5,000 കോടിയുടെ ബിറ്റ്​കോയിൻ അഴിമതിയിൽ ബി.ജെ.പി നേതാക്കളും

ന്യൂഡൽഹി: ഗുജറാത്തിൽ 5,000 കോടിയുടെ ബിറ്റ്​കോയിൻ അഴിമതി നടന്നുവെന്ന ആരോപണവുമായി കോൺഗ്രസ്​. കള്ളപ്പണം വെളുപ്പിക്കുന്നതിനായി ബി.ജെ.പി നേതാക്കൾ ബിറ്റ്​കോയിൻ ഉപയോഗപ്പെടുത്തിയെന്നാണ്​ പാർട്ടി ആരോപിക്കുന്നത്​. സംഭവത്തിൽ സുപ്രീംകോടതിയുടെ മേൽനോട്ടത്തിൽ ജുഡീഷ്യൽ അന്വേഷണം വേണമെന്നും കോൺഗ്രസ്​  ആവശ്യപ്പെട്ടു.

ഗുജറാത്ത്​ സി.​െഎ.ഡിയുടെ കണക്കുകൾ അനുസരിച്ച്​ ഏകദേശം 5,000 കോടിയുടെ അഴിമതി നടന്നുവെന്ന് കോൺഗ്രസ്​ വക്​താവ്​​​ ശക്​തിസിൻഹ്​ ഗോഹിൽ മാധ്യമങ്ങളോട്​ പറഞ്ഞു. ചില സ്വതന്ത്ര ബ്ലോഗുകൾ 88,000 കോടി രൂപയുടെ ബിറ്റ്​കോയിൻ ഇടപാട്​ വരെ നടത്തിയെന്ന്​​ പറയുന്നുണ്ട്​. ഇടപാടുമായി ബന്ധപ്പെട്ട്​ ചില വ്യവസായികളെ ബി.ജെ.പി എം.എൽ.എമാർ ഭീഷണിപ്പെടുത്തിയെന്നും കോൺഗ്രസ്​ വക്​താവ്​ ആരോപിച്ചു.

നോട്ട്​ നിരോധനത്തി​​െൻറ പശ്​ചാത്തലത്തിൽ കള്ളപ്പണം വെളുപ്പിക്കുന്നതിനായാണ്​ ബി.ജെ.പി നേതാക്കൾ ബിറ്റ്​കോയിനിനെ ഉപയോഗപ്പെടുത്തിയത്​. അഹമ്മദാബാദ്​ ജില്ലാ സഹകരണ ബാങ്കിൽ വൻ തുക നോട്ട്​ നിരോധനത്തിന്​ ശേഷം നിക്ഷേപിക്കപ്പെട്ടതിനെ കുറിച്ച്​ ബി.ജെ.പി മറുപടി പറയണം. വിവിധ തലങ്ങളിലാണ്​ ഗുജറാത്തിലെ ബിറ്റ്​കോയിൻ അഴിമതി നടന്നത്​. ബിറ്റ്​കോയിൻ അഴിമതിയിൽ സർക്കാർ എജൻസികൾക്കും പങ്കുണ്ടെന്നും കോൺഗ്രസ്​ ആരോപിക്കുന്നു.

ഇന്ത്യയിൽ ബിറ്റ്​കോയിൻ ഇടപാടുകൾക്ക്​ നിരോധനം ഏർപ്പെടുത്തി നേരത്തെ ആർ.ബി.​െഎ ഉത്തരവ്​ പുറപ്പെടുവിച്ചിരുന്നു. നിരവധി തവണ ആവശ്യങ്ങളുയർന്നിട്ടും നിരോധനം നീക്കാൻ ആർ.ബി.​െഎ തയാറായിരുന്നില്ല. ഇതിന്​ പിന്നാലെയാണ്​ ഗുജറാത്തിലെ വൻ ബിറ്റ്​കോയിൻ ഇടപാട്​ സംബന്ധിച്ച ആരോപണങ്ങൾ പുറത്ത്​ വരുന്നത്​.