ശമ്പളം നൽകിയത്​ ക്രിപ്​റ്റോകറൻസിയിൽ, മൂല്യം മാനംമുട്ടെ ഉയർന്നപ്പോൾ തിരികെവേണമെന്ന് സി.ഇ.ഒ​; വിചിത്ര അനുഭവം പങ്കുവെച്ച്​ ജീവനക്കാരി

ഒരു ടെക്​ സ്റ്റാർട്ട്​-അപ്​ കമ്പനിയിലെ ജീവനക്കാരിയാണ്​ ത​െൻറ സി.ഇ.ഒയുടെ വിചിത്രമായ ആവശ്യം ട്വിറ്ററിൽ പങ്കുവെച്ചത്​. കഴിഞ്ഞ വർഷം ആഗസ്​ത്​ മാസത്തിൽ കമ്പനിയിലെ തൊഴിലാളികൾക്ക്​ സി.ഇ.ഒ ശമ്പളം നൽകിയത്​ ക്രിപ്​റ്റോ കറൻസിയിലായിരുന്നു. എന്നാൽ, ഇപ്പോൾ അന്ന്​ നൽകിയ ക്രിപ്​റ്റോ കറൻസി അയാൾ തിരികെ ചോദിക്കുന്നതായി ജീവനക്കാരി ആരോപിക്കുന്നു. കാര്യം മറ്റൊന്നുമല്ല, ക്രിപ്​റ്റോ കറൻസിയുടെ മൂല്യം 700 ശതമാനം വർധിച്ചതതോടെയാണ്​​ സി.ഇ.ഒക്ക്​ ഇരിക്കപ്പൊറുതിയില്ലാതായത്​.

താൻ അന്ന്​ ശമ്പളമായി നൽകിയ ക്രിപ്​റ്റോ കറൻസി തിരിച്ചു നൽകണമെന്നും പകരം യു.എസ്​ ഡോളറായി ശമ്പളം നൽകാമെന്നും ജീവനക്കാർക്ക്​ അയച്ച മെയിലിൽ സി.ഇ.ഒ പറഞ്ഞത്രേ. കമ്പനി വരുമാനമുണ്ടാക്കുന്നതിൽ പരാജയപ്പെട്ടതാണ്​ അതിന്​ കാരണമായി ബോധിപ്പിച്ചിരിക്കുന്നത്​. 'മാർക്കറ്റ്​വാച്ച്​' ആണ്​ സംഭവം റിപ്പോർട്ട്​ ചെയ്​തിരിക്കുന്നത്​. വർഷങ്ങളായി താൻ കീഴിൽ ജോലി ചെയ്​തുകൊണ്ടിരിക്കുന്ന മേധാവിയാണ്​ വിചിത്രമായ ആവശ്യം മുന്നോട്ടുവെച്ചതെന്നും പേര്​ വെളിപ്പെടുത്താൻ ആഗ്രഹിക്കാത്ത ജീവനക്കാരി പറഞ്ഞു.

"ക്രിപ്റ്റോയുടെ ഇന്നത്തെ വിലയേക്കാൾ ഏഴിരട്ടി കുറഞ്ഞ വിലയിൽ എനിക്ക് അമേരിക്കൻ ഡോളറായി ശമ്പളം നൽകാമെന്നാണ് അയാൾ​ പറഞ്ഞുവരുന്നത്​," ജീവനക്കാരി പറയുന്നു. "എന്തുചെയ്യണമെന്ന് എനിക്കറിയില്ല. ഞാൻ ഈ വ്യക്തിയുമായി വർഷങ്ങളോളം പ്രവർത്തിച്ചിട്ടുണ്ട്, ഒരു പ്രത്യേക പ്രവർത്തന രീതി അംഗീകരിച്ചതിനുശേഷം ശമ്പളം നൽകുന്ന നിബന്ധനകൾ മാറ്റാൻ ശ്രമിക്കുന്ന ഒരു പ്രവണത അദ്ദേഹത്തിനുണ്ട്. ഇതിനുള്ള ന്യായമായ പരിഹാരമെന്താണെന്ന്​ നിങ്ങൾ പറയൂ? മണിക്കൂറുകളോളം ജോലിചെയ്തതിന്​ ശമ്പളമായി ലഭിച്ച ക്രിപ്‌റ്റോകറൻസി അയാൾക്ക്​ തിരികെ നൽകണോ? ഈ തൊഴിലുടമയോട് ഞാൻ എന്താണ് പറയേണ്ടത്? " -അവർ ട്വീറ്റിൽ ചോദിച്ചു.

എന്നാൽ, ചോദ്യത്തിന്​ വന്ന ഉത്തരങ്ങളെല്ലാം തന്നെ 'ഒരുകാരണവശാലും തിരികെ നൽകരുത്​' എന്നാണ്​. 'ക്രിപ്​റ്റോ കറൻസിയുടെ മൂല്യം കുറഞ്ഞാൽ, അവർ ഇപ്പോൾ വേറെ രീതിയിൽ ശമ്പളം നൽകുമായിരുന്നോ..? ഇല്ലെന്നാണ്​ എനിക്ക്​ തോന്നുന്നത്​....' മറുപടി ട്വീറ്റിൽ ഒരാൾ പറഞ്ഞു. നിങ്ങൾ ചെയ്​ത ജോലിക്ക്​ നിരുപാധികമായ നൽകിയ ശമ്പളമാണത്​. അത്​ ആർക്കും തിരികെ ചോദിക്കാൻ അവകാശമില്ല. ഇ​തുപോലുള്ള ആളുടെ കീഴിൽ ജോലി ചെയ്യാതിരിക്കുക.. -മറ്റൊരാൾ കമൻറ്​ ചെയ്​തു.