രാജ്യത്തെ ബാങ്കിങ്​ ഉപഭോക്​താക്കൾക്ക്​ പുതിയ ഭീഷണി; ജാഗ്രത പാലിക്കണമെന്ന്​ മുന്നറിയിപ്പ്​

ന്യൂഡൽഹി: ഇന്ത്യയിലെ ബാങ്കിങ്​ ഉപയോക്​താകൾക്ക്​ മുന്നറിയിപ്പുമായി കേന്ദ്രസർക്കാറിന്​ കീഴിലുള്ള സൈബർ സുരക്ഷ ഏജൻസിയായ കമ്പ്യൂട്ടർ എമർജൻസി റെസ്​പോൺസ്​ ടീം. ബാങ്കിങ്​ ഉപയോക്​താക്കളുടെ നിർണായക വിവരങ്ങൾ ചോർത്താൻ ഫിഷിങ്​ അറ്റാക്കിന്​ ഹാക്കർമാർ തയാറെടുക്കുന്നുവെന്നാണ്​ മുന്നറിയിപ്പ്​. ഇന്‍റർനെറ്റ്​ ബാങ്കിങ്​ വിവരങ്ങൾ, ഒ.ടി.പി, മൊബൈൽ നമ്പർ എന്നിവയാണ്​ ഇത്തരത്തിൽ ചോർത്തുക.വ്യാജ ഇടപാടുകൾ നടത്താനാണ്​ വിവരങ്ങൾ ചോർത്തുന്നത്​.

എൻഗ്രോക്​ പ്ലാറ്റ്​ഫോം കേന്ദ്രീകരിച്ചാണ്​ ഫിഷിങ്​ ​ശ്രമം നടക്കുന്നത്​. ഇന്ത്യയിലെ ബാങ്കിങ്​ വെബ്​സൈറ്റുകളാണ്​ പ്രധാനമായും ഈ പ്ലാറ്റ്​ഫോം ഉപയോഗിക്കുന്നത്​. അതിനാൽ ബാങ്കിങ്​ ഉപയോക്​താക്കൾ ഹാക്കിങ്ങിന്​ വിധേയമായേക്കാമെന്നാണ്​ മുന്നറിയിപ്പ്​. ഉപഭോക്​താക്കൾ വ്യാജ എസ്​.എം.എസ്​ അല്ലെങ്കിൽ ഇമെയിൽ അയച്ചാവും തട്ടിപ്പ്​ നടത്തുക. ഇത്തരം എസ്​.എം.എസിന്‍റെ മാതൃകയും സൈബർ സുരക്ഷാ വിഭാഗം പുറത്ത്​ വിട്ടിട്ടുണ്ട്​.

പ്രിയ ഉപഭോക്​താവെ നിങ്ങളുടെ അക്കൗണ്ട്​ സസ്​പെൻഡ്​ ചെയ്​തിരിക്കുന്നു. കെ.വൈ.സി പുതുക്കുന്നതിനായി താഴെക്കാണുന്ന ലിങ്കിൽ ക്ലിക്ക്​ ചെയ്യുക എന്നായിരിക്കും ഉപഭോക്​താക്കൾക്ക്​ ലഭിക്കുന്ന സന്ദേശം. ഇതിൽ ക്ലിക്ക്​ ചെയ്യുന്നതോടെ ഫിഷിങ്​ സൈറ്റിലേക്ക്​ എത്തുന്നു. ഈ സൈറ്റിന്‍റെ സഹായത്തോടെ ഉപഭോക്​താക്കളുടെ നിർണായക വിവരങ്ങൾ ചോർത്തിയാണ്​ തട്ടിപ്പ്​. സംശയാസ്​പദമായ നമ്പറുകളിൽ നിന്ന്​ വരുന്ന എസ്​.എം.എസുകൾക്കൊപ്പമുള്ള ലിങ്കുകളിൽ ക്ലിക്ക്​ ചെയ്യരുതെന്നാണ്​ സൈബർ വിദഗ്​ധർ നൽകുന്ന പ്രധാന മുന്നറിയിപ്പ്​. ഉപയോക്​താക്കൾക്ക്​ എസ്​.എം.എസിൽ തന്നിട്ടുള്ള യു.ആർ.എൽ സത്യമാണോയെന്ന്​ ഗൂഗ്​ളിൽ നേരിട്ട്​ സേർച്ച്​ ചെയ്​തും മനസിലാക്കാം. തെറ്റായ സ്​പ്പെല്ലിങ്ങുള്ള ലിങ്കുകൾ വ്യാജമാവാനുള്ള സാധ്യതയേറെയാണ്​.