മുകേഷ്​ അംബാനിയെ കബളിപ്പിച്ച്​ കടന്നയാൾക്കെതിരെ ഇ.ഡി; സ്വത്തുക്കൾ കണ്ടുകെട്ടി

മുംബൈ: റിലയൻസ്​ ഇൻഡസ്​ട്രീസ്​ ചെയർമാൻ മുകേഷ്​ അംബാനിയെ കബളിപ്പിച്ച്​ കടന്നയാൾക്കെതിരെ ഇ.ഡി അന്വേഷണം. കൽപേഷ്​ ദാഫ്​ത്രി എന്നയാൾക്കെതിരെയാണ്​ ഇ.ഡി അന്വേഷണം പ്രഖ്യാപിച്ചത്​. ദാഫ്​ത്രിയുടെ ഉടമസ്ഥതയിലുള്ള സങ്കൽപ്​ ക്രിയേഷൻസ്​ എന്ന കമ്പനിയുടെ 4.87 കോടി രൂപ വരുന്ന സ്വത്തുക്കൾ ഇ.ഡി കണ്ടുകെട്ടിയിട്ടുണ്ട്​.

മുംബൈയിലെ വാണിജ്യ കെട്ടിടവും രാജ്​കോട്ടിലെ നാല്​ കെട്ടിടങ്ങളുമാണ്​ ഇ.ഡി കണ്ടുകെട്ടിയത്​. പി.എം.എൽ.എ നിയമപ്രകാരം സി.ബി.ഐ രജിസ്റ്റർ ചെയ്​ത കേസിലാണ്​ ഇപ്പോൾ ഇ.ഡിയും അന്വേഷണം നടത്തുന്നത്​. വിശേഷ്​ കൃഷി ആൻഡ്​ ഗ്രാം ഉദ്യോഗ്​ യോജന പ്രകാരം അനുവദിച്ച 13 ലൈസൻസുകളുടെ ഇടപാടുമായി ബന്ധപ്പെട്ടാണ്​ തട്ടിപ്പ്​ നടന്നത്​. ഈ 13 ലൈസൻസുകൾ ഹിന്ദുസ്ഥാൻ കോണ്ടിനന്‍റൽ ലിമിറ്റഡ്​ എന്ന കമ്പനിയുടെ പേരിലായിരുന്നു.

6.8 കോടി രൂപക്ക്​ ലൈസൻസുകൾ അംബാനിയുടെ റിലയൻസ്​ ഇൻഡസ്​ട്രീസിന്​ നൽകാമെന്ന്​ ദാഫ്​ത്രി അറിയിച്ചു. എന്നാൽ, ഇതേ ലൈസൻസുകൾ മറ്റ്​ നിരവധി പേർക്ക്​ ഇതിന്​ മുമ്പ്​ തന്നെ വിറ്റതായി പിന്നീട്​ കണ്ടെത്തിയതോടെയാണ്​ തട്ടിപ്പ്​ പുറത്തായത്​. അഹമ്മദ്​, പിയുഷ്​,വിജയ്​ ഗാദിയ എന്നിവരും കേസിൽ പ്രതികളാണ്​.