വയർലെസ്സ്​ ബിസിനസ്​ ജിയോക്ക്​ വിൽക്കാനാവില്ല; അനിലിന്​ വീണ്ടും തിരിച്ചടി

ന്യൂഡൽഹി: റിലയൻസ്​ കമ്യൂണിക്കേഷ​​െൻറ വയർലെസ്​ ബിസിനസ് ജിയോക്ക്​​ വിൽക്കാനുള്ള നീക്കത്തിന്​ വീണ്ടും തിരിച്ചടി. ബിസനസ്​ വിൽക്കരുതെന്ന്​ കീഴ്​കോടതിയുടെ ഇടക്കാല ഉത്തരവ്​ ബോംബെ ഹൈകോടതി ശരിവെച്ചതോടെയാണ്​ അനിൽ അംബാനിക്ക്​ വീണ്ടും തിരിച്ചടി നേരിട്ടത്​. 

സ്വീഡിഷ്​ നിർമാതാക്കളായ എറിക്​സണും റിലയൻസ്​ കമ്യൂണിക്കേഷനും തമ്മിലാണ് ഇതുസംബന്ധിച്ച കേസിൽ​ തർക്കം നില നിന്നിരുന്നത്​. കേസിൽ എറിക്​സൺ തർക്ക പരിഹാര കോടതിയെ സമീപിക്കുകയായിരുന്നു. തുടർന്നാണ്​ ടെലികോം ബിസിനസ്​ വിൽക്കുന്നതിന്​ റിലയൻസിന്​ മേൽ തർക്കപരിഹാര കോടതി താൽക്കാലിക സ്​റ്റേ ഏർപ്പെടുത്തിയത്​. ഏകദേശം 1,012 കോടി രൂപ എറിക്​സണ്​ റിലയൻസ്​ നൽകാനുണ്ട്​. നഷ്​ടത്തിൽ ഉഴറുന്ന റിലയൻസ്​ കമ്യൂണിക്കേഷനെ സംബന്ധിച്ചടുത്തോളം കനത്ത തിരിച്ചടി നൽകുന്നതാണ്​ കോടതി വിധി.

റിലയൻസി​​െൻറ വയർലെസ്സ്​ ബിസിനസ്​ ജിയോക്ക്​ വിൽക്കാനാണ്​ അനിൽ അംബാനി പദ്ധതിയിട്ടിരുന്നത്​. സ്​പെ​ക്​ട്രം, ഫൈബർ ഒപ്​ടിക്​സ്​, ടവറുകൾ എന്നിവയുൾപ്പടെയുള്ള വയർലെസ്സ്​ ബിസിനസ്​ 25,000 കോടിക്ക്​ വിൽക്കാനായിരുന്നു കമ്പനിയുടെ പദ്ധതി. മാർച്ച്​ അവസാനത്തോടെ ഇടപാട്​ പൂർത്തിയാക്കാനായിരുന്നു ലക്ഷ്യമിട്ടത്​.