കോഗ്​നിസെൻറ്​ വീണ്ടും ജീവനക്കാരെ പിരിച്ചുവിടുന്ന​​ു

ബംഗളൂരു: ഐ.ടി കമ്പനിയായ കോഗ്​നിസ​െൻറ്​ വീണ്ടും ജീവനക്കാരെ പിരിച്ച്​ വിടാൻ ഒരുങ്ങുന്നു. 2019ൽ വളർച്ചാ നിരക്ക്​ കുറയുമെന്ന റിപ്പോർട്ടുകൾ പുറത്ത്​ വന്നതിന്​ പിന്നാലെയാണ്​ കമ്പനിയുടെ പുതിയ നീക്കം. 2019ൽ കോഗ്​നിസ​െൻറി​​െൻറ റവന്യു വരുമാനം 3.9 മുതൽ 4.9 ശതമാനം വരെ വർധിക്കുമെന്നാണ്​ റിപ്പോർട്ടുകൾ. എന്നാൽ 7 മുതൽ 9 ശതമാനം വരെ വളർച്ച കമ്പനിക്കുണ്ടാവുമെന്നായിരുന്നു നേരത്തെയുണ്ടായിരുന്ന വിലയിരുത്തൽ.

കോഗ്​നിസ​െൻറിനെ ​പ്രതിസന്ധിയിൽ നിന്ന്​ കരകയറ്റുന്നതി​നായി വിവിധ പദ്ധതികളെ കുറിച്ചുളള ചർച്ചകൾ നടക്ക​ുകയാണെന്ന്​ കമ്പനി വക്​താവ്​ അറിയിച്ചു. ജീവനക്കാരെ കുറക്കുന്നതിനെ കുറിച്ചും ചർച്ചകൾ നടക്കുകയാണ്​. എന്നാൽ, എത്രത്തോളം ജീവനക്കാരെ കുറക്കണമെന്നോ എപ്പോൾ വേണമെന്നോ അന്തിമതീരുമാനം എടുത്തിട്ടില്ലെന്നും കമ്പനി അറിയിച്ചു.

കഴിഞ്ഞ ആഗസ്​റ്റിൽ 200 മുതിർന്ന ജീവനക്കാരെ കോഗ്​നിസ​െൻറ്​ പിരിച്ചു വിട്ടിരുന്നു. ജുനിയർ ജീവനക്കാർക്ക്​ വളരാൻ അവസരങ്ങൾ നൽകുന്നതി​​െൻറ ഭാഗമായാണ്​ നടപടിയെന്നായിരുന്നു കോഗ്​നിസ​െൻറ്​ നൽകിയ വിശദീകരണം. 2017ൽ ജീവനക്കാരോട്​ സ്വമേധയാ പിരിഞ്ഞ്​ പോകാനും​ കമ്പനി ആവശ്യപ്പെട്ടിരുന്നു.