പ്രവർത്തനം ശക്​തിപ്പെടുത്താൻ ആക്​സിസ്​ ബാങ്ക്​; ഗ്രാമീണ മേഖലകളില്‍ 'ഭാരത്​ ബാങ്ക്​' യൂനിറ്റുകൾ വരുന്നു

കൊച്ചി: ആക്സിസ് ബാങ്ക് അര്‍ധ-നഗര, ഗ്രാമീണ മേഖലകളില്‍ പ്രവര്‍ത്തനം ശക്തിപ്പെടുത്താന്‍ 'ഭാരത് ബാങ്ക്' യൂനിറ്റിന് രൂപം നൽകുന്നു. ഗ്രാമീണ മേഖലക്ക്​ ആവശ്യമായ ധനകാര്യ ഉൽപ്പന്നങ്ങള്‍, ഡജിറ്റല്‍ സാന്നിധ്യം ശക്തിപ്പെടുത്തല്‍, ബഹുമുഖ കാര്‍ഷികോൽപ്പന്നങ്ങളില്‍ ശ്രദ്ധ കേന്ദ്രീകരിച്ചുകൊണ്ടുള്ള ബാങ്കിങ്​ സേവനം തുടങ്ങിയവയാണ് ഭാരത് ബാങ്കിങ്​ യൂനിറ്റിലൂടെ ആക്സിസ് ബാങ്ക് ലക്ഷ്യമിടുന്നത്. ഗ്രാമീണ എം.എസ്.എം.ഇ, സി.എസ്​.സി, കോര്‍പറേറ്റ് കൃഷി തുടങ്ങിയവയില്‍ ശ്രദ്ധ കേന്ദ്രീകരിക്കാൻ മൂവായിരത്തോളം ആളുകളെ ബാങ്ക് ചേര്‍ക്കും.

പകര്‍ച്ചവ്യാധി സമയത്ത് 2065 ശാഖകളിലൂടെ അര്‍ധ-നഗര, ഗ്രാമീണ മേഖലകളിലെ 80 ലക്ഷത്തിലധികം ഉപഭോക്താക്കള്‍ക്ക് സേവനം നല്‍കുന്നതില്‍ ശ്രദ്ധ കേന്ദ്രീകരിച്ച ഡീപ് ജിയോ സംരംഭത്തിന്‍റെ വിജയവും അതിന്‍റെ പ്രതികരണവുമാണ് ഭാരത് ബാങ്ക് യൂനിറ്റിനു രൂപം നല്‍കാന്‍ ആക്സിസ് ബാങ്കിന് പ്രചോദനമായത്. ഇതിലൂടെ ഈ വിഭാഗത്തിലെ വായ്പയില്‍ 18 ശതമാനവും ഗ്രാമീണ മേഖലയില്‍നിന്നുള്ള ഡെപ്പോസിറ്റില്‍ 19 ശതമാനവും വാര്‍ഷിക വളര്‍ച്ച നേടി.

ഗ്രാമീണ മേഖലയിലെ പ്രവര്‍ത്തനം ശക്തിപ്പെടുത്തുകയെന്ന ലക്ഷ്യത്തോടെ ഭാരത് ബാങ്കിങ്ങിന്‍റെ ഗ്രൂപ്പ് എക്സിക്യൂട്ടിവും തലവനുമായി മുനീഷ് ശര്‍ദയെ നിയമിച്ചിട്ടുണ്ട്. ഫ്യൂച്ചര്‍ ജനറലി ലൈഫ് ഇന്‍ഷുറന്‍സിന്‍റെ മാനേജിങ്​ ഡയറക്ടർ - സി.ഇ.ഒ സ്ഥാനത്തുനിന്നാണ് അദ്ദേഹം ആക്സിസ് ബാങ്കി​െലത്തുന്നത്​.

'കാര്‍ഷിക മേഖലയിലെ പരിഷ്കാരങ്ങള്‍, അടിസ്ഥാന സൗകര്യ നിക്ഷേപങ്ങള്‍, ഡിജിറ്റല്‍ ഉള്‍പ്പെടുത്തല്‍ എന്നിവ നമ്മുടെ മൂന്നാംനിര പട്ടണങ്ങളിലും ഗ്രാമീണ ഇന്ത്യയിലും വലിയ അവസരമാണ് ഒരുക്കുന്നത്. അടുത്ത മൂന്ന്​ വര്‍ഷത്തിനുള്ളില്‍ ഈ മേഖലയില്‍ തങ്ങളുടെ സാന്നിധ്യം വർധിപ്പിക്കാൻ ഒരു പ്രത്യേക വളര്‍ച്ചാ കേന്ദ്രീകൃത 'ഭാരത് ബാങ്ക്' സൃഷ്ടിക്കുകയാണ്​' -ആക്സിസ് ബാങ്ക് എം.ഡിയും സി.ഇ.ഒയുമായ അമിതാഭ് ചൗധരി പറഞ്ഞു.