മംഗളൂരു: സിറ്റി പൊലീസ് കമീഷണറേറ്റ് പരിധിയിൽ പുതുവത്സര ആഘോഷങ്ങൾക്കായി പൊതുതാൽപര്യങ്ങൾ മുൻനിർത്തി മംഗളൂരു പൊലീസ് കമീഷണർ അനുപം അഗർവാൾ മാർഗനിർദേശങ്ങൾ പുറപ്പെടുവിച്ചു. പുതുവത്സരാഘോഷങ്ങൾ സംഘടിപ്പിക്കാൻ ഉദ്ദേശിക്കുന്ന എല്ലാ ഹോട്ടലുകളും റസ്റ്റാറന്റുകളും ക്ലബുകളും റിസോർട്ടുകളും മറ്റു സ്ഥാപനങ്ങളും മംഗളൂരു സിറ്റി പൊലീസ് കമീഷണറുടെ ഓഫിസിൽനിന്ന് മുൻകൂർ അനുമതി വാങ്ങണം.
അപേക്ഷകൾ ഈമാസം 23ന് വൈകീട്ട് അഞ്ചിനകം സമർപ്പിക്കണം. പുതുവത്സര പരിപാടികൾ അർധരാത്രി 12ന് പൂർത്തിയാക്കണം. അതിനുശേഷം പരിപാടി തുടരാനാവില്ല. മുൻകൂർ അനുമതിയില്ലാതെ പുതുവത്സരാഘോഷങ്ങൾ അനുവദിക്കില്ല. ഈ നിയമങ്ങൾ ലംഘിക്കുന്നവർക്കെതിരെ നിയമനടപടി സ്വീകരിക്കും.
ബന്ധപ്പെട്ട വകുപ്പുകളിൽനിന്ന് ലഭിച്ച ലൈസൻസുകളും അനുമതികളും അനുസരിച്ച് സംഘാടകർ നിയമങ്ങൾ കർശനമായി പാലിക്കണം. കോവിഡ് അല്ലെങ്കിൽ മറ്റ് ആരോഗ്യ സംബന്ധിയായ സർക്കാർ നിർദേശങ്ങൾ നടപ്പാക്കുകയാണെങ്കിൽ, സംഘാടകർ അത് കർശനമായി പാലിക്കണം.
മദ്യം വിൽക്കുന്നതിനും വിതരണം ചെയ്യുന്നതിനും എക്സൈസ് വകുപ്പിന്റെ രേഖാമൂലമുള്ള അനുമതി വാങ്ങണം. പൊതുസ്ഥലങ്ങൾ, ബസ് സ്റ്റാൻഡുകൾ, പാർക്കുകൾ, സ്റ്റേഡിയങ്ങൾ, റെയിൽവേ സ്റ്റേഷനുകൾ, മറ്റു പൊതുസ്ഥലങ്ങൾ എന്നിവിടങ്ങളിൽ പുകവലിയും മദ്യപാനവും കർശനമായി നിരോധിച്ചിരിക്കുന്നു.
ശബ്ദ റെക്കോഡിങ് സംവിധാനങ്ങൾ, ഉച്ചഭാഷിണികൾ എന്നിവ ഉപയോഗിക്കുന്നതിന് മുൻകൂർ അനുമതി വാങ്ങണം. ശബ്ദ മലിനീകരണ നിയമങ്ങൾ 2000, സുപ്രീംകോടതിയുടെ നിർദേശങ്ങൾ എന്നിവക്ക് അനുസൃതമായിരിക്കണം ശബ്ദനില. ഡി.ജെ കർശനമായി നിരോധിച്ചു.
അപകടങ്ങൾ ഉണ്ടാകാതിരിക്കാൻ സംഘാടകർ കൂടുതൽ നടപടികൾ സ്വീകരിക്കണം. വ്യക്തിഗത പാർക്കിങ് ക്രമീകരണം ഏർപ്പെടുത്തണം. പുതുവത്സര ആഘോഷങ്ങൾ നടക്കുന്ന ഹോട്ടലുകൾ, ക്ലബുകൾ അല്ലെങ്കിൽ പ്രത്യേക പരിപാടികൾ എന്നിവയുടെ മാനേജർമാർ 18 വയസ്സിന് താഴെയുള്ള വ്യക്തികൾക്ക് മദ്യം നൽകരുത്.
പ്രായപൂർത്തിയാകാത്തവരെ അവരുടെ മാതാപിതാക്കളോടൊപ്പം അല്ലാതെ അത്തരം പരിപാടികളിൽ പ്രവേശിക്കാൻ അനുവദിക്കരുത്. അശ്ലീല നൃത്തങ്ങൾ, അർധനഗ്‍ന പ്രകടനങ്ങൾ, ചൂതാട്ടം, മറ്റ് അശ്ലീല പ്രവർത്തനങ്ങൾ എന്നിവ കർശനമായി നിരോധിച്ചിരിക്കുന്നു.
ഉത്സവങ്ങളുടെ പേരിൽ സ്ത്രീകൾക്കെതിരായ പീഡനങ്ങളും ആക്രമണങ്ങളും അശ്ലീല പ്രവർത്തനങ്ങളും തടയാൻ പ്രത്യേക ദൗത്യസേനയെ നിയോഗിക്കും. താമസസ്ഥലങ്ങൾ, ഹോട്ടലുകൾ, ഹോസ്റ്റലുകൾ അല്ലെങ്കിൽ കോമ്പൗണ്ടുകൾ എന്നിവയിൽ ശല്യമുണ്ടാക്കുന്നതും ഈ സമയത്ത് നിരോധിച്ചിരിക്കുന്നു.
പാർക്കുകൾ, ബസ് സ്റ്റാൻഡുകൾ, റെയിൽവേ സ്റ്റേഷനുകൾ തുടങ്ങിയ പൊതു ഇടങ്ങളിൽ പുകവലി, മദ്യപാനം അല്ലെങ്കിൽ അസഭ്യമായ പെരുമാറ്റം എന്നിവ നിരോധിച്ചിരിക്കുന്നു. പൊതുസമാധാനത്തിന് ഭംഗം വരുത്തുന്നവർ, ശല്യപ്പെടുത്തൽ, അശ്ലീല പ്രവൃത്തികൾ എന്നിവ നടത്തുന്നവർക്കെതിരെ കർശന നടപടി സ്വീകരിക്കും.
മദ്യപിച്ച് വാഹനമോടിക്കുന്നവരെ നിരീക്ഷിക്കാൻ ട്രാഫിക് പൊലീസും വിദഗ്ധരും അടങ്ങുന്ന ദ്രുതകർമസേന രൂപവത്കരിച്ചിട്ടുണ്ട്. മംഗളൂരു നഗരത്തിന്റെ എല്ലാ മേഖലകളിലും ഈ ടാസ്‌ക് ഫോഴ്‌സ് പ്രവർത്തിക്കും. മദ്യപിച്ച് വാഹനമോടിക്കുന്നവർക്കെതിരെ ഉചിതമായ നിയമനടപടി സ്വീകരിക്കും. സ്വയമേവയുള്ള പ്രവർത്തനങ്ങൾ, വീലിങ്, ഡ്രാഗ് റേസിങ്, അമിതവേഗം, ഉച്ചത്തിലുള്ള ശബ്ദമുണ്ടാക്കുന്ന പ്രവർത്തനങ്ങൾ എന്നിവ കർശനമായി നിരോധിച്ചിരിക്കുന്നു.
ഇത്തരം സംഭവങ്ങൾ തടയാൻ പ്രത്യേക സംഘത്തെ നിയോഗിക്കും. മദ്യപാനം, അശ്ലീല പ്രവൃത്തികൾ, മറ്റു പൊതു സ്ഥലങ്ങളിലോ കടൽത്തീരത്തോ ഉള്ള മറ്റ് അശ്ലീല പ്രദർശനങ്ങൾ എന്നിവ കർശനമായി നിരോധിച്ചിരിക്കുന്നു. പുതുവത്സരാഘോഷത്തിന്റെ പേരിൽ പൊതുജനങ്ങളുടെ സമാധാനാന്തരീക്ഷം തകർക്കുന്ന തരത്തിൽ പടക്കം പൊട്ടിക്കുന്നത് നിരോധിച്ചിട്ടുണ്ട്.
ആവശ്യമായ അഗ്നിശമന ഉപകരണങ്ങൾ, എമർജൻസി മെഡിക്കൽ വാഹനങ്ങൾ, മറ്റു സുരക്ഷ നടപടികൾ എന്നിവ സംഘാടകർ ഏകോപിപ്പിക്കണം. പൊതുജനങ്ങളുടെ സുരക്ഷയും ക്രമസമാധാനവും മുൻനിർത്തിയാണ് ഈ മാർഗനിർദേശങ്ങളെല്ലാം പുറപ്പെടുവിച്ചിരിക്കുന്നതെന്ന് കമീഷണർ പ്രസ്താവനയിൽ പറഞ്ഞു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.