വാക്​സിനെതിരെ വ്യാജവാർത്ത; ഫേസ്​ബുക്ക്​ ഓഫീസിന്​ പുറത്ത്​ 'ബോഡി ബാഗുകൾ' നിരത്തി പ്രതിഷേധം

വാഷിങ്​ടൺ ഡി.സിയിലെ ഫേസ്​ബുക്ക്​ ഒാഫീസിന്​ മുന്നിൽ മൃതദേഹം പൊതിഞ്ഞുകൊണ്ടുപോവാൻ ഉപയോഗിക്കുന്ന ബാഗുകൾ നിരത്തിവെച്ച്​ ഒരു കൂട്ടം സാമൂഹിക പ്രവർത്തകരുടെ പ്രതിഷേധം. കോവിഡ്​ വാക്​സിനെതിരായ വ്യാജ വാർത്തകൾക്കെതിരെ ശക്​തമായ നടപടി സ്വീകരിക്കുന്നതിന്​ ഫേസ്​ബുക്കിനെ പ്രോത്സാഹിപ്പിക്കുന്നതിനായാണ് 'ദ റിയൽ ഫേസ്​ബുക്ക്​ ഒാവർസൈറ്റ്​ ബോർഡ്' എന്ന കൂട്ടായ്​മ 'ബോഡി ബാഗുകൾ'​ ഉപയോഗിച്ചുള്ള പ്രതിഷേധത്തിനിറങ്ങിയത്​. 'തെറ്റായ വിവരങ്ങൾ കൊല്ലും' എന്ന് ബോഡി ബാഗുകളിൽ​ വലിയ അക്ഷരത്തിൽ എഴുതിയിട്ടുമുണ്ട്​.

കോവിഡ്​ വാക്​സിനെതിരായ വ്യാജ വാർത്തകളും ഉൗഹാപോഹങ്ങളും വ്യാപകമായി പ്രചരിക്കപ്പെട്ടിട്ടും ഫേസ്​ബുക്ക്​ അടക്കമുള്ള സമൂഹ മാധ്യമ പ്ലാറ്റ്​ഫോമുകൾ അതിനെതിരെ ശക്​തമായ നടപടി സ്വീകരിക്കാത്തത്​ ​​അമേരിക്കൻ പ്രസിഡൻറായ ജോ ബൈഡനടക്കം ചോദ്യം ചെയ്​തിരുന്നു. അതിന്​​ പിന്നാലെയാണ് കോവിഡുമായി ബന്ധപ്പെട്ട തെറ്റായ വിവരങ്ങൾക്കെതിരെ​ വെത്യസ്​ത രീതിയിലുള്ള പ്രതിഷേധവുമായി റിയൽ ഫേസ്​ബുക്ക്​ ഒാവർസൈറ്റ്​ ബോർഡ്​ രംഗത്തെത്തിയത്​. പൗരാവകാശ നേതാക്കൾ, അധ്യാപകർ, അഭിഭാഷകർ തുടങ്ങിയ വിദഗ്​ധരുടെ കൂട്ടായ്​മയാണിത്​. അതേസമയം, കോവിഡ്​ വ്യാജ വാർത്തകളുമായി ബന്ധപ്പെട്ട തങ്ങളുടെ നിയമങ്ങൾ ലംഘിക്കുന്ന അക്കൗണ്ടുകൾ എന്നെന്നേക്കുമായി നിരോധിക്കുന്നുണ്ടെന്ന്​ ഫേസ്​ബുക്ക്​ അറിയിച്ചിട്ടുണ്ട്​.

കോവിഡ്​ 19നെ കുറിച്ചും വാക്​സിനുകളെ കുറിച്ചും ഫേസ്​ബുക്ക്​ പോലുള്ള സമൂഹമാധ്യമങ്ങളിൽ പ്രചരിക്കുന്ന തെറ്റായ വിവരങ്ങൾ ജനങ്ങളെ കൊന്നൊടുക്കുകയാണെന്നായിരുന്നു​ പ്രസിഡൻറ്​ ജോ ബൈഡൻ ​ദിവസങ്ങൾക്ക്​ മുമ്പ്​ തുറന്നടിച്ചത്​. 'അവർ ജനങ്ങളെ കൊന്നുകൊണ്ടിരിക്കുകയാണ്​. ഇപ്പോൾ മഹാമാരിയുടെ ഭീഷണിയുള്ളത്​ വാക്​സിനെടുക്കാത്തവരിൽ മാത്രമാണ്​. സമൂഹ മാധ്യമങ്ങളിലൂടെ പ്രചരിക്കുന്ന തെറ്റായ വിവരങ്ങളും വ്യാജ വാർത്തകളും കാരണമാണ്​ ജനങ്ങൾ വാക്​സിൻ സ്വീകരിക്കാൻ മടിക്കുന്നതെന്നും' അദ്ദേഹം​ ആരോപിച്ചിരുന്നു. അതേസമയം വ്യാജ പ്രചരണങ്ങളടങ്ങുന്ന പോസ്റ്റുകൾ നീക്കം ചെയ്യാനും ബൈഡൻ അന്ന്​ നിർദേശിക്കുകയുണ്ടായി​.