മുസ്​ലിം വിരുദ്ധതയുടെ വ്യാജ ഏറ്റുമുട്ടലുകൾ

യോഗി ആദിത്യനാഥി​​​െൻറ ഉത്തർപ്രദേശിൽ ഒരു വർഷത്തിനകം നടന്ന പൊലീസ്​ ഏറ്റുമുട്ടലുകളുടെ ശരിയായ ചിത്രം നൽകുന്നതായിരുന്നു ന്യൂഡൽഹി കോൺസ്​റ്റിറ്റ്യൂഷൻ ക്ലബിൽ നടന്ന പൊതുവിചാരണ​. അവിടെ കേട്ട സാക്ഷിമൊഴികൾ ബി.ജെ.പി സർക്കാർ അധികാരമേറ്റശേഷം ഉത്തർപ്രദേശ്​ പൊലീസ്​ നടത്തിയ 1400 ഏറ്റുമുട്ടലുകളും വ്യാജവും ഏകപക്ഷീയവുമായിരുന്നുവെന്നതി​​​െൻറ തെളിവുകളായിരുന്നു. ഡൽഹിയിൽനിന്ന്​ ഒട്ടും അകലത്തിലല്ലാത്ത ഒരു അയൽസംസ്​ഥാനത്ത്​ തുടർന്നുകൊണ്ടിരിക്കുന്ന വ്യാജ ഏറ്റുമുട്ടലുകളെകുറിച്ചുള്ള അന്വേഷണത്തിന്​ ദേശീയ മാധ്യമങ്ങളൊന്നും മുതിരാത്തതാണ്​ ഇത്തരമൊരു അന്വേഷണത്തിനും പൊതുവിചാരണക്കും പ്രേരിപ്പിച്ചതെന്ന്​ ഡൽഹി സർവകലാശാലയിലെ അധ്യാപികയും സംഘാടകരായ ‘യുനൈറ്റഡ്​ എഗൻസ്​റ്റ്​ ഹെയ്​റ്റ്’ കൂട്ടായ്​മയുടെ നേതാവുമായ ബനോജ്യോത്സ്​​ന ലാഹിരി പറഞ്ഞു. ദേശീയ മാധ്യമങ്ങളുടെ മൗന​െത്തക്കാൾ തങ്ങളെ പേടിപ്പെടുത്തുന്നത്​ ഉത്തർപ്രദേശിലെ പ്രാദേശിക മാധ്യമങ്ങൾ ഇൗ ഏകപക്ഷീയ കൊലപാതകങ്ങളെ സാഘോഷം കൊണ്ടാടുന്നതാണെന്നും​ ബനോ ജ്യോത്സ്​​ന തുടർന്നു. ഇൗ വ്യാജ ഏറ്റുമുട്ടലുകൾ ഉത്തർപ്രദേശിനെ ക്രിമിനലുകളിൽനിന്ന്​ മോചിപ്പിക്കാനുള്ളതാണെന്ന്​ മഹത്വ​വത്​കരിച്ച്​ യോഗി ആദിത്യനാഥി​​​െൻറ അപദാനങ്ങൾ വാഴ്​ത്തിപ്പാടിക്കൊണ്ടിരിക്കുകയാണ്​ ഉത്തർപ്രദേശിലെ മാധ്യമങ്ങൾ. 

പ്രമുഖ സ​ുപ്രീംകോടതി അഭിഭാഷക അഡ്വ. ഇന്ദിര ജയ്​സിങ്, അലഹബാദ്​ ഹൈകോടതി അഭിഭാഷകൻ അഡ്വ. അസദ്​ ഹയാത്ത്​ തുടങ്ങിയ നിയമവിദഗ്​ധരുടെ സാന്നിധ്യത്തിൽ നടന്ന ഇൗ പൊതുവിചാരണ​യോടും സംഘ്​പരിവാർ വിരുദ്ധമായതെന്തിനോടും എന്ന പോലുള്ള പതിവ്​​ നിഷേധാത്​മക സമീപനമായിരുന്നു ദേശീയ മാധ്യമങ്ങൾക്ക്​. അതിൽ കവിഞ്ഞൊന്നും ഹിന്ദി ബെൽറ്റിലെ മാധ്യമങ്ങളിൽ നിന്ന്​ പ്രതീക്ഷിക്കാനില്ല. കേന്ദ്രത്തിൽ മോദിയെത്തിയതോടെ തന്നെ ബി.ജെ.പി വക്​താക്കളെ പോലെയായി മാറിയ പല മാധ്യമപ്രവർത്തകരും ഉത്തർപ്രദേശിൽ യോഗി കൂടിയെത്തിയതോടെ അ​േങ്ങാട്ട്​ മാറ്റിപ്പിടിച്ചിരിക്കുകയാണ്​. ഉത്തർപ്രദേശിൽ എന്തു നടക്കുന്നുവെന്ന്​ അന്വേഷിക്കുന്നതിനു​പകരം നരേ​ന്ദ്ര മോദിയെക്കുറിച്ചെന്ന പോലെ യോഗിയുടെ ജീവചരി​ത്ര ഗ്രന്ഥങ്ങളെഴുതാൻ മത്സരിക്കുകയാണ്​ പല പ്രമുഖ പത്രപ്രവർത്തകരും. മോദിയുടെ പ്രഭാവം കുറഞ്ഞുകൊണ്ടിരുന്നാൽ യോഗി പ്രധാനമന്ത്രി സ്​ഥാനാർഥിയാകുമെന്ന ദീർഘവീക്ഷണത്തോടെയാണ്​ പലരുടെയും യോഗീമാഹാത്​മ്യം. യോഗി​യുടെ ബൃഹത്തായ ജീവചരിത്രം തന്നെ രണ്ടിലേറെയായി. മുഖ്യമന്ത്രി പദത്തിലേറുേമ്പാൾ ഒരു ഡസനിലേറെ ക്രിമിനൽ കേസുകളിൽ പ്രതിയായ യോഗിയെ ‘കാവി സോഷ്യലിസ്​റ്റ്’ ആയി പരിചയപ്പെടുത്തുന്നതാണ്​ അവയി​ലൊന്ന്​.

അധോലോകമോ ഭരണകൂടമോ? 
കൊല്ലുന്നത്​ ക്രിമിനലുകളെയാണെങ്കിൽ അതിന്​ നിയമവും സംവിധാനവുമുള്ള രാജ്യത്താണ്​ നാം ജീവിക്കുന്നത്​. കണ്ണിൽ കാണുന്നവനെയെല്ലാം വെടിവെച്ചിടാൻ ആയുധം കൊടുത്തുവിട്ട്​ രാജ്യം ക്രിമിനൽ മുക്​തമാക്കുന്ന പൊലീസി​​​െൻറ ഗുണ്ടാരാജിന്​ ഭരണഘടന അനുവാദം നൽകുന്നില്ല. പ്രതിപക്ഷകക്ഷികൾ കടുത്ത പ്രതിഷേധവുമായി രംഗത്തിറങ്ങിയപ്പോൾ ഏകപക്ഷീയമായ ഇൗ പൊലീസ്​ കൊലകളുമായി താൻ മുന്നോട്ടുപോകുമെന്നാണ്​ നിരവധി ക്രിമിനൽ കേസുകളിലെ പ്രതിയായ യോഗി നിയമസഭക്കുള്ളിൽപോലും പ്രഖ്യാപിച്ചത്​. മീറത്തിലും ആഗ്രയിലും ബറേലിയിലും കാൺപൂരിലും തുടങ്ങി ഉത്തർപ്രദേശ്​ നഗരങ്ങളിലെയൊക്കെ ക്രിമിനലുകളെയും ഗുണ്ടാ തലവന്മാരെയുമാണ്​ ത​​​െൻറ പൊലീസ്​ നടത്തുന്ന ഏറ്റ​ുമുട്ടലുകളിൽ കൊല്ലപ്പെടുന്നതെന്നും യോഗി ആണയിടുന്നു. ഒന്നുകിൽ പൊലീസി​​​െൻറ വെടിയുണ്ട ഏറ്റുവാങ്ങുക അല്ലെങ്കിൽ അവർ ഉത്തർപ്രദേശ്​ വിട്ടുപോകുക എന്ന രണ്ടിലൊരു വഴി തെരഞ്ഞെടുക്കാൻ മുന്നറിയിപ്പും നൽകുന്നു. 

​എന്നാൽ, ഏറ്റുമുട്ടലി​​​െൻറ മാനദണ്ഡം ഗുണ്ടാപ്രവർത്തനങ്ങ​െളക്കാളും ക്രിമിനൽ പശ്ചാത്തല​െത്തക്കാളും മതവും ജാതിയുമാണെന്നുതന്നെയാണ് കൊല്ലപ്പെട്ടവരുടെയും പരിക്കേറ്റവരുടെയും പട്ടിക പറയുന്നത്​​. ​വ്യാജ ഏറ്റുമുട്ടലുകൾക്കിരയായവരിൽ ഏറിയ പങ്കും ശാംലി, മുസഫർ നഗർ, സഹാറൻപൂർ, ബാഗ്​പത്​ ജില്ലകളിൽ നിന്നുള്ള മുസ്​ലിംകളും ദലിതുകളും മറ്റു പിന്നാക്ക വിഭാഗങ്ങളുമാണ്​. എന്നാൽ, അത്തരം വസ്​തുതകൾക്കുമേൽ മൂടുപടമിട്ട്​ രാജ്യത്തുതന്നെ ഏറ്റവും കൂടുതൽ ക്രിമിനൽ ​േകസുകളുള്ള ഒരു മുഖ്യമന്ത്രിയെ ക്രിമിനലുക​ളുടെ പേടിസ്വപ്​നമാക്കി പുനരവതരിപ്പിച്ചുകൊണ്ടിരിക്കുകയാണ്​ മാധ്യമങ്ങൾ. ഭരണകൂട സംവിധാനങ്ങളുപയോഗിച്ചും അല്ലാതെയും തങ്ങൾ വേട്ടയാടുകയും കൊലപ്പെടുത്തുകയും ചെയ്യുന്നവരെല്ലാം ക്രിമിനലുകളാണെന്ന പൊതുബോധം സ്വന്തം വരുതിയിലാക്കിയ മാധ്യമപ്രവർത്തകരെ ഉപയോഗിച്ച്​ സൃഷ്​ടിച്ചെടുക്കുകയാണ്​ സംഘ്​പരിവാർ ഉത്തർപ്രദേശിലെ കൊലനിലങ്ങളിലും ഇപ്പോൾ ചെയ്യുന്നത്​. 

ഭീകരവേട്ടയും ​ക്രിമിനൽ വേട്ടയും
പൊതുവിചാരണയിൽ ജൂറിയായി പങ്കെടുത്ത അഡ്വ. ഇന്ദിര ജയ്സിങ്​ സൊഹ്റാബുദ്ദീൻ ശൈഖ് കേസ് അടക്കമുള്ള വ്യാജ ഏറ്റുമുട്ടൽ കേസുകളിലേക്ക്​ ശ്രദ്ധ ക്ഷണിച്ചത്​ ഇൗ വ്യാജ ഏറ്റുമുട്ടലുകളെ ഇതുവരെ രാജ്യത്ത്​ സംഘ്​പരിവാർ നടത്തിയ സമാന ഏറ്റുമുട്ടലുകളുടെ തുടർച്ചയായി കാണണമെന്ന​ ആവശ്യത്തോടെയായിരുന്നു. ഒരു വ്യാജ ഏറ്റുമുട്ടലിന്​ ദൃക്​സാക്ഷിയായതു​കൊണ്ട്​ മാത്രം മറ്റൊരു വ്യാജ ഏറ്റുമുട്ടലിൽ കൊല്ലപ്പെടേണ്ടിവന്ന ഗുജറാത്തിലെ ഹതഭാഗ്യനായ തുളസീറാം പ്രജാപതിയെ കുറിച്ചും ഇന്ദിര ജയ്​സിങ്​​ പറഞ്ഞു. മുസ്​ലിംകളെ ക്രിമിനൽ പിശാചുക്കളാക്കി നിരന്തരം ചിത്രീകരിച്ചുകൊണ്ടായിരുന്നു വ്യാജ ഏറ്റുമുട്ടലുകൾക്കു മുമ്പെ നടന്ന വംശഹത്യ ആളിക്കത്തിച്ചത്. കൊല്ലിനും കൊലക്കുമുള്ള ന്യായീകരണമാണ്​ ക്രിമിനൽവത്​കരണമെന്നത്​ ഒന്നാന്തരം ഉദാഹരണവും സംഘ്​പരിവാറി​​​െൻറ മാതൃകാ സംസ്​ഥാനമായ ഗുജറാത്തു തന്നെയാണ്​. മുസ്​ലിംകളെ ക്രിമിനലുകളാക്കി അപരവത്​കരിച്ചാണ്​ ഗുജറാത്ത്​ വംശഹത്യ ഫലപ്രദമായി സംഘ്​പരിവാർ നടപ്പാക്കിയത്​. ഗുജറാത്ത്​ നഗരങ്ങളിലെ മുസ്​ലിം ക്രിമിനലുകളെ അവസാനിപ്പിച്ചത്​ വംശഹത്യയുടെ നേട്ടമായി ഇപ്പോഴും പരസ്യമായി പറയുന്ന ഗുജറാത്തികളെ കാണാം. 

ഏറ്റുമുട്ടലുകളുടെ കേരളാനുഭവങ്ങൾ 
കേന്ദ്ര ആഭ്യന്തര മന്ത്രാലയത്തി​​​െൻറ കണക്കിൽ സമീപകാലത്ത് കേരളത്തിൽ നടന്ന പ്രമാദമായ ഏറ്റുമുട്ടൽ മലപ്പുറ​ത്തെ നിലമ്പൂരിലേതായിരുന്നു. യഥാർഥമെന്ന്​ സർക്കാർ പറയു​േമ്പാഴും വ്യാജനെന്ന്​ സംസ്​ഥാനത്തെ നല്ലൊരുവിഭാഗം വിശ്വസിക്കുന്ന ഇൗ ഏറ്റുമുട്ടലാണ്​ മലപ്പുറം ജില്ലയെ രാജ്യത്തെ ഏറ്റവും വലിയ നക്​സൽ ഭീഷണിയുള്ള ജില്ലയായി പ്രഖ്യാപിക്കണമെന്ന സംസ്​ഥാനത്തെ ഇടതുപക്ഷ സർക്കാറി​​​െൻറ അപേക്ഷക്ക്​ കേന്ദ്ര സർക്കാറിന്​ മുമ്പിലെ പ്രധാന തെളിവായി മാറിയത്​. നക്​സൽ വേട്ടയുടെ പേരിൽ പൊലീസ്​ സേനക്ക്​ കിട്ടുന്ന ഫണ്ട്​ ഇൗ ജില്ലയിൽ ഉപയോഗിക്കാനാണ്​ സാധാരണഗതിയിൽ സംസ്​ഥാന സർക്കാറ​ുകൾ ഇത്തരമൊരു അപേക്ഷ നൽകുന്നത്​. മലപ്പുറത്തെ  മാ​ത്രം രൂക്ഷമായ നക്​സൽ ഭീഷണിയുള്ള ജില്ലയാക്കുന്നത്​ മോശമ​േല്ല എന്നുകരുതിയാകണം, കാണിക്കാൻ ഏറ്റുമുട്ടലൊന്നുമില്ലെങ്കിലും മാവോയിസ്​റ്റുകളുടെ ആളനക്കങ്ങൾ പതിവാണെന്ന കാരണം കാണിച്ച്​ പാലക്കാടി​െനയും കേരള സർക്കാർ കൂടെ ചേർത്തത്​.  

കേരളത്തിലെ ഏതാനും മുസ്​ലിം ചെറുപ്പക്കാർ കൊല്ലപ്പെട്ട കശ്​മീരിലെ കുപ്​വാരയിൽ നടന്നുവെന്ന്​ പറയുന്ന ഒരു ഏറ്റുമുട്ടലാണ്​ നിലമ്പൂരിലേത്​ കഴിഞ്ഞാൽ കേരള പൊലീസ്​ ആഘോഷിച്ചത്​. കേരളത്തിൽ നിന്ന്​ ഹൈദരാബാദിലേക്ക്​ ആത്മീയ തീർഥയാത്ര നടത്തിയ അവരെ ആരൊക്കെയോ ചേർന്ന്​ പാകിസ്താൻ അതിർത്തി കടത്താനായി കശ്​മീരിലേക്ക്​ ഡൽഹി വഴി കൊണ്ടുപോയ കേസാണ്​ കശ്​മീർ തീവ്രവാദ കേസായി കേരളം മുഴുവൻ ചർച്ച ചെയ്​ത ഇൗ ഏറ്റുമുട്ടൽ. പൊലീസ്​ഭാഷ്യമല്ലാതെ ഇൗ ഏറ്റുമുട്ടലി​െനക്കുറിച്ച്​ മറ്റൊന്നും കേട്ടിട്ടില്ല. ആടുമേയ്​ക്കലും ​െഎസിസുമൊക്കെയായി തീവ്രവാദ കഥകൾ രൂപപ്പെടുന്നതിനും മുമ്പ്​ കേരളത്തിലെ മുസ്​ലിം ചെറുപ്പക്കാർ ഭീകരവാദത്തിലേക്ക്​ ആകർഷിക്കപ്പെടുന്നുണ്ടെന്ന്​ കാണിക്കാൻ ഉയർത്തിക്കാണിച്ചത്​ ഇൗ ഏറ്റുമുട്ടൽ കേസായിരുന്നു. ആ കേസിനുപിറകെ കേരളത്തിലെ മുസ്​ലിംകളെ മുഖ്യധാരയിൽനിന്ന്​ അന്യവത്​കരിക്കുന്ന തരത്തിലുള്ള നിരവധി വിവാദ കേസുകളുടെ പരമ്പര തന്നെയുണ്ടായി. അതിനു​ശേഷമാണ്​ കേരള മുസ്​ലിംകളെ, അവരുടെ ജനവാസ മേഖലകളെ, മത വിദ്യാഭ്യാസസ്ഥാപനങ്ങളെ, മതനേതാക്കളെ അന്യവത്​കരിക്കുന്ന തരത്തിൽ മലയാള മാധ്യമങ്ങളിൽ നിരന്തരം വാർത്തകളിറങ്ങിത്തുടങ്ങുന്നത്​. ഉത്തരേന്ത്യയിലും മ​േധ്യന്ത്യയിലും മുസ്​ലിംകൾ സാമ്പത്തികമായും വിദ്യാഭ്യാസപരമായും ശക്​തിയാർജിച്ച ജാമിഅ നഗർ, അഅ്​സംഗഢ്​​, ദർഭംഗ, മാലേഗാവ്​, ഭട്​കൽ തുടങ്ങിയ പ്രദേശങ്ങളെ ക്രിമിനൽവത്​കരിച്ച്​ ഉത്തരേന്ത്യൻ മാധ്യമങ്ങൾ പടച്ചുവിട്ട വാർത്തകളെ ഒാർമിപ്പിക്കുന്ന തരത്തിലുള്ളതായിരുന്നു അതിൽ പലതും. 

ഉത്തരേന്ത്യയിൽ പൊലീസി​​​െൻറ വ്യാജ ഏറ്റുമുട്ടലുകൾക്കുശേഷം ന്യായീകരണവാർത്തകളുമായി മാധ്യമങ്ങളിറങ്ങുകയാണെങ്കിൽ കേരളത്തിൽ അത്​ മറിച്ചാണ്​. വ്യാജ വാർത്തകൾ ചമച്ച് മുസ്​ലിം സ്​ഥാപനങ്ങളുമായും വ്യക്​തികളുമായും നിരന്തരം ഏറ്റുമുട്ടലുകൾക്ക്​ മാധ്യമങ്ങൾ തുടക്കമിടുകയും  അവർ നടത്തുന്ന വ്യാജ ഏറ്റുമുട്ടലുകളുടെ തുടർനടപടിയെന്ന നിലയിൽ കേസുകളും നിയമ നടപടികളുമായി പൊലീസ്​ മുന്നോട്ടുപോകുകയും ചെയ്യുന്ന സാഹചര്യമാണുള്ളത്​​. സൃഷ്​ടിച്ച വ്യാജ വാർത്തകൾക്കുപിറകെ വന്ന കേസുകളുടെ ഗതിവേഗം കണ്ടാലറിയാം ഇവക്കു പിന്നിലുള്ള ബോധപൂർവമായ അജണ്ടകളും കരുനീക്കങ്ങളും. അത്തരമൊരു നീക്കത്തി​​​െൻറ ഏറ്റവും മനുഷ്യത്വരഹിതമായ ഉദാഹരണമാണ്​ സുപ്രീംകോടതി വരെയെത്തി സങ്കീർണമായി നിൽക്കുന്ന യതീംഖാന വിവാദം. കേരളത്തിൽ മുസ്​ലിംസമുദായം തുടക്കമിട്ട, അനാഥകളെ സംരക്ഷിക്കുന്ന യതീംഖാന പ്രസ്ഥാനത്തെ മനുഷ്യക്കടത്താക്കി ചിത്രീകരിച്ച്​ മലയാള മാധ്യമങ്ങൾ കേസെടുപ്പിച്ചതുമൂലം കേരളത്തിലെ യതീംഖാനകൾ അടച്ചുപൂട്ടേണ്ടതുണ്ടോ എന്ന കാര്യം ഏതാനും ദിവസങ്ങൾക്കകം സുപ്രീം കോടതി തീരുമാനിക്കാനിരിക്കുകയാണ്. ജാമിഅനഗറും അഅ്​സംഗഢും ദർഭംഗയും ഭട്കലും കഴിഞ്ഞാൽ സംഘ്പരിവാറിനും അവർ പരിശീലിപ്പിച്ചെടുത്ത ഏജൻസികൾക്കും കണ്ണിലെ കരടായി പിന്നെയുള്ളത് ശാക്​തീകരിക്കപ്പെട്ട മുസ്​ലിംകളുള്ള കേരളമാണ്​. അതുംകൂടി ക്രിമിനൽവത്​കരിക്കപ്പെടുന്നതു​വരെ മലയാള മാധ്യമങ്ങളുടെ ഇൗ വ്യാജ ഏറ്റുമുട്ടലുകളും തുടരാനാണ്​ സാധ്യത.

കേരളത്തിൽ ഇതുവരെയായി മാധ്യമങ്ങളുണ്ടാക്കിയ അപകടകരമായ  പ്രോപഗാൻഡകളും അവയുണ്ടാക്കിയ പ്രത്യാഘാതങ്ങളും ഒരു സോഷ്യൽ ഓഡിറ്റിന് വിധേയമാക്കേണ്ട കാലം അതിക്രമിച്ചിരിക്കുന്നു. ആ പ്രോപഗാൻഡകൾക്ക്​ ഇരകളാക്കപ്പെട്ട പല ചെറുപ്പക്കാരും ഭീകരകുറ്റങ്ങൾ ചുമത്തപ്പെട്ട് കേരളത്തിൽ മാത്രമല്ല അന്യസംസ്ഥാനങ്ങളിലെയും ജയിലുകളിൽ മോചനത്തി​​​െൻറ നേരിയ പ്രതീക്ഷ പോലുമില്ലാതെ ജീവിതം ഹോമിച്ചുകൊണ്ടിരിക്കു​േമ്പാൾ വിശേഷിച്ചും.