുരം മുതൽ കാസർകോട്​ വരെയായിരിക്കുമെന്ന്​ റെയിൽവേ മന്ത്രി അശ്വിനി വൈഷ്ണവ്​. 156 കോടി രൂപ മുടക്കി തിരുവനന്തപുരത്ത്​ റെയിൽവേ നവീകരണ പ്രവർത്തനങ്ങൾ നടത്തുമെന്നും അദ്ദേഹം വാർത്തസമ്മേളനത്തിൽ അറിയിച്ചു.

വന്ദേഭാരത്​ എക്സ്​പ്രസിന്​ തുടക്കത്തിൽ 70-80 കിലോമീറ്ററാണ്​ വേഗം. ട്രാക്ക്​ പരിഷ്കരിച്ച്​ ഒന്നര വർഷത്തിനകം മണിക്കൂറിൽ 110 കിലോമീറ്റർ വേഗത്തിൽ ഓടിക്കാനാണ്​ ഉദ്ദേശം. സ്ലീപ്പർ കോച്ചുകൾ ഡിസം​ബറോടെ തയാറാക്കും. മൂന്നര വർഷത്തിനകം തീർക്കാമെന്നു കരുതുന്ന രണ്ടാംഘട്ട പാത നവീകരണത്തിലൂടെ വേഗം 130 കിലോമീറ്ററായി ഉയർത്താനാവും. ഇതിന്​ ഭൂമി ഏറ്റെടുക്കണം; ചില വളവുകൾ നിവർത്തണം. 160 കിലോമീറ്റർ വേഗത്തിൽ ഓടിക്കുകയാണ്​ അന്തിമ ലക്ഷ്യം.

യാത്ര നിരക്കുകളുടെ കാര്യത്തിൽ അന്തിമ തീരുമാനമായിട്ടില്ല. നിലവിൽ ഒരു സർവീസ്​ മാത്രമാണ്​ നടത്തുക. ഭാവിയിൽ കൂടുതൽ സർവീസുകൾ നടത്താനാവും. കൂടുതൽ സ്​റ്റോപ്പുകൾ അനുവദിക്കണമെന്ന ആവശ്യം ഉയരുന്നുണ്ടെങ്കിലും ആദ്യ ഘട്ടത്തിൽ നിശ്​ചയിച്ച പ്രകാരം മുന്നോട്ടു പോകും. ഭാവിയിൽ 200 കിലോമീറ്റർ വരെ ദൂരപരിധിക്കുള്ളിൽ പ്രത്യേക ട്രെയിനുകൾ ഓടിക്കാനുള്ള ലക്ഷ്യത്തോടെയാണ്​ റെയിൽവേ മുന്നോട്ടു നീങ്ങുന്നതെന്നും മ​ന്ത്രി പറഞ്ഞു.

തിരുവനന്തപുരത്ത് സമഗ്ര റെയിൽവേ വികസനത്തിന്​ പദ്ധതി തയാറാക്കും. നേമം, കൊച്ചുവേളി സ്​റ്റേഷനുകൾ പരിഷ്കരിക്കും. പാത നവീകരണം അടക്കം ചെറുതും വലുതുമായ നിർമാണ പ്രവർത്തനങ്ങൾക്കാണ്​ 156 കോടി രൂപ ചെലവിടുന്നത്​. ഇതുവഴി യാത്രാ വേഗം വർധിപ്പിക്കും. നേമം, കൊച്ചുവേളി സ്​റ്റേഷനുകൾ പ്രധാന ടെർമിനലാക്കി തിരുവനന്തപുരം സെൻട്രൽ സ്​റ്റേഷനിലെ തിരക്ക്​ കുറക്കും. വർക്കല അടക്കം കേരളത്തിലെ വിവിധ സ്​റ്റേഷനുകൾ ലോകോത്തര നിലവാരത്തിലാക്കും.

വന്ദേ ഭാരത്​ വരുന്നതോടെ സിൽവർ ലൈൻ അടഞ്ഞ അധ്യായമായെന്ന്​ പറയാനാവില്ല. അതുമായി ബന്ധപ്പെട്ട്​ മുഖ്യമന്ത്രിയുമായി ചർച്ച നടത്തും. ശബരി പാതക്ക്​ അങ്കമാലി വഴിയുള്ളതിനു പുറമെ ബദൽ റൂട്ടി​ന്‍റെ സാധ്യതയും പരിശോധിക്കുന്നുണ്ട്​. സാ​ങ്കേതിക റിപ്പോർട്ട്​ കിട്ടിയ ശേഷം അന്തിമ തീരുമാനമെടുക്കുമെന്നും അശ്വിനി വൈഷ്ണവ്​ പറഞ്ഞു. വിദേശകാര്യ സഹമന്ത്രി വി. മുരളീധരനും വാർത്തസമ്മേളനത്തിൽ പ​ങ്കെടുത്തു.