മൂന്ന്​ വർഷത്തിനിടെ ഇന്ത്യയിൽ തകർന്നത്​ അഞ്ച്​ ബാങ്കുകൾ; പ്രതിസന്ധി രൂക്ഷം

കഴിഞ്ഞ ഏതാനം വർഷങ്ങളായി​ കടുത്ത പ്രതിസന്ധിയാണ്​ ഇന്ത്യൻ ബാങ്കിങ്​ മേഖലയിൽ തുടരുന്നത്​. മൂന്ന്​ വർഷത്തിനിടെ അഞ്ച്​ ബാങ്കുകളാണ്​ രാജ്യത്ത്​ തകർന്നത്​. ഇന്ത്യൻ സമ്പദ്​വ്യവസ്ഥയെ സംബന്ധിച്ചടുത്തോളം ഒട്ടും പ്രതീക്ഷക്ക്​ വകക്ക്​ നൽകുന്നതല്ല കണക്കുകൾ. ഈ നിരയിലേക്ക്​ അവസാനമെത്തിയത്​ ചെന്നൈ കേന്ദ്രമാക്കി പ്രവർത്തിക്കുന്ന ലക്ഷ്​മി വിലാസ്​ ബാങ്കാണ്​.

ബാങ്കിൻെറ കിട്ടാകടം വർധിക്കുകയും മൂലധനത്തിൽ വലിയ ഇടിവ്​ രേഖപ്പെടുത്തുകയും ചെയ്​തതോടെയാണ്​ തകർച്ചയുടെ വക്കിലേക്ക്​ കൂപ്പുകുത്തിയത്​. ബാങ്ക്​ പ്രതിസന്ധിയിലായതോടെ 30 ദിവസത്തെ മൊറ​ട്ടോറിയം ഏർപ്പെടുത്തി ആർ.ബി.ഐ ഉത്തരവായി. നിലവിൽ ഡി.ബി.എസ്​ ബാങ്കുമായി ലയിപ്പിച്ച്​ ലക്ഷ്​മി വിലാസിലെ പ്രതിസന്ധി മറികടക്കാനാണ്​ ആർ.ബി.ഐ ലക്ഷ്യമിടുന്നത്​.

ഇന്ത്യയിലെ ബാങ്ക്​ പ്രതിസന്ധി

ധനകാര്യ സ്ഥാപനങ്ങൾ നിരന്തരമായി തകരുന്നത്​ രാജ്യത്തിന്​ വലിയ മുന്നറിയിപ്പാണ്​ നൽകുന്നത്​. രാജ്യം മാന്ദ്യത്തിൻെറ പടിവാതിൽക്കൽ നിൽക്കു​േമ്പാൾ ബാങ്കുകളിലുണ്ടാവുന്ന പ്രതിസന്ധി സ്ഥിതി രൂക്ഷമാക്കുമെന്നാണ്​ ആശങ്ക

ഐ.എൽ&എഫ്​.സി, ഡി.എച്ച്​.എഫ്​.എൽ, പഞ്ചാബ്​ ആൻഡ്​ മഹാരാഷ്​ട്ര കോ.ഓപ്പറേറ്റീവ്​ ബാങ്ക്​, ​യെസ്​ ബാങ്ക്​ എന്നീ ധനകാര്യ സ്ഥാപനങ്ങളാണ് കഴിഞ്ഞ മൂന്ന്​ വർഷത്തിനിടെ​ തകർന്നത്​. തകർച്ചയുടെ വക്കിലായ ഐ.ഡി.ബി.ഐ ബാങ്കിനെ എൽ.ഐ.സിയുടെ മൂലധനം ഉപയോഗിച്ചാണ്​ കേന്ദ്രസർക്കാർ രക്ഷിച്ചെടുത്തത്​.

തകർന്ന മറ്റൊരു ബാങ്കായ യെസ്​ ബാങ്കിൻെറ രക്ഷക്കായി എസ്​.ബി.ഐ എത്തിയെങ്കിലും പി.എം.സി ബാങ്കിനെ കരകയറ്റാൻ പുതിയ പദ്ധതികളൊന്നും നടപ്പിലായിട്ടില്ല. രണ്ട്​ ബാങ്കുകളുടേയും തകർച്ചയിലേക്ക്​ നയിച്ചത്​ കിട്ടാകടവും വായ്​പകൾ അനുവദിക്കുന്നതിലെ ക്രമക്കേടുകളും ഏറ്റവും മോശം കോർപ്പറേറ്റ്​ ഭരണവുമായിരുന്നു.

കിട്ടാകടമാണ്​ എൽ.വി.ബിക്ക്​ വിനയായത്​. 720 കോടി റാൻബാക്​സി പ്രൊമോട്ടർമാർ, മാൽവിന്ദർ, ശിവന്ദർ സിങ്​ എന്നിവർക്ക്​ നൽകാനുള്ള തീരുമാനം കടുത്ത തിരിച്ചടിയാണ്​ ബാങ്കിന്​ സൃഷ്​ടിച്ചത്​.

ഐ.എൽ&എഫ്​.എസ്​ ആൻഡ്​ ഡി.എച്ച്​.എഫ്​.എൽ

2018ലാണ്​ ബാങ്കിങ്​ ഇതര ധധനകാര്യ സ്ഥാപനമായ ഐ.എൽ&എഫ്​.എസിൽ പ്രതിസന്ധിയുണ്ടാവുന്നത്​. പണപ്രതിസന്ധിയാണ്​ സ്ഥാപനത്തിൻെറ തിരിച്ചടിക്കുള്ള പ്രധാന കാരണം. ഇന്ത്യയിലെ പല ബാങ്കിങ്​ ഇതര ധനകാര്യ സ്ഥാപനങ്ങളും അഭിമുഖീകരിക്കുന്ന പ്രതിസന്ധി ഐ.എൽ&എഫ്​.എസിനേയും പിടികൂടുകയായിരുന്നു.

തട്ടിപ്പുകളും കാര്യക്ഷമതയില്ലാ​ത്ത ഭരണസംവിധാനവുമായി ഡി.എച്ച്​.എഫ്​.എല്ലിൻെറ തിരിച്ചടിക്ക്​ കാരണം. പ്രൊമോട്ടർമാരായ കപിൽ വാദ്​വാനും ധീരജ്​ വാദ്​വാനും യെസ്​ ബാങ്ക്​ തട്ടിപ്പ്​ കേസിൽ അറസ്​റ്റിലായതോടെയാണ്​ ബാങ്കിലെ തട്ടിപ്പുകൾ സംബന്ധിച്ച വിവരങ്ങൾ പുറത്ത്​ വന്നത്​. വായ്​പകൾ നൽകിയതിലുൾപ്പടെ വലിയ തട്ടിപ്പാണ്​ ഇവർ ഡി.എച്ച്​.എഫ്​.എല്ലിൽ നടത്തിയത്​.

ബാങ്കുകൾ തകരുന്നത്​ ഉപയോക്​താക്കളിൽ വലിയ ആശങ്ക സൃഷ്​ടിക്കുമെന്ന കാര്യത്തിൽ തർക്കമില്ല. പി.എം.എസി ബാങ്കിൽ നിന്ന്​ പണം പിൻവലിക്കുന്നതിന്​ ഏർപ്പെടുത്തിയ നിയന്ത്രണങ്ങൾ പൂർണമായ രീതിയിൽ ഇനിയും പിൻവലിക്കപ്പെട്ടിട്ടില്ല. കോവിഡിനെ തുടർന്ന്​ ബാങ്കുകളിലെ കിട്ടാകടം ഇനിയും വർധിക്കാനാണ്​ സാധ്യത. ഈയൊരു സാഹചര്യത്തിൽ ബാങ്കുകൾ നേരിടുന്ന പ്രതിസന്ധി ആർ.ബി.ഐ ശ്രദ്ധയോടെ നിരീക്ഷിക്കേണ്ടതുണ്ട്​.