കോൾ ഈ നമ്പറുകളിൽനിന്നാ​ണോ? എടുത്താൽ കുടുങ്ങും, മുന്നറിയിപ്പുമായി എസ്​.ബി.ഐ

തൃശൂർ: ഉപഭോക്താവിന്‍റെ വ്യക്തിഗത വിവരങ്ങൾ ചോദിച്ച്​ വരുന്ന ഫോൺ കോളുകൾക്കെതിരെ ജാഗ്രത നിർദേശവുമായി സ്​റ്റേറ്റ്​ ബാങ്ക്​ ഓഫ്​ ഇന്ത്യ. +91-8294710946, +91-7362951973 എന്നീ നമ്പറുകളിൽനിന്നുള്ള വിളിയാണെങ്കിൽ ഒരു കാരണവശാലും എടുത്ത്​ പ്രതികരിക്കരുതെന്ന്​ ഇടപാടുകാർക്ക്​ ബാങ്ക്​ മുന്നറിയിപ്പ്​ നൽകുന്നു.

ബാങ്ക്​ ഒരു ലിങ്ക്​ അയച്ചിട്ടുണ്ടെന്നും അതിൽ കെ.വൈ.സി (നോ യുവർ കസ്റ്റമർ -ഇടപാടുകാരെ അറിയുക) വിവരങ്ങൾ നൽകണമെന്നുമാണ്​ ഈ നമ്പറുകളിൽനിന്ന്​ വിളിച്ച്​ ആവശ്യപ്പെടുന്നത്​. ഇതുപ്രകാരം ചെയ്യുന്നവർക്ക്​ അക്കൗണ്ടിലെ പണം നഷ്ടപ്പെട്ടതായി ധാരാളം പരാതി വരുന്നുണ്ട്​.

യൂസർ ഐ.ഡി, പാസ്​വേഡ്​, ഡെബിറ്റ്​ കാർഡ്​ നമ്പർ, പേഴ്​സണൽ ഐഡന്‍റിഫിക്കേഷൻ നമ്പർ (പിൻ), കാർഡിലെ സി.വി.വി, ഒ.ടി.പി എന്നിവ ആരുമായും പങ്ക്​ വെക്കരുതെന്നും ബാങ്ക്​ ഈ വിവരങ്ങൾ ആവശ്യപ്പെടാറില്ലെന്നും ട്വിറ്റർ, എസ്​.എം.എസ്​, ഇ-മെയിൽ എന്നീ മാർഗങ്ങളിലൂടെ ഇടപാടുകാരെ എസ്​.ബി.ഐ അറിയിച്ചിട്ടുണ്ട്​.

ബാങ്കിന്‍റെ വെബ്​സൈറ്റുമായി ഏറെ സാദൃശ്യമുള്ള സൈറ്റ്​ തയാറാക്കിയും വ്യാജ ഇ-കൊമേഴ്​സ്​ സൈറ്റുകൾ ഉണ്ടാക്കിയും തട്ടിപ്പ്​ നടക്കുന്നുണ്ട്​. ഇന്‍റർനെറ്റ്​ മുഖേനയുള്ള ഇത്തരം തട്ടിപ്പുകൾക്കുള്ള സാധ്യതകൾ മനസ്സിലാക്കിയാൽ report.phishing@sbi.co.in എന്ന മെയിൽ വഴിയോ 1930 എന്ന ഹെൽപ്​ലൈൻ നമ്പറിൽ വിളിച്ചോ അറിയിക്കണം.

അതേസമയം, ട്വിറ്റർ മുഖേനയുള്ള എസ്​.ബി.ഐയുടെ മുന്നറിയിപ്പ്​ മുഖവിലക്ക്​ എടുക്കുമ്പോഴും പല ഉപഭോക്താക്കളും ഇത്തരം തട്ടിപ്പിൽ ബാങ്കിന്‍റെ സമീപനം ചോദ്യം ചെയ്യുന്നുണ്ട്​. തട്ടിപ്പിനെക്കുറിച്ചും തട്ടിപ്പുകാരെക്കുറിച്ചും മുന്നറിയിപ്പ്​ നൽകി തട്ടിപ്പിന്‍റെ ബാധ്യത മുഴുവൻ ഉപഭോക്താക്കളുടെ തലയിൽവെച്ച്​ മാറി നിൽക്കാതെ അത്​ അവസാനിപ്പിക്കാൻ എന്ത്​ ചെയ്യുന്നുവെന്ന ചോദ്യമാണ്​ പലരും ഉന്നയിക്കുന്നത്​.