കടലാസുകളിൽ അടുപ്പുകൂട്ടി പഴയിടം രുചിപ്പെരുമ

കോട്ടയം: പാചകപ്പുരകളിൽ തീയണഞ്ഞപ്പോൾ ​കടലാസുകളിൽ അടുപ്പുകൂട്ടിയ പഴയിടം രുചിപ്പെരുമ ഇനി കേരളത്തിന്​ മധുരം പകരും. മലയാളി അതിരുചിയോടെ ആസ്വദിക്കുന്ന പാചകവിദഗ്ധൻ പഴയിടം മോഹനൻ നമ്പൂതിരിയുടെ രുചിക്കൂട്ട്​ രഹസ്യങ്ങൾ പുസ്​തകമായി പുറത്തിറങ്ങ​ുന്നു.

സദ്യവട്ടങ്ങൾ ഒഴിഞ്ഞ ലോക്​ഡൗൺ കാലത്ത്​ ​പുസ്​തകത്തിൽ തീൻമേശയൊരുക്കിയ പഴയിടം മോഹനൻ നമ്പൂതിരി, 75 പായസങ്ങളടക്കം 400 വെജിറ്റേറിയൻ വിഭവങ്ങളുടെ പാചകക്കുറിപ്പാണ്​ തയാറാക്കിയിരിക്കുന്നത്​. വിഭവങ്ങൾ, പാചകരീതി എന്നിവ വിവരിക്കുന്ന കുറിപ്പുകൾ തയാറായിക്കഴിഞ്ഞു. ഇതിനൊപ്പം ചിത്രങ്ങളും ചേരുന്നതോടെ രുചിക്കൂട്ട്​ പുസ്​തകത്തിലിടം പിടിക്കും.

കേരളത്തി​െൻറ നാടൻ രുചികൾക്കൊപ്പം തമിഴ്​നാട്​, ചെട്ടിനാട്​ വിഭവങ്ങളും കുറിപ്പുകളിൽ നിറയും. പാവ​ക്കപ്പായസമടക്കം അദ്ദേഹത്തി​െൻറ സ്വന്തം കണ്ടെത്തലുകളും പുസ്​തകത്തിലുണ്ടാകും. ഒരോ പാചകക്കുറിപ്പിനൊപ്പവും അതേ അളവിൽ തയാറാക്കിയാൽ എത്ര പേർക്ക്​ കഴിക്കാമെന്നും​ വ്യക്തമാക്കിയിട്ടുണ്ടാകും. കപ്പ്​, സ്​പൂൺ അളവി​െനാപ്പം തൂക്കവും പ്രത്യേകമായുണ്ടാകും. ഒരോ വിഭവവും എവിടെനിന്ന്​ വന്നു, ഉത്ഭവം അങ്ങനെ ചെറുവിവരണവുമുണ്ടാകും. ആദ്യകാല കറിക്കൂട്ടുകളുടെ സമഗ്രചിത്രവുമുണ്ടാകും.

ഒരോ വിഭവവും തയാറാക്കി ചിത്രമെടുക്കുന്ന ജോലിയാണ്​ നടക്കുന്നതെന്ന്​ മോഹനൻ നമ്പൂതിരി പറയുന്നു. ഇതിന്​ ഏറെ സമയം വേണ്ടിവരുന്നുണ്ട്​. ചിങ്ങത്തിനുമുമ്പ്​ പൂർത്തിയാക്കാനാണ്​ ശ്രമിക്കുന്നത്​. ആദ്യ ലോക്​ഡൗൺ കാലത്ത്​ വെറുതെ ഇരുന്നപ്പോഴാണ്​ ഇത്തരമൊരു ആശയം ഉടലെടുത്തത്​. രണ്ടാം ലോക്​ഡൗൺ എത്തിയതോടെ ഏറക്കുറെ പൂർത്തിയാക്കി. കൂട്ടുകൾ പങ്കുവെക്കുന്നത്​​ വെല്ലുവിളിയാകില്ലെയെന്ന്​ ചോദിച്ചാൽ പാചകത്തിൽ രഹസ്യങ്ങളില്ലെന്നാണ്​ അദ്ദേഹത്തി​െൻറ ചിരിമറുപടി. റഫറൻസ്​ ഗ്രന്ഥമെന്ന നിലയിൽ ഏറെ തയാറെടുപ്പുകളോടെയാണ്​ രൂപപ്പെടുത്തുന്നതെന്നും അടുത്തഘട്ടമായി പ്രസാധകരെ കണ്ടെത്തുമെന്നും പഴയിടം പറഞ്ഞു.

മകൻ ആരംഭിച്ച യൂട്യൂബ് ചാനൽ വഴി രുചിക്കൂട്ടുകളെ പരിചയപ്പെടുത്തുന്ന തിരക്കിലുമാണ്​ ഇപ്പോൾ പഴയിടം. ഒപ്പം 'പഴയിടം രുചി' ​േപരിൽ റസ്​റ്റാറൻറ്​ ആരംഭിക്കുകയാണ്​. തിരുവല്ലയിലാണ്​ ആദ്യസംരംഭം. പതിനഞ്ചിലധികം സംസ്ഥാന സ്കൂൾ കലോത്സവങ്ങളിലും നിരവധി ജില്ല മേളകൾക്കും ഭക്ഷണമൊരുക്കിയതിലുടെ പ്രശസ്​തനാണ്​ പഴയിടം.