ലാലിഗയിൽ ബാഴ്​സലോണക്ക്​ കിരീടം; പക്ഷേ മെസ്സിയുടെ ടീമിനല്ല

മഡ്രിഡ്​: ലാ ലിഗയിൽ ബാഴ്​സലോണക്ക്​ കിരീടം. പുരുഷൻമാരുടെയല്ല മറിച്ച്​ കോവിഡ് വ്യാപനത്തെത്തുടര്‍ന്ന് നിര്‍ത്തിവെച്ച വനിതാ ലാ ലിഗയിലാണ്​ ബാഴ്​സലോണയെ ചാമ്പ്യൻമാരായി പ്രഖ്യാപിച്ചത്​. മഹാമാരിയുടെ പശ്ചാത്തലത്തിൽ രാജ്യത്തെ എല്ലാ നോൺ- പ്രഫഷനൽ ഫുട്​ബാൾ ചാമ്പ്യൻഷിപ്പുകളും റദ്ദാക്കാൻ ദേശീയ സോക്കർ ഫെഡറേഷൻ എക്​സിക്യൂട്ടീവ്​ കമ്മിറ്റി തീരുമാനിച്ചതിനെത്തുടർന്ന്​​ ഒമ്പത്​ മത്സരങ്ങൾ ശേഷിക്കേ പോയിൻറ്​ പട്ടികയിൽ ഒന്നാം സ്ഥാനക്കാരായ ബാഴ്​സയെ വിജയികളായി പ്രഖ്യാപിക്കുകയായിരുന്നു. 

സീസണില്‍ 21 മത്സരം കളിച്ച ബാഴ്‌സ പെണ്‍പട അപരാജിതരായാണ്​ കിരീടത്തിലെത്തിയത്​. 19 വിജയവും രണ്ട് സമനിലയുമായാണ് ടീം തലപ്പത്തെത്തിയത്. മാർച്ചിൽ ലീഗ് നിര്‍ത്തിവെക്കുമ്പോള്‍ ബാഴ്​സക്ക്​ രണ്ടാം സ്ഥാനക്കാരായ അത്‌ലറ്റികോ മഡ്രിഡിനേക്കാൾ ഒമ്പത് പോയിൻറ്​ ലീഡുണ്ട്​. 2015ന് ശേഷം ഇതാദ്യമായാണ് ബാഴ്‌സലോണയുടെ വനിതാ ടീം ലീഗ് ചാമ്പ്യന്മാരാകുന്നത്.കഴിഞ്ഞ മുന്ന്​ തവണയും അത്​ലറ്റി​േകാ മഡ്രിഡായിരുന്നു ചാമ്പ്യൻമാർ.  

ബാഴ്​സക്കൊപ്പം അത്​ലറ്റികോ ചാമ്പ്യൻസ്​ ലീഗ്​ ബർത്ത്​ സ്വന്തമാക്കി. വനിത ലീഗിലും പുരുഷൻമാരുടെ രണ്ട്​, മൂന്ന്​ ഡിവിഷനുകളിലും തരംതാഴ്​ത്തലുണ്ടാവില്ലെന്നും കമ്മിറ്റി വ്യക്​തമാക്കി. കാഴ്​ചക്കാരില്ലാതെ പ്ലേഓഫ്​ മത്സരങ്ങൾ കളിച്ചാകും വനിത ലീഗിലേക്കും പുരുഷ രണ്ടാം ഡിവിഷൻ ലീഗിലേക്കും സ്​ഥാനക്കയറ്റം ലഭിക്കുന്ന ടീമുകളെ നിശ്ചയിക്കുക. 

കളി നിർത്തു​േമ്പാൾ തരംതാഴ്​ത്തൽ മേഖലയിലുണ്ടായിരുന്ന വലൻസിയയും എസ്​പാന്യോളും ഇതോടെ രക്ഷപെട്ടു. രണ്ടാം ഡിവിഷനിൽ നിന്നും രണ്ട്​ ടീമുകൾ സ്​ഥാനക്കയറ്റം നേടിവരുന്നതടക്കം 18 ടീമുകളായിരിക്കും അടുത്ത സീസണിൽ പന്തുതട്ടുക. സ്​പെയിനിലെ പ്രഫഷനൽ ലീഗുകളിൽ ജൂണിൽ പന്തുരുണ്ട്​ തുടങ്ങുമെന്നാണ്​ പ്രതീക്ഷ. രണ്ട്​ മാസത്തിന്​ ശേഷം നിരവധി ടീമുകൾ ആദ്യമായി വ്യക്​തിഗത പരിശീലനം പുനരാരംഭിച്ചിരുന്നു.