എമ്പ്രാന്തിരിയമ്മ കരഞ്ഞു, വര വലിച്ചെറിഞ്ഞു

അക്കിത്തം കവിത എഴുതി തുടങ്ങിയത്​ എട്ടാമത്തെ വയസ്സിലാണ്​. അതിനും മുമ്പ്​ വരയിലായിരുന്നു കമ്പം. പാരമ്പര്യമായി സിദ്ധിച്ചതായിരുന്നു ചിത്രകലയോടുള്ള ഈ ഭ്രമം. അക്കിത്തത്തി​െൻറ സഹോദരനാണ്​ പാരിസിൽ സ്​ഥിര താമസക്കാരനായ ലോക പ്രശസ്​ത ചിത്രകാരൻ അക്കിത്തം നാരായണൻ എന്നത്​ അതിന്​ തെളിവാണ്​. മകൻ വാസുദേവനും ചിത്രകാരനാണ്​.മനയുടെ കുളക്കടവിൽ കരിക്കട്ടയിൽ ചിത്രങ്ങൾ വരച്ചു പഠിച്ച അക്കിത്തം വര നിർത്താൻ തീരുമാനിച്ചത്​ ഒരു സ്​ത്രീയുടെ കരച്ചിലിനു മുന്നിലായിരുന്നു.

മനയിലെ കുളത്തിൽ കൂട്ടുകാരായ ജയന്തൻ നമ്പൂതിരിക്കും ശേഖരൻ വാരിയർക്കുമൊപ്പം കുളിക്കാൻ പോകുമായിരുന്നു. വെളുത്ത കോണകവും കറുത്ത അരഞ്ഞാണച്ചരടുമിട്ട എമ്പ്രാന്തിരിയമ്മയെ കുളക്കടവിൽ വരച്ചുവെക്കണമെന്ന്​ അക്കിത്തത്തിലെ കുട്ടിക്കു തോന്നി. അതു വലിയ കുഴപ്പമായി കലാശിച്ചു. എമ്പ്രാന്തിരിയമ്മ സങ്കടപ്പെട്ടു, കരച്ചിലായി. പിന്നീടവർ അക്കിത്തത്തോട്​ മിണ്ടാതായി. ഇനി വര വേണ്ടെന്ന്​ അന്നെടുത്ത തീരുമാനമായിരുന്നു. വരയിൽനിന്ന്​ വഴിതെറ്റി കവിതയിലേക്ക്​ ചേക്കേറാൻ നിമിത്തമായതും ആ എമ്പ്രാന്തിരിയമ്മയുടെ കരച്ചിലായിരുന്നു...

സംസ്​കൃതമാണ്​ ആദ്യം പഠിച്ചതെങ്കിലും തുടർ പഠനത്തിന്​ കോഴിക്കോട് സാമൂതിരി കോളജിൽ ഫിസിക്സിനു ചേർന്നിരുന്നു. ഒരുമാസം കഴിഞ്ഞ സമയത്താണ്​ കടുത്ത വയറിളക്കം ബാധിച്ചത്​. തിരികെ വീട്ടിലെത്തി മൂന്നുമാസം ചികിത്സ വേണ്ടിവന്നു ഭേദപ്പെട്ടത്​.

മുണ്ടശ്ശേരി പറഞ്ഞു ഇനി പഠി​ക്കണ്ട....

വീണ്ടും കോളജിൽ ചെന്നപ്പോ 'ഇനി ഈ വർഷം പഠിക്കാതിരിക്കുന്നതാ നല്ലത്​' എന്ന്​ കൂട്ടുകാരുടെ ഉപദേശം. പാഠങ്ങളെല്ലാം അത്രയേറെ മുന്നിൽ പോയിരുന്നു. മടങ്ങിപ്പോയ അക്കിത്തം തൃശൂരിൽ മംഗളോദയം പ്രസിൽ ഉണ്ണിനമ്പൂതിരി മാസികയിൽ പ്രിന്ററും പബ്ലിഷറുമായി. അതിനിടയിൽ കോളജിൽ ചേരാൻ ശ്രമിച്ചുനോക്കിയാതാണ്​. അപ്പോഴാണ്​ കേരളത്തിൻറെ ആദ്യ വിദ്യാഭ്യാസ മ​ന്ത്രി വരെയായ സാക്ഷാൽ ജോസഫ്​ മുണ്ടശ്ശേരിയുടെ ഉപദേശം.

'താനെന്തിനാ.. കോളജിലൊക്കെ പോയി പഠിക്കുന്നത്. പേരിനൊപ്പം ചേർക്കാനൊരു ബിരുദം മാത്രമേ ആവൂ അതൊക്കെ. ഒരു കാര്യവുമില്ല. ഇംഗ്ലിഷ് പുസ്തകങ്ങൾ നന്നായി വായിക്കുക. നന്നായി വായിക്കുക...' പിന്നെ പഠിക്കാൻ മെനക്കെട്ടില്ല.

സിനിമ വന്നു വിളിച്ചിട്ടും...

സിനിമയിൽ പാ​ട്ടെഴുതാൻ പലവട്ടം അക്കിത്തത്തിന്​ വിളി വന്നതാണ്​. അന്ന്​ സിനിമ വിളഞ്ഞിരുന്ന മദിരാശിയിലേക്ക്​ പോകാൻ രണ്ടുമൂന്നു വട്ടം ഒരുങ്ങിയതുമാണ്​. ഒടുവിൽ വേണ്ടെന്നു വെക്കുകയായിരുന്നു. എങ്കിലും സിനിമ സംഗീതജ്​ഞനായിരുന്ന കെ. രാഘവൻ മാസ്​റ്ററെ ഏറെ പ്രിയമായിരുന്നു. ഒരിക്കൽ തലശേരി ജഗന്നാഥക്ഷേത്രത്തിലെ പാട്ടുകച്ചേരിക്ക് ഒരു പാട്ടുവേണമെന്ന്​ രാഘവൻ മാഷ്​ ആവശ്യപ്പെട്ടു. നിന്ന നിൽപ്പിലായിരുന്നു എഴുത്ത്​. അപ്പോൾ തന്നെ രാഘവൻ മാഷ്​ ഈണവും നൽകി. ആ പാട്ട്​ പിന്നെയും പിന്നെയും പാടാൻ ആളുകൾ ആവശ്യപ്പെട്ടുകൊണ്ടിരുന്നു വെന്നത്​ അക്കിത്തം ഓർമിക്കാറുണ്ടായിരുന്നു.

അച്ഛൻ കൃതജ്ഞത പറയുന്നു...

പട്ടാമ്പി ആയമ്പിള്ളി മനയിലെ ശ്രീദേവി അന്തർജനത്തി​െൻറ വിവാഹാലോചന വരുമ്പോൾ അക്കിത്തത്തിന്​ പ്രായം 23. ശ്രീദേവിക്ക് 15 വയസ്സ്​. 16ാമത്തെ വയസ്സിൽ ശ്രീദേവി ആദ്യമായി പ്രസവിച്ചു. പക്ഷേ, ആ കുഞ്ഞ്​ മരണത്തിന്​ കീഴടങ്ങി. കുഞ്ഞിന്റെ വേർപാട്​ കവിയിൽ കനത്ത വിഷാദമായി എരിഞ്ഞു. ആ നൊമ്പരം കവിതയായി. 'അച്ഛൻ കൃതജ്ഞത പറയുന്നു' എന്ന കവിത അങ്ങനെയാണ്​ പിറന്നത്​.