ഇസ്രായേലും ഹമാസും വെടിനിർത്തൽ അംഗീകരിച്ചു; ഗസ്സക്കിനി കണക്കെടുപ്പി​​െൻറ നാളുകൾ

ജറൂസലം: ഈജിപ്​ത്​ മുൻകൈയെടുത്ത്​ കൊണ്ടുവന്ന വെടിനിർത്തൽ​ ഇസ്രായേൽ അംഗീകരിച്ചതോടെ ഗസ്സയിൽ ആഘോഷം. 11 ദിവസം നീണ്ട ബോംബുവർഷത്തിനാണ്​ ഇതോടെ തത്​കാലം അറുതിയാകുന്നത്​. ഈജിപ്​ത്​ കൊണ്ടുവന്ന നിരുപാധിക വെടിനിർത്തലിന്​ ഇസ്രായേൽ സുരക്ഷാ മന്ത്രാലം അംഗീകാരം നൽകിയതായി പ്രധാനമ​ന്ത്രി ​ബിൻയമിൻ നെതന്യാഹു പറഞ്ഞു. പിന്നാലെ വെടിനിർത്തുകയാണെന്ന്​ ഹമാസും ഇസ്​ലാമിക്​ ജിഹാദും ​പ്രഖ്യാപിച്ചു. വെള്ളിയാഴ്​ച പ്രാദേശിക സമയം പുലർച്ചെ രണ്ടുമണിയോടെയാണ്​ ഇസ്ര​ായേൽ ബോംബുവർഷം അവസാനിച്ചത്​.

വിവരമറിഞ്ഞതോടെ പുലർച്ചെതന്നെ ആയിരക്കണക്കിന്​ ഫലസ്​തീനികൾ ഗസ്സയിലും മറ്റു ഫലസ്​തീനി പ്രവിശ്യകളിലും തെരുവിൽ ആഘോഷവുമായി എത്തി. ഫലസ്​തീനി പതാക വീശിയും വിജയ ചിഹ്​നം ഉയർത്തിക്കാട്ടിയുമായിരുന്നു ആഘോഷ പ്രകടനം.

ഇസ്രായേൽ ആക്രമണങ്ങളിൽ ഇതുവരെ 65 കുട്ടികൾ ഉൾപെടെ 232 പേർ കൊല്ലപ്പെട്ടതായാണ്​ കണക്ക്​. ഹമാസ്​ റോക്കറ്റാക്രമണത്തിൽ ഇസ്രായേലിൽ രണ്ടു കുട്ടികൾ ഉൾപെടെ 12 പേരും ​കൊല്ലപ്പെട്ടു.

ബുധനാഴ്​ച യു.എസ്​ പ്രസിഡൻറ്​ ജോ ബൈഡൻ വീണ്ടും ഫോണിൽ വിളിച്ച്​ അടിയന്തരമായി വെടിനിർത്തലിന്​ ആഹ്വാനം ചെയ്​തിരുന്നു. ഇതോടെ ഇസ്രായേൽ പിന്മാറുമെന്ന്​ റിപ്പോർട്ടുകളുണ്ടായിരുന്നുവെങ്കിലും വ്യാഴാഴ്​ചയും ആക്രമണം നടന്നു. പിന്നാലെയാണ്​ ഔദ്യോഗിക പ്രഖ്യാപനം. ഹമാസ്​ കേന്ദ്രങ്ങളിൽ കനത്ത നാശം വിതക്കാനായതായി ഇസ്രായേൽ പ്രതിരോധ മന്ത്രാലയം അവകാശപ്പെട്ടു. എന്നാൽ, വെടിനിർത്തൽ ഹമാസ്​ നേടിയ വിജയമാണെന്ന്​ ഹമാസ്​ വക്​താവ്​ അലി ബാറക പറഞ്ഞു. തകർന്ന കെട്ടിടങ്ങൾ അതിവേഗം പുനരുദ്ധരിക്കുമെന്നും അദ്ദേഹം പറഞ്ഞു.

2014നു ശേഷം ഗസ്സക്കു മേൽ നടന്ന ഏറ്റവും ഭീകരമായ ആക്രമണങ്ങളിൽ 200 ഓളം കെട്ടിട സമുച്ചയങ്ങളും നൂറുകണക്കിന്​ വീടുകളും തകർന്നിരുന്നു. ശതകോടികളുടെ നഷ്​ടം ഉണ്ടായതായി കഴിഞ്ഞ ദിവസം ഗസ്സ ഭരണകൂടം വ്യക്​തമാക്കി.

കടുത്ത ഇസ്രായേൽ ഉപരോധവും അതിർത്തികൾ അടച്ചിടലും കാരണം നേരത്തെ തകർന്നുകിടക്കുന്ന ഗസ്സയിൽ പുതിയ ആക്രമണം വിതച്ച നാശം ഞെട്ടിപ്പിക്കുന്നതാണെന്ന്​ കണക്കുകൾ പറയുന്നു. പുനരുദ്ധാരണ പ്രവൃത്തികളെ ഇസ്രായേൽ തടസ്സപ്പെടുത്തുമെന്ന ആശങ്കയുമുണ്ട്​.

വെടിനിർത്തൽ തുടർച്ചയായ അമേരിക്കൻ നയതന്ത്രത്തി​െൻറ വിജയമാണെന്നും ഇനിയും തുടരുമെന്നും പ്രസിഡൻറ്​ ജോ ബൈഡൻ പറഞ്ഞു. തുടർ നടപടികൾക്കായി യു.എസ്​ സ്​റ്റേറ്റ്​ സെക്രട്ടറി ആൻറണി ബ്ലി​ങ്കെൻ പശ്​ചിമേഷ്യയിലേക്ക്​ പുറപ്പെടും.