ഫ്ളോറിഡ: അമേരിക്കൻ മേജർ സോക്കർ ലീഗ് (എം.എൽ.എസ്) പ്ലേ ഓഫിൽ അറ്റ്ലാന്റ യുണൈറ്റഡിനെ തകർത്ത് വിജയത്തുടക്കവുമായി ഇന്റർ മയാമി. ഹോം ഗ്രൗണ്ടിൽ ഒന്നിനെതിരെ രണ്ട് ഗോൾ വിജയത്തോടെയാണ് മയാമി പ്ലേ ഓഫ് റണ്ണിന് തുടക്കമിട്ടത്. സൂപ്പർ താരം ലയണൽ മെസ്സിക്ക് ഗോൾ നേടാനായില്ലെങ്കിലും വിജയ ഗോളിന് അവസരമൊരുക്കി. ലൂയിസ് സുവാരസും ജോർഡി ആൽബയുമാണ് മയാമിക്കായി ഗോൾവല കുലുക്കിയത്.
മത്സരത്തിന്റെ തുടക്കം മുതൽ ഇരു ടീമുകളും ആക്രമിച്ചു കളിച്ചു. രണ്ടാം മിനിറ്റിൽ ഡേവിഡ് ഗോമസ് നൽകിയ പാസ് മുതലാക്കി സുവാരസ് തകർപ്പൻ ഗോളിലൂടെ മയാമിയെ മുന്നിലെത്തിച്ചു. 39-ാം മിനിറ്റിൽ അറ്റ്‌ലാൻ്റ തിരിച്ചടിച്ചു. അമഡോറിൻ്റെ അസിസ്റ്റിൽ സാബ ലോബ്‌ഷാനിഡ്‌സെ ആണ് വലകുലുക്കിയത്.
പ്രത്യാക്രമണവുമായി മയാമി കളം നിറഞ്ഞെങ്കിലും ഹാഫ് ടൈമിൽ മറ്റൊരു ഗോൾ പിറന്നില്ല. ഇതോടെ ആദ്യ പകുതി സമനിലയിൽ അവസാനിച്ചു. 60-ാം മിനിറ്റിൽ നിയന്ത്രണം വീണ്ടെടുത്ത മയാമി, ജോർഡി ആൽബയുടെ ഗോളിലൂടെ ലീഡ് നേടി. മെസ്സിയുടെ അസിസ്റ്റിലാണ് ഈ ഗോൾ പിറന്നത്. തിരിച്ചടിക്കാനുള്ള അറ്റലാന്റയുടെ ശ്രമങ്ങൾ മയാമി പ്രതിരോധം കടന്ന് ഗോൾ വല ഭേദിക്കാനായില്ല. ജയത്തോടെ മയാമി പ്ലേ ഓഫ് സീരീസിൽ 1-0 ന് മുന്നിലെത്തി.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.