വ്യവസായങ്ങള്‍ക്ക് ഏഴു ദിവസത്തിനകം അനുമതി –മന്ത്രി പി. രാജീവ്

കോഴി​ക്കോ​ട്​: 50 കോ​ടി രൂ​പ​ക്ക് മു​ക​ളി​ല്‍ മു​ത​ല്‍മു​ട​ക്കു​ള്ള വ്യ​വ​സാ​യ​ങ്ങ​ള്‍ക്ക് ആ​വ​ശ്യ​മാ​യ രേ​ഖ​ക​ള്‍ സ​ഹി​തം അ​പേ​ക്ഷി​ച്ചാ​ല്‍ ഏ​ഴു ദി​വ​സ​ത്തി​ന​കം കോ​മ്പോ​സി​റ്റ് ലൈ​സ​ന്‍സ് ന​ല്‍കു​മെ​ന്ന് വ്യ​വ​സാ​യ മ​ന്ത്രി പി. ​രാ​ജീ​വ്. കെ.​എ​സ്.​ഐ.​ഡി.​സി കോ​ഴി​ക്കോ​ട് ഓ​ഫി​സ് ഉ​ദ്ഘാ​ട​നം നി​ർ​വ​ഹി​ക്കു​ക​യാ​യി​രു​ന്നു അ​ദ്ദേ​ഹം.

വ്യ​വ​സാ​യ സം​രം​ഭ​ക​രു​ടെ പ​രാ​തി സ​മ​യ​ബ​ന്ധി​ത​മാ​യി തീ​ർ​പ്പാ​ക്കു​ന്ന​തി​ൽ വീ​ഴ്‌​ച വ​രു​ത്തു​ന്ന ഉ​ദ്യോ​ഗ​സ്ഥ​രി​ൽ​നി​ന്ന്‌ പി​ഴ ഈ​ടാ​ക്കു​മെ​ന്നും മ​ന്ത്രി അ​റി​യി​ച്ചു. സം​സ്ഥാ​ന പ​രാ​തി പ​രി​ഹാ​ര സ​മി​തി​ക്ക്‌ ല​ഭി​ക്കു​ന്ന പ​രാ​തി 30 ദി​വ​സ​ത്തി​ന​കം പ​രി​ഹ​രി​ക്ക​ണം. അ​ടു​ത്ത 15 ദി​വ​സ​ത്തി​ന​കം പ​രി​ഹാ​ര നി​ർ​ദേ​ശ​വും ന​ട​പ്പാ​ക്ക​ണം. വീ​ഴ്‌​ച വ​രു​ത്തു​ന്ന ഉ​ദ്യോ​ഗ​സ്ഥ​നി​ൽ​നി​ന്ന്‌ ദി​വ​സം 250 രൂ​പ വീ​തം പ​ര​മാ​വ​ധി 10,000 രൂ​പ​വ​രെ പി​ഴ ഈ​ടാ​ക്കും.

യു.​എ​ൽ സൈ​ബ​ർ പാ​ർ​ക്കി​ൽ ന​ട​ന്ന ച​ട​ങ്ങി​ൽ തു​റ​മു​ഖ മ​ന്ത്രി അ​ഹ​മ്മ​ദ് ദേ​വ​ർ​കോ​വി​ൽ അ​ധ്യ​ക്ഷ​ത വ​ഹി​ച്ചു. എം.​കെ. രാ​ഘ​വ​ൻ എം.​പി, ടി.​പി. രാ​മ​കൃ​ഷ്ണ​ൻ എം.​എ​ൽ.​എ, മേ​യ​ർ ബീ​ന ഫി​ലി​പ്​ എ​ന്നി​വ​ർ വി​ശി​ഷ്​​ടാ​തി​ഥി​ക​ളാ​യി​രു​ന്നു. ന​ഗ​ര​സ​ഭ കൗ​ൺ​സി​ല​ർ സു​ജാ​ത കൂ​ട​ത്തി​ങ്ക​ൽ, കെ.​എ​സ്.​ഐ.​ഡി.​സി മാ​നേ​ജി​ങ് ഡ​യ​റ​ക്ട​ർ എം.​ജി. രാ​ജ​മാ​ണി​ക്യം, ജ​ന​റ​ൽ മാ​നേ​ജ​ർ ജി. ​അ​ശോ​ക് ലാ​ൽ, ജി​ല്ല വ്യ​വ​സാ​യ കേ​ന്ദ്രം ജ​ന​റ​ൽ മാ​നേ​ജ​ർ പി.​എ. ന​ജീ​ബ് എ​ന്നി​വ​ർ പ​ങ്കെ​ടു​ത്തു.