ഇലവീഴാപ്പൂഞ്ചിറയിൽനിന്നുള്ള ദൃശ്യം
കാഞ്ഞാർ: ഇഷ്ടലൊക്കേഷനായ ഇലവീഴാപ്പൂഞ്ചിറയിലേക്ക് സഞ്ചാരികളുടെ ഒഴുക്ക്. സമുദ്രനിരപ്പില്‍നിന്ന് 3200 അടി ഉയരത്തിൽ സ്ഥിതി ചെയ്യുന്ന വിനോദസഞ്ചാര കേന്ദ്രമാണിത്. പ്രകൃതിസൗന്ദര്യംകൊണ്ട് കേരളത്തിലെ ഏത് ടൂറിസ്റ്റ് കേന്ദ്രത്തോടും കിടപിടിക്കുമെങ്കിലും കാര്യമായി ജനശ്രദ്ധയില്‍ വന്നിട്ടില്ലാത്ത ഈ വിനോദസഞ്ചാര കേന്ദ്രം കോട്ടയം, ഇടുക്കി ജില്ലകളിലായിട്ടാണ് സ്ഥിതി ചെയ്യുന്നത്.
മരങ്ങള്‍ ഇല്ലാത്തതിനാല്‍ ഇവിടെ ഇലകള്‍ വീഴാറില്ല. അതിനാലാണ് ഈ പേര് ലഭിച്ചത്. താഴ്‌വരയിലെ തടാകത്തിലും ഇലകള്‍ വീഴാറില്ല. എപ്പോഴും നൂലുപെയ്യുന്നത് പോലെ മഴപെയ്തു നില്‍ക്കുന്ന പൂഞ്ചിറയുടെ താഴ്‌വരയെ കുടയത്തൂര്‍മല, തോണിപ്പാറ, മാങ്കുന്ന് എന്നീ മലകള്‍ ചുറ്റിനില്‍ക്കുന്നു.
ഏറെ പരിചിതമല്ലായിരുന്ന പൂഞ്ചിറ കൂടുതൽ സഞ്ചാരികളിലേക്കെത്തുന്നത് സൗബിൻ നായകനായ ഇലവീഴാപ്പൂഞ്ചിറ എന്ന സിനിമയിലൂടെയാണ്. തൊടുപുഴയില്‍നിന്ന് മുട്ടം-മേലുകാവ് വഴി 20 കിലോമീറ്റര്‍ യാത്ര ചെയ്താല്‍ ഇവിടെയെത്താം. കൂടാതെ കാഞ്ഞാറിൽനിന്ന് കൂവപ്പള്ളി-ചക്കിക്കാവ് വഴി ഒമ്പതു കിലോമീറ്റർ സഞ്ചരിച്ചും ഇലവീഴാപ്പൂഞ്ചിറയിൽ എത്തിപ്പെടാൻ കഴിയും. ഇവിടെനിന്ന് നോക്കിയാൽ ആലപ്പുഴ, ഇടുക്കി, കോട്ടയം, എറണാകുളമടക്കമുള്ള ജില്ലകളുടെ ദൃശ്യങ്ങളും കാണാം.
കോട്ടയം-ഇടുക്കി ജില്ലകളുടെ അതിർത്തിയിൽ സ്ഥിതി ചെയ്യുന്ന വിനോദസഞ്ചാര കേന്ദ്രമായ ഇലവീഴാപ്പൂഞ്ചിറയെ സംരക്ഷിക്കാനും പരിപോഷിപ്പിക്കാനും അധികൃതർ തയാറാകുന്നില്ലെന്ന ആക്ഷേപം ശക്തമാണ്. ഗതാഗത യോഗ്യമായ റോഡ് ഒരുക്കിയാൽ മാത്രം ആയിരക്കണക്കിന് വിനോദ സഞ്ചാരികളെ ആകർഷിക്കാൻ കഴിയും. റോഡ് തകർന്ന് കിടന്നിട്ടും ഓഫ് റോഡ് സവാരി നടത്തി നൂറുകണക്കിന് സഞ്ചാരികൾ പൂഞ്ചിറ കണ്ട് മടങ്ങുന്നുണ്ട്.
ഇലവീഴാപ്പൂഞ്ചിറക്കുള്ള റോഡിൽ 1.5 കിലോമീറ്റർ മാത്രമാണ് പൂർത്തിയാകാതെ അവശേഷിക്കുന്നത്. 11 കിലോമീറ്റർ ദൂരമുള്ള കാഞ്ഞാർ-കൂവപ്പള്ളി-ചക്കിക്കാവ്- ഇലവീഴാപ്പൂഞ്ചിറ-മേലുകാവ് റോഡിന്റെ അഞ്ചരകിലോമീറ്റർ ഏറെക്കാലമായി തകർന്ന് കിടക്കുകയായിരുന്നു. ഇതിൽ മാണി സി. കാപ്പൻ എം.എൽ.എ ഇടപെട്ട് കോട്ടയം ജില്ല അതിർത്തിയിൽ വരുന്ന റോഡ് ബി.എം ബി.സി നിലവാരത്തിൽ ടാർ ചെയ്ത് നവീകരിച്ചു. റോഡ് നന്നായതോടെ കൂടുതൽ പേർ എത്തി തുടങ്ങിയിട്ടുണ്ട്.
ഇടുക്കി ജില്ലയുടെ ഭാഗമായ ഇലവീഴാപ്പൂഞ്ചിറക്കുള്ള 1.5 കിലോമീറ്റർ റോഡാണ് ഇനി പൂർത്തിയാകാനുള്ളത്. റോഡ് പൊട്ടിപ്പൊളിഞ്ഞ് കിടക്കുന്നതിനാൽ ഇതുവഴി ഗതാഗതം ഏറെ ദുഷ്കരമാണ്. ഈ പ്രദേശത്തിന്റെ ടാറിങ് അടക്കമുള്ള കാര്യങ്ങൾ പൂർത്തിയാൽ ജില്ലയിൽ എത്തുന്ന വിനോദസഞ്ചാരികൾക്ക് വളരെ എളുപ്പത്തിൽ ഇലവീഴാപ്പൂഞ്ചിറയും കണ്ട് മടങ്ങാനാകും.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.