ആമസോണിനെ തകർക്കാനുള്ള നീക്കം അംബാനിക്ക്​ വേണ്ടിയോ?

മുംബൈ: ഇന്ത്യൻ ഒാൺലൈൻ ഷോപ്പിങ്​ വിപണിയിലെ കിരീടം വെക്കാത്ത രാജാക്കൻമാരായിരുന്നു ആമസോണും ഫ്ലിപ്​കാർട്ടും. ഫ്ലിപ്​കാർട്ടിൽ വാൾമാർട്ട്​ നിക്ഷേപം നടത്തിയതോടെ ഒാൺലൈൻ ഷോപ്പിങ്​ മേഖലയിൽ വിദേശികൾ തമ്മിലായി പ്രധാന പോര ്​. എന്നാൽ, വിദേശ ഒാൺലൈൻ ഷോപ്പിങ്​ സൈറ്റുകൾക്ക്​ കടിഞ്ഞാണിടാനുള്ള കേന്ദ്രസർക്കാറി​​െൻറ നീക്കം ഇരു കമ്പനികൾക ്കും തിരിച്ചടിയാവുകയാണ്​​.

ഇന്ത്യയിലെ ചെറുകിട കച്ചവടക്കാർക്ക്​ വേണ്ടിയാണ്​ ഒാൺലൈനിലെ വിദേശികളുടെ കച്ചവടം നിയന്ത്രിക്കാൻ കേന്ദ്രസർക്കാർ ഒരുങ്ങിയതെന്നാണ്​ റിപ്പോർട്ടുകൾ. ഹിന്ദി ഹൃദയഭൂമിയിലുൾപ്പടെ തിരിച്ചടി നേരിട്ടതോടെ പാർട്ടിയുടെ പ്രധാന വോട്ട്​ ബാങ്കായ ചെറുകിട കച്ചവടക്കാരെ ഒപ്പംനിർത്താനുമാണ്​ പുതിയ നീക്കമെന്നും വിലയിരുത്തലുകളുണ്ടായി. എന്നാൽ, ആത്യന്തികമായി മോദിയുടെ നീക്കം റിലയൻസിനും മുകേഷ്​ അംബാനിക്കും മാത്രമാവും ഗുണം ചെയ്യുകയെന്നാണ്​ മേഖലയിലെ വിദഗ്​ധർ അഭിപ്രായപ്പെടുന്നത്​.

ഇന്ത്യയിലെ റീടെയിൽ വിപണിയിൽ റിലയൻസിനോളം സ്വാധീനമുള്ള മറ്റൊരു കമ്പനിയില്ല. ചെറുനഗരങ്ങളിലുൾപ്പടെ റിലയൻസ്​ സ്വാധീനം ഉറപ്പിച്ചിട്ടുണ്ട്​. ടെലികോം മേഖലയിൽ റിലയൻസിനെ വെല്ലാൻ മറ്റാരുമില്ല. ഇതും രണ്ട്​ ചേർത്ത്​ പുതിയ ഒാൺലൈൻ ഷോപ്പിങ്​ സൈറ്റിന്​ തുടക്കം കുറിക്കാനാണ്​ അംബാനിയുടെ പദ്ധതി. നിലവിലുള്ള ഒാൺലൈൻ ഷോപ്പിങ്​ സൈറ്റായ 'എജിയോ'യുടെ വിപുലീകരണമായിരിക്കും റിലയൻസ്​ നടത്തുകയെന്നും റിപ്പോർട്ടുകളുണ്ട്​. വിദേശ ഒാൺലൈൻ ഷോപ്പിങ്​ സൈറ്റുകൾ തകരുന്നതോടെ റിലയൻസിന്​ എതിരാളികളില്ലാത്ത സ്ഥിതിയാവും. മൽസരമില്ലാതെ തന്നെ വിപണി പിടിക്കാൻ അംബാനിക്ക്​ കഴിയും.

റിലയൻസ്​ റീടെയിലി​​െൻറ സാന്നിധ്യം ചില നഗരങ്ങളിലെങ്കിലും ചെറുകിട കച്ചവടക്കാർക്ക്​ വെല്ലുവിളിയാവുന്നുണ്ട്​. ഇതിന്​ പുറമേയാണ്​ ഒാൺലൈൻ ഷോപ്പിങ്​ രംഗത്തേക്ക്​ കൂടിയുള്ള കമ്പനിയുടെ ചുവടുവെപ്പ്​. ചുരുക്കത്തിൽ ചെറുകിട വ്യാപാരികൾക്ക്​ വേണ്ടിയെന്ന പേരിൽ റിലയൻസിന്​ കളംമൊരുക്കാനാണ്​ മോദി സർക്കാറി​​െൻറ നീക്കം.