വീണ്ടും ബാങ്ക്​ വായ്​പ തട്ടിപ്പ്​; 4,837കോടി വായ്​പയെടുത്ത്​ മുങ്ങിയ കമ്പനിക്കെതിരെ സി.ബി.ഐ അന്വേഷണം

ഹൈദരാബാദ്​: എ​ട്ടു പൊതുമേഖല ബാങ്കുകളിൽനിന്നായി 4,837കോടി കടമെടുത്ത്​ മുങ്ങിയ ഹൈദരബാദ്​ ആസ്​ഥാനമായി പ്രവർത്തിക്കുന്ന കമ്പനിക്കെതിരെ സി.ബി.ഐ അന്വേഷണം. സ്റ്റേറ്റ്​ ബാങ്ക്​ ഓഫ്​ ഇന്ത്യയുടെ പരാതിയുടെ അടിസ്​ഥാനത്തിൽ ഐ.വി.ആർ.സി.എൽ ലിമിറ്റഡിനെതിരെയാണ്​ അന്വേഷണം.

25 വർഷമായി അടിസ്​ഥാന വികസനമേഖലയിൽ പ്രവർത്തിച്ചുവരുന്ന കമ്പനിയാണിത്​. ജലം- പരിസ്​ഥിതി, ജലസേചനം, ഗതാഗതം, കെട്ടിട വ്യവസായ നിർമാണം, വൈദ്യുതി വിതരണം, ഖനനം തുടങ്ങിയവയാണ്​ കമ്പനിയുടെ പ്രവർത്തനങ്ങൾ.

കമ്പനിയുടെ മാനേജിങ്​ ഡയറക്​ടർ ഇ. സുധീർ റെഡ്ഡി, ​േജായിന്‍റ്​ മാനേജിങ്​ ഡയറക്​ടർ ആർ. ബൽറാം റെഡ്ഡി, മറ്റു ഉടമകൾ എന്നിവർക്കെതിരെയാണ്​ കേസ്​.

സ്​റ്റേറ്റ്​ ബാങ്ക്​ ഇന്ത്യ നേതൃത്വം നൽകുന്ന ഐ.ഡി.ബി.ഐ, കാനറ ബാങ്ക്​, ആന്ധ്ര ബാങ്ക്​, കോർപറേഷൻ ബാങ്ക്​, എക്​സിം ബാങ്ക്​, പഞ്ചാബ്​ ആൻഡ്​ സിന്ധ്​ ബാങ്ക്​, യൂനിയൻ ബാങ്ക്​ ഓഫ്​ ഇന്ത്യ എന്നീ ബാങ്കുകളുടെ കൺസോർഷ്യത്തിൽനിന്നാണ്​​ വായ്​പ എടുത്തത്.

വായ്​പ തിരിച്ചടവ്​ മുടങ്ങിയതിനെ തുടർന്ന്​ എസ്​.ബി.ഐ പരാതി നൽകുകയായിരുന്നുവെന്ന്​ സി.ബി.ഐ വക്താവ്​ ആർ.കെ. ഗൗർ പറഞ്ഞു. ബുധനാഴ്​ച സി.ബി.ഐ, ഓഫിസിലും ഉടമകളുടെ വീട്ടിലും റെയ്​ഡ്​ നടത്തി. വായ്​പ തട്ടിപ്പിന്​ പു​റമെ കമ്പനിയുടെ വിവിധ അക്കൗണ്ടുകളിൽ തിരിമറി നടത്തിയതിന്‍റെയും രേഖകൾ കണ്ടെത്തിയതായാണ്​ വിവരം.