കരുതലി​െൻറ ചിറകിൽ അവർ പറന്നിറങ്ങി;​ നിറകൺചിരിയോടെ

കുവൈത്ത്​ സിറ്റി: മാസങ്ങൾക്ക്​ ശേഷം കുവൈത്തി​െൻറ മണ്ണിൽ കാലുകുത്തിയപ്പോൾ സന്തോഷത്തി​െൻറ കണ്ണൂനീർ പൊഴിച്ചുകൊണ്ട്​ അവർ പറഞ്ഞു ''ഞങ്ങൾക്കിത്​ വിശ്വസിക്കാൻ കഴിയുന്നില്ല, നിങ്ങൾ കൊണ്ടുവന്നത്​ ഞങ്ങൾ 167 യാത്രക്കാരെ മാത്രമല്ല, 167 കുടുംബങ്ങളെയാണ്​''. മാസങ്ങൾക്ക്​ ശേഷം സാധാരണ യാത്രക്കാരുമായി ഇന്ത്യയിൽനിന്ന്​ കുവൈത്തിലേക്ക്​ ആദ്യമായി വിമാനമിറങ്ങിയപ്പോൾ സാക്ഷ്യം വഹിച്ചത്​ വികാരനിർഭരമായ രംഗങ്ങൾക്ക്​. നേരിട്ടുള്ള വിമാന സർവീസിന്​ കുവൈത്ത്​ അനുമതി നൽകിയത്​ ഉപയോഗപ്പെടുത്തി വെൽഫെയർ കേരള കുവൈത്ത്​ ആണ്​ വിമാനം ചാർട്ടർ ചെയ്​ത്​ യാത്രക്കാരെ കൊണ്ടുവന്നത്​.

നെടുമ്പാശ്ശേരി അന്താരാഷ്​ട്ര വിമാനത്താവളത്തില്‍നിന്ന്​ ഇന്ത്യന്‍ സമയം വ്യാഴാഴ്ച പുലര്‍ച്ചെ 3.30ന് പുറപ്പെടുന്ന ചാര്‍ട്ടര്‍ വിമാനം കുവൈത്ത് സമയം രാവിലെ ആറിന്​ കുവൈത്തില്‍ എത്തി. കുവൈത്തി വിമാന കമ്പനിയായ ജസീറ എയര്‍വേയ്സുമായി സഹകരിച്ചാണ് പദ്ധതി നടപ്പിലാക്കിയത്. വിസ കാലാവധി തീരാനിരിക്കുന്നവര്‍ ഉള്‍പ്പെടെ വലിയ പ്രതിസന്ധിയിലുള്ള യാത്രാക്കാരാണ് നീണ്ട കാത്തിരിപ്പിനൊടുവില്‍ കുവൈത്തിലേക്ക് തിരികെയെത്തിയത്​. കോവിഡ് പ്രതിസന്ധി രൂക്ഷമായ സമയത്ത് പ്രവാസികള്‍ക്ക് നാടണയാന്‍ കുവൈത്തില്‍നിന്നും കഴിഞ്ഞ വർഷം വെൽഫെയർ കേരള കുവൈത്ത്​ സൗജന്യ ചാര്‍ട്ടര്‍ വിമാനം ഒരുക്കി അയച്ചിരുന്നു. ഇതിനകം തന്നെ പ്രയാസപ്പെടുന്ന ആയിരക്കണക്കിന് പേര്‍ യാത്ര സന്നദ്ധത അറിയിച്ച്​ മുന്നോട്ട് വന്നിട്ടുണ്ടെന്നും സാധ്യമെങ്കില്‍ ഇനിയും ചാര്‍ട്ടര്‍ വിമാനങ്ങള്‍ ഒരുക്കുമെന്നും വെൽഫെയർ കേരള കുവൈത്ത്​ പ്രസിഡൻറ്​ അൻവർ സഇൗദ്​ പറഞ്ഞു.

നിരവധി പ്രവാസികള്‍ക്ക് ആശ്വാസമേകുന്ന ഈ ചരിത്ര ദൗത്യം നിർവഹിക്കാനായതില്‍ ഏറെ ചാരിതാർഥ്യമുണ്ടെന്ന് ചാര്‍ട്ടര്‍ വിമാന പ്രോജക്റ്റ്‌ ടീം ലീഡറും വെല്‍ഫെയര്‍ കേരളകുവൈത്ത് വൈസ് പ്രസിഡൻറുമായ ഖലീല്‍ റഹ്​മാന്‍ പറഞ്ഞു. അദ്ദേഹം യാത്രക്കാരിലൊരാളായി സംഘത്തിൽ ഉണ്ടായിരുന്നു. ചാർട്ടർ വിമാനത്തിൽ പ്രവാസികളെ കൊണ്ടുവരാൻ ഒരുമാസം മുമ്പ്​ ശ്രമം തുടങ്ങിയിരുന്നു. സെർബിയിൽ രണ്ടാഴ്​ച ക്വാറൻറീൻ അനുഷ്​ടിച്ചുള്ള പാക്കേജ്​ ആയിരുന്നു ആദ്യം പരിഗണിച്ചത്​. ഇതിന്​ പോലും തയാറായി പ്രവാസികൾ മുന്നോട്ടുവന്നു. പിന്നീട്​ മാൽഡിവ്​സ്​ ട്രാൻസിറ്റ്​ കേന്ദ്രമാക്കി വരാനായി ശ്രമം. അതിനിടെയാണ്​ നേരിട്ടുള്ള വിമാന സർവീസിന്​ കഴിഞ്ഞ ദിവസം അധികൃതർ അനുമതി നൽകിയത്​. അതോടെ യാത്ര നേരിട്ടാക്കി. പദ്ധതിക്ക് നാട്ടില്‍നിന്ന്​ ഖലീല്‍ റഹ്​മാന്‍, സി.കെ. നജീബ്, മനാഫ്, അല്‍താഫ്, സഫ്​വാന്‍, അബ്​ദുല്‍ ജലീല്‍, അനീസ്‌, നവാസ് എന്നിവരും കുവൈത്തില്‍ അന്‍വര്‍ സഇൗദ്​, ഗിരീഷ്‌ വയനാട്, ലായിക് അഹമ്മദ്, അന്‍വര്‍ ഷാജി, റഫീഖ് ബാബു, ഷഫീര്‍ അബൂബക്കര്‍, ഷൗക്കത്ത് വളാഞ്ചേരി, എം.കെ. ഗഫൂര്‍, വിഷ്ണു നടേശ്, ഷംസീര്‍, അഫ്താബ് എന്നിവരും നേതൃത്വം നല്‍കി.