വായ്​പമേളകൾ വീണ്ടുമെത്തുന്നു; പ്രതിസന്ധി മറികടക്കാൻ തന്ത്രവുമായി നിർമല സീതാരാമൻ

ന്യൂഡൽഹി: രാജ്യ​ത്ത്​ കോവിഡിനെ തുടർന്നുള്ള സാമ്പത്തിക പ്രതിസന്ധി തുടരവെ ​വായ്​പമേളകൾ വീണ്ടുമെത്തുന്നു. സാധാരണ ജനങ്ങൾക്കും ചെറുകിട വ്യാപാരികൾക്കും വായ്​പകൾ നൽകുന്നതിനാണ്​ പുതിയ വായ്​പമേള സംഘടിപ്പിക്കുന്നത്​. ഇതിലൂടെ സ്വകാര്യ ഉപഭോഗം ഉയർത്താമെന്നും സാമ്പത്തിക വളർച്ചയുണ്ടാക്കാമെന്നുമാണ്​ കേന്ദ്രസർക്കാറിന്‍റെ കണക്കുകൂട്ടൽ.

2019ലാണ്​ ഇതിന്​ മുമ്പ്​ കേന്ദ്രസർക്കാറിന്‍റെ നിർദേശപ്രകാരം ബാങ്കുകൾ വായ്​പമേള നടത്തിയത്​. 250 ജില്ലകളിലായിരുന്നു അന്ന്​ മേള. ഉത്സവകാലത്തിന്​ മുന്നോടിയായിട്ടായിരുന്നു അന്ന്​ വായ്​പമേള നടത്തിയത്​. സമാനമായിരിക്കും ഇക്കുറിയും നടത്തുന്ന മേള.

കോവിഡിന്‍റെ രണ്ട്​ തരംഗങ്ങൾ വലിയ പ്രതിസന്ധി സമ്പദ്​വ്യവസ്ഥയിൽ സൃഷ്​ടിച്ചിരുന്നു. ഇത്​ സാധാരണനിലയിലാക്കണമെങ്കിൽ വൻ തോതിൽ പണം വിപണിയിലെത്തണം. ഇതിന്​ വായ്​പമേളയിലൂടെ കഴിയുമെനാണ്​ കേന്ദ്രസർക്കാറിന്‍റെ വിലയിരുത്തൽ.