ലണ്ടൻ: തോൽവികളിൽനിന്ന് തോൽവികളിലേക്ക് കൂപ്പുകുത്തി പരിഹാസ്യരാകുന്നതിനിടയിൽ വമ്പന്മാരെ മലർത്തിയടിച്ച് വിജയവഴിയിൽ തിരിച്ചെത്തി മാഞ്ചസ്റ്റർ യുനൈറ്റഡ്. കരുത്തരായ ലിവർപൂളിനെ ഒന്നിനെതിരെ രണ്ടുഗോളുകൾക്കാണ് യുനൈറ്റഡ് പരാജയപ്പെടുത്തിയത്.
ദുർബലരായ ബ്രൈറ്റണിനും ബ്രെന്റ്ഫോർഡിനുമെതിരെ ആദ്യ രണ്ടു മത്സരങ്ങളും ദയനീയമായി തോറ്റ യുനൈറ്റഡിന്റെ ഇംഗ്ലീഷ് പ്രീമിയർ ലീഗ് സീസണിലെ ആദ്യ ജയമാണിത്. ലിവർപൂൾ ആദ്യ രണ്ടുകളികളിൽ സമനിലയിൽ കുരുങ്ങുകയായിരുന്നു. യുനൈറ്റഡിന് മൂന്നും ലിവർപൂളിന് രണ്ടും പോയന്റാണ് സമ്പാദ്യം.
ഇരുപകുതികളിലായി ജാഡൻ സാഞ്ചോയും മാർക്കസ് റാഷ്ഫോർഡും നേടിയ ഗോളുകളാണ് നിർണായകഘട്ടത്തിൽ യുനൈറ്റഡിന് കനത്ത ആത്മവിശ്വാസം നൽകുന്ന ജയം സമ്മാനിച്ചത്. 82-ാം മിനിറ്റിൽ മുഹമ്മദ് സലാഹിന്റെ വകയായിരുന്നു ലിവർപൂളിന്റെ ആശ്വാസഗോൾ. സ്വന്തം തട്ടകത്തിൽ സ്റ്റാർ സ്ട്രൈക്കർ ക്രിസ്റ്റ്യാനോ റൊണാൾഡോയെയും ടീം ക്യാപ്റ്റൻ ഹാരി മഗ്വയറെയും ബെഞ്ചിലിരുത്തിയാണ് മാഞ്ചസ്റ്റർ യുനൈറ്റഡ് കോച്ച് എറിക് ടെൻ ഹാഗ് തന്ത്രം മെനഞ്ഞത്.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.