ആദ്യം അടിച്ചു പരത്തി, പിന്നെ എറിഞ്ഞിട്ടു; ഡൽഹിയെ അനായാസം കടന്ന്​ മുംബൈ ഫൈനലിൽ

ദുബൈ: 'ട്വിസ്​റ്റുകൾ' കാത്തിരുന്നതൊക്കെ വെറുതെയായി. ഡൽഹിയെ 'കണ്ടം വഴി ഓടിച്ച്​' മുംബൈ ഇന്ത്യൻസ്​ ഐ.പി.എൽ കലാശപ്പോരിന്​. ഫൈനൽ ടിക്കറ്റിനായുള്ള നിർണായക മത്സരത്തിൽ അറേബ്യൻ മണലാരുണ്യത്തെ സാക്ഷിയാക്കി സിക്​സർ മഴപെയ്യിച്ച്​ നീലപ്പട തകർത്താടിയപ്പോൾ, പൊരുതിപോലും നോക്കാതെ തലസ്​ഥാന ടീം തോൽവി സമ്മതിച്ചു. ഒന്നാം ക്വാളിഫയർ പോരാട്ടത്തിൽ ഡൽഹി ക്യാപിറ്റൽസിനെ 57 റൺസിന്​ തോൽപിച്ചാണ്​​ മുംബൈ ഇന്ത്യൻസ്​ തുടർച്ചയായ രണ്ടാം സീസണിലും കലാശ​കൊട്ടിലേക്ക്​ ചേക്കേറിയത്​. സ്​കോർ: മുംബൈ ഇന്ത്യൻസ്​ 200/5, ഡൽഹി ക്യാപിറ്റൽസ്​ 143/8.

നായകനും സഹനായകനും പൂജ്യത്തിന്​ പുറത്തായപ്പോൾ സഹപടയാളികൾ തോളിലേറ്റിയാണ്​ മുംബൈയെ വൻ ജയ​ത്തിലേക്ക്​ എത്തിച്ചത്​. നാലു വിക്കറ്റ്​ വീഴ്​ത്തിയ ജസ്​പ്രീത്​ ബുംറയാണ്​ ഡൽഹിയുടെ നടുവൊടിച്ചത്​.

സൂപ്പർ പോരാട്ടത്തിൽ ഡൽഹിക്കെതിരെ ടോസ്​ നഷ്​ടപ്പെട്ട്​ ബാറ്റിങ്ങിനിറങ്ങിയ മുംബൈക്കായി ഓപണർ ഡികോക്കും(40) സൂര്യകുമാർ യാദവും(51), ഇഷൻ കിഷനും(55*), ഹാദിക്​ പാണ്ഡ്യയും(37) തിളങ്ങിയപ്പോൾ നിശ്ചിത ഓവറിൽ അഞ്ചു വിക്കറ്റ്​ നഷ്​ടത്തിൽ മുംബൈ ഇന്ത്യൻസ്​ 200 റൺസ്​ എടുത്തു. കൂറ്റൻ സ്​കോറിന്​ മുന്നിൽ തുടക്കം മുതലെ പതറിയ ഡൽഹി തോൽവി ചോദിച്ചുവാങ്ങുകയായിരുന്നു.

പൃഥ്വി ഷായെയും ശിക്കർ ധവാനെയും അജിൻക്യ രഹാനയെയും പൂജ്യത്തിന്​ പുറത്താക്കി ബോൾട്ടും ബുംറയും മികച്ച തുടക്കം നൽകിയപ്പോൾ തന്നെ ഡൽഹി തോൽവി ഉറപ്പിച്ചിരുന്നു​. എത്ര റൺസിന്​ തോൽക്കുമെന്നത്​ മാത്രമാണ്​ പിന്നീടുണ്ടായിരുന്ന ചോദ്യം. അതിനിടക്ക്​ മാർക്കസ്​ സ്​റ്റോയിൻസും(65) അക്​സർ പ​ട്ടേലും (42) പിടിച്ചു നിന്നതിനാലാണ്​ ഡൽഹി വമ്പൻ തോൽവി ഒഴിവാക്കിയത്​. ക്യാപ്​റ്റൻ ശ്രേയസ്​ അയ്യറും(12) പന്തും(3) മലപോലെ വന്ന്​ എലിയായി മടങ്ങി.

ചെറിയ സ്​കോറിന്​ മുംബൈയെ ഒതുക്കാമായിരുന്ന മത്സരത്തിൽ ഡൽഹി ബൗളർമാർക്ക്​ അവസാന നിമിഷം ട്രാക്ക്​ തെറ്റിയതോടെയാണ്​ 200 എന്ന മാജിക്​ സ്​കോറിലേക്ക്​ മുൻ ചാമ്പ്യന്മാർ എത്തിയത്​.

ക്യാപ്​റ്റൻ രോഹിത്​ ശർമയെയും കീറോൺ പൊള്ളാഡിനെയും പൂജ്യത്തിന്​ പുറത്താക്കിയപ്പോൾ ഡൽഹി ക്യാപിറ്റൽസ്​ കളി കൈക്കലാക്കി​െയന്ന്​ പ്രതീക്ഷിച്ചതാണ്​.

എന്നാൽ നാലു പേരുടെ ഇന്നിങ്​സുകൾ മുംബൈയെ കൂറ്റൻ സ്​കോറിലേക്ക്​ എത്തിച്ചു​. 25 പന്തിൽ 40 റൺസുമായി തുടക്കം ഗംഭീരമാക്കിയ ഡികോക്ക്​, ശ്രദ്ധിച്ചു കളിച്ച്​ സ്​കോർ ഉയർത്തിയ സൂര്യകുമാർ യാദവ് ​(38 പന്തിൽ 51), അവസാനം എത്തി ആളിക്കത്തിച്ച ഇഷൻ കിഷനും(30 പന്തിൽ 55), ഹാർദിക്​ പാണ്ഡ്യയും(14 പന്തിൽ 37)- എല്ലാം ഒത്തു വന്നതോടെയാണ്​ മുംബൈ ഇന്ത്യൻസ്​ സ്​കോർ 200 എന്ന മാജിക്​ നമ്പറിലേക്ക്​ എത്തിച്ചത്​.