മുംബൈ: സയ്യിദ് മുഷ്താഖ് അലി ട്രോഫി ക്രിക്കറ്റിൽ കേരളം ഒഡിഷയെ 50 റൺസിന് തോൽപ്പിച്ചു. കേരളത്തിന്‍റെ തുടർച്ചയായ ആറാം ജയമാണിത്. ക്യാപ്റ്റൻ സഞ്ജു സാംസൺ പുറത്താകാതെ 55 റൺസെടുത്തു. ജലജ് സക്സേന അഞ്ചും ശ്രേയസ് ഗോപാൽ നാലും വിക്കറ്റ് വീഴ്ത്തി.
ആദ്യം ബാറ്റ് ചെയ്ത കേരളം 20 ഓവറിൽ നാല് വിക്കറ്റിന് 183 റൺസാണെടുത്തത്. 31 പന്തിൽ നാല് വീതം ഫോറും സിക്സും പറത്തിയാണ് സഞ്ജു 55 റൺസെടുത്തത്. വരുൺ നായനാർ (48), വിഷ്ണു വിനോദ് (35) എന്നിവരും മികച്ച പ്രകടനം നടത്തി. കഴിഞ്ഞ മത്സരത്തിലെ സെഞ്ച്വറിക്കാരൻ രോഹൻ കുന്നുമ്മൽ 16 റൺസെടുത്ത് പുറത്തായി.
തകർച്ചയോടെയായിരുന്നു ഒഡിഷയുടെ തുടക്കം. പിന്നീട് കൃത്യമായ ഇടവേളകളിൽ കേരളം വിക്കറ്റുകൾ വീഴ്ത്തിയതോടെ ഒഡിഷ ഇന്നിങ്സ് 18.1 ഓവറിൽ 133 റൺസിൽ അവസാനിച്ചു. നാല് ഒഡിഷ ബാറ്റർമാർ റണ്ണൊന്നുമെടുക്കാതെ പുറത്തായി.
കഴിഞ്ഞ മത്സരത്തിൽ സിക്കിമിനെതിരെ കേരളം 132 റൺസിന്‍റെ കൂറ്റൻ ജയം നേടിയിരുന്നു. ഗ്രൂപ്പ് ബിയിൽ ആറ് മത്സരങ്ങളും ജയിച്ച് 24 പോയിന്‍റോടെ ഒന്നാമതാണ് കേരളം.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.