യു.എസിൽ അതിവേഗം ഇടപാടുകൾ ഏറ്റെടുത്ത്​ ബി​റ്റ്​കോയിൻ എ.ടി.എമ്മുകൾ​

വാഷിങ്​ടൺ: ലോകത്തെ മൊത്തം ബിറ്റ്​കോയിൻ എ.ടി.എമ്മുകളിൽ 80 ശതമാനവും സ്വന്തമായുള്ള യു.എസിൽ അവയുടെ പ്രചാരത്തിന്​ അതിവേഗമെന്ന്​ റിപ്പോർട്ട്​. ഇന്ത്യ പോലുള്ള രാജ്യങ്ങളിൽ ക്രിപ്​റ്റോകറൻസികൾക്ക്​ സമ്പൂർണ വിലക്ക്​ ഏർപെടുത്താൻ നിയമം സജീവ പരിഗണനയിലിരിക്കെയാണ്​ ​അമേരിക്കയിൽ ബിറ്റ്​കോയിൻ വിൽക്കാനും വാങ്ങാനും സഹായിക്കുന്ന, അപൂർവം ഘട്ടങ്ങളിൽ നേരിട്ട്​ പണമായി മാറ്റാനും സഹായിക്കുന്ന ബിറ്റ്​കോയിൻ എ.ടി.എമ്മുകൾ കൂടുതൽ മേഖലകളിലേക്ക്​ വ്യാപിക്കുന്നത്​. സൗത്​ കരോലൈന, നോർത്​ കരോലൈന, മൊണ്ടാന, പെൻസിൽവാനിയ, ന്യൂജേഴ്​സി, ന്യൂയോർക്​ സിറ്റി എന്നിവിടങ്ങളിൽ ഗ്യാസ്​ സ്​റ്റേഷനുകളിലും റസ്​റ്റൊറന്‍റുകളിലും സ്​മോക്​ ഷോപുകളിലുമാണ്​ പുതുതായി തുടങ്ങിയത്​.

യു.എസിൽ മാത്രം ജനുവരിയിലെ കണക്കുകൾ പ്രകാരം 28,185 ബിറ്റ്​കോയിൻ എ.ടി.എമ്മുകൾ പ്രവർത്തിക്കുന്നുണ്ടെന്ന്​ റോയി​േട്ടഴ്​സ്​ റിപ്പോർട്ട്​ പറയുന്നു​. ഇതിൽ 10,000 ഓളം കഴിഞ്ഞ അഞ്ചു മാസത്തിനിടെ സ്​ഥാപിച്ചവയാണ്​. കോയിൻ ഫ്ലിപ്​, കോയിൻ ക്ലൗഡ്​ തുടങ്ങിയ സ്​ഥാപനങ്ങളാണ്​ എ.ടി.എമ്മുകളുടെ പ്രവർത്തനം നിയന്ത്രിക്കുന്നത്​. ലാസ്​ വെഗാസ്​ ആസ്​ഥാനമായുള്ള കോയിൻ ക്ലൗഡിനു മാത്രം 1,470 എ.ടി.എമ്മുകളുണ്ട്​. വർഷാവസാനമാകുന്നതോടെ അവയുടെ എണ്ണം 10,000 ആകുമെന്നാണ്​ കമ്പനി നൽകുന്ന സൂചന. കോയിൻഫ്ലിപിനു കീഴിൽ കഴിഞ്ഞ വർഷം 420 എ.ടി.എം ആയിരുന്നത്​ നടപ്പുവർഷം 1,800 ആയിട്ടുണ്ട്​. സമാനമാണ്​ മറ്റൊരു സ്​ഥാപനമായ ബിറ്റ്​കോയിൻ ഡിപ്പോയുടെ കണക്കുകൾ. ജനറൽ ബൈറ്റ്​സ്​ ആണ്​ ബിറ്റ്​കോയിൻ എ.ടി.എം നിർമാണത്തിൽ മുന്നിലുള്ള കമ്പനി.

ക്രിപ്​റ്റോകറൻസി ഇടപാടുകാർ ഓൺലൈൻ ഇടപാട്​ നിർത്തി എ.ടി.എമ്മിലേക്ക്​ തിരിയുന്നതിന്‍റെ എണ്ണം കുത്തനെ കൂടുന്നതാണ്​ എ.ടി.എമ്മുകൾ കുമിള കണക്കെ പുതുതായി രൂപമെടുക്കാൻ കാരണം. മിക്ക എ.ടി.എമ്മുകളും ബിറ്റ്​കോയിൻ ഇടപാട്​ മാത്രമേ അനുവദിക്കുന്നുള്ളൂ എങ്കിലും മറ്റു ക്രിപ്​​റ്റോകറൻസികൾക്കും ഇടപാട്​ അനുവദിക്കുന്നവയുണ്ട്​. ​ഡിജിറ്റൽ ഇടപാട്​ മാത്രമാണ്​ മിക്ക എ.ടി.എമ്മുകളിലും അനുവദിക്കുന്നത്​. പണമായി മാറ്റാനും ചിലയിടങ്ങളിൽ സൗകര്യമുണ്ട്​. െമാത്തം ഇടപാടിന്‍റെ അഞ്ചു ശതമാനം മുതൽ 20 ശതമാനം വരെയാണ്​ ഓരോ ഇടപാടിനും ഫീസ്​.

45 ശതമാനം വരെയാണ്​ പുതിയ എ.ടി.എമ്മുകളുടെ എണ്ണത്തിൽ വർധനയെന്ന്​ റിപ്പോർട്ടുകൾ പറയുന്നു. യു.എസിൽ അലാസ്​ക, വാഷിങ്​ടൺ ഡി.സി എന്നിവയിയൊഴികെ എല്ലാ സംസ്​ഥാനങ്ങളിലും എ.ടി.എം കിയോസ്​കുകൾ പ്രവർത്തിക്കുന്നുണ്ട്​.