മഹാമാരിക്കി​ടെ വീണ്ടും പെരുംകൊള്ള: പെട്രോളിനും ഡീസലിനും ഇന്നും വില കൂട്ടി

മുംബൈ/ കൊച്ചി: രാജ്യത്തെ ജനങ്ങൾ കോവിഡ്​ ദുരിതത്തിൽ നട്ടംതിരിയവേ ഇന്ധന വില ഇന്ന്​ വീണ്ടും വർധിപ്പിച്ചു. മുംബൈയിൽ ഒരു ലിറ്റർ പെട്രോളിന് 97.86 രൂപയും ഡീസലിന് 89.17 രൂപയുമാണ് പുതുക്കിയ വില.

കേരളത്തിൽ പെട്രോളിന് 26 പൈസയും ഡീസലിന് 35 പൈസയുമാണ്​ കൂട്ടിയത്​. ഇതോടെ തിരുവനന്തപുരത്ത് ഒരു ലിറ്റർ പെട്രോളിന് 93.51 രൂപയും ഡീസലിന് 88.25 രൂപയുമായി. കൊച്ചിയിൽ പെട്രോളിന് 93.73 രൂപയും ഡീസലിന് 86.48 രൂപയുമാണ്​ ഇന്നത്തെ വില. ഏതാനും മാസങ്ങളായി ദിനേന ഇന്ധന വില വർധിപ്പിച്ച്​ കൊണ്ടിരിക്കുകയായിരുന്നു. എന്നാൽ, അഞ്ച്​ സംസ്​ഥാനങ്ങളിൽ തെരഞ്ഞെടുപ്പ്​ പ്രഖ്യാപിച്ചതിന്​ പിന്നാലെ ഈ പതിവ്​ പൊടുന്നനെ​ നിർത്തി. തെരഞ്ഞെടുപ്പ് കഴിഞ്ഞ്​ ഫലം പ്രഖ്യാപിച്ചതിന്​ പിന്നാലെ വീണ്ടു​ം തുടങ്ങിയ ഇരുട്ടടി തുടരുകയാണ്​. മേയ്​ രണ്ടിന്​ ശേഷം അഞ്ചാം​ തവണയായാണ്​ വില വർധിപ്പിക്കുന്നത്​.

കോവിഡ്​ പ്രതിരോധത്തിന്‍റെ ഭാഗമായി മിക്ക സംസ്​ഥാനങ്ങളിലും ലോക്​ഡൗൺ പ്രഖ്യാപിച്ചതിനാൽ ജോലിയും കൂലിയുമില്ലാതെ നരകിക്കുകയാണ്​ സാധാരണക്കാർ. ഇതിനിടെയാണ്​ തീവെട്ടിക്കൊള്ളയുമായി ഇന്ധനവില വർധന. ലോറി വാടകയെയും മറ്റും സ്വാധീനിക്കുന്നതിനാൽ നിത്യോപയോഗസാധനങ്ങൾക്ക്​ വ​രെ വില കുതിച്ചുയരാൻ പെട്രോൾ -ഡീസൽ വില വർധന കാരണമാകും.

പുതുക്കിയ ഇന്ധന വില (ലിറ്ററിന്​)

തിരുവനന്തപുരം: പെട്രോൾ -93.51, ഡീസൽ -88.25

കൊച്ചി: പെട്രോൾ -93.73, ഡീസൽ -86.48

കോഴിക്കോട്​: പെട്രോൾ -92.02 , ഡീസൽ -86.88