കോഴിക്കോട്: സന്തോഷ് ട്രോഫി ഫുട്ബാളിൽ കേരളത്തിന് തുടർച്ചയായ രണ്ടാം ജയം. ഇ.എം.എസ് കോർപറേഷൻ സ്റ്റേഡിയത്തിൽ നടന്ന ഗ്രൂപ്പ് രണ്ടിലെ പോരാട്ടത്തിൽ ഒന്നിനെതിരെ നാല് ഗോളുകൾക്ക് ബിഹാറിനെയാണ് തോൽപിച്ചത്. നിജോ ഗിൽബർട്ട് ഇരട്ട ഗോൾ നേടിയപ്പോൾ വിശാഖ്, അബ്ദുറഹീം എന്നിവർ ഓരോ ഗോൾ നേടി. മത്സരത്തിന്റെ ആദ്യ പകുതിയിൽ ആതിഥേയർ 2-0ത്തിന് മുന്നിലായിരുന്നു. ജയത്തോടെ രണ്ട് കളിയിൽ കേരളത്തിന് ആറ് പോയന്റായി. കഴിഞ്ഞ മത്സരത്തിൽ രാജസ്ഥാനെ എതിരില്ലാത്ത ഏഴ് ഗോളിനാണ് തകർത്തത്. നിലവിൽ രണ്ട് കളിയിൽ ആറ് പോയന്റോടെ ഗ്രൂപ്പിൽ ഒന്നാം സ്ഥാനത്താണ് കേരളം.
രാവിലെ നടന്ന മത്സരത്തിൽ മിസോറം ജമ്മു കാശ്മീരിനെ രണ്ടിനെതിരെ മൂന്ന് ഗോളുകൾക്ക് തോൽപിച്ചിരുന്നു. ആദ്യ പകുതിയിൽ ഇരുടീമും ഓരോ ഗോൾ വീതമാണ് അടിച്ചിരുന്നത്. 57ാം മിനിറ്റിൽ ലഭിച്ച പെനാൽറ്റിയിലൂടെ ജമ്മു കശ്മീർ മുന്നിലെത്തി. എന്നാൽ, കളി തീരാൻ പത്തു മിനിറ്റ് ശേഷിക്കെ പ്രതിരോധത്തിലേക്ക് മാറിയ ജമ്മു കശ്മീരിനെ ഞെട്ടിച്ച് മിസോറം രണ്ടു തവണ കൂടി പന്ത് വലയിലെത്തിക്കുകയായിരുന്നു. വെള്ളിയാഴ്ച വൈകീട്ട് 3.30ന് രാജസ്ഥാനും ആന്ധ്രപ്രദേശും ഏറ്റുമുട്ടും.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.