ഇന്ത്യൻ സമ്പദ്​വ്യവസ്ഥയിലെ ചൈനീസ്​ നിക്ഷേപം; കണക്കുകൾ പറയുന്നതിങ്ങനെ?

ന്യൂഡൽഹി: 45 വർഷത്തിന്​ ശേഷമുള്ള ഏറ്റവും വലിയ സംഘർഷമാണ്​ ഇന്ത്യയും ചൈനയും തമ്മിൽ നിയന്ത്രണരേഖയിലുണ്ടായത്​. ഇതേതുടർന്ന്​ ചൈനീസ്​ ഉൽപന്നങ്ങൾ ബഹിഷ്​കരിക്കണമെന്ന ആവശ്യം മു​മ്പത്തേക്കാൾ ശക്​തമാണ്​. എന്നാൽ, ഇന്ത്യൻ സമ്പദ്​വ്യവസ്ഥയിൽ വലിയ നിക്ഷേപമാണ്​ ചൈനീസ്​ കമ്പനികൾക്കുള്ളതെന്നത്​ യാഥാർഥ്യമാണ്​.

2008ലെ ആഗോള സാമ്പത്തിക പ്രതിസന്ധിക്ക്​ ശേഷമാണ്​ ചൈനയെ ലോകരാജ്യങ്ങൾ കൂടുതലായി ആശ്രയിച്ച്​ തുടങ്ങിയത്​. മിഡിൽ ഈസ്​റ്റ്​ രാജ്യങ്ങളിലെ യുദ്ധം യു.എസിൻെറ സാമ്പത്തിക സ്ഥിതിയെ ബാധിച്ചതും ചൈനയുടെ ഉയർച്ചക്ക്​ കാരണമായി. ഇന്ന്​ ഏതാണ്ട്​ എല്ലാ രാജ്യങ്ങൾക്കും ചൈനയുമായി വ്യാവസായിക ബന്ധങ്ങളുണ്ട്​.

നേരിട്ടുള്ള വിദേശനിക്ഷേപം വഴി 2.34 ബില്യൺ ഡോളർ ചൈന ഇന്ത്യയിൽ നിക്ഷേപിച്ചിട്ടുണ്ടെന്നാണ്​ സാമ്പത്തിക വിദഗ്​ധർ വ്യക്​തമാക്കുന്നത്​. എന്നാൽ, മറ്റ്​ ചില കണക്കുകളിൽ നിക്ഷേപം 6 ബില്യൺ ഡോളർ വരെയാണെന്നും കണക്കാക്കുന്നു.

ചൈനീസ്​ വിനോദസഞ്ചാരികൾ വഴി പ്രതിവർഷം 5.5 കോടി മില്യൺ​ ഡോളറും ഇന്ത്യയിലെത്തുന്നുണ്ട്​. ആലിബാബ, ഷവോമി, ടെൻസ​​​െൻറ്​, ചൈന-യുറേഷ്യ ഇക്കണോമിക്​ കോർപ്പറേഷൻ ഫണ്ട്​, ദിദി ചുസിങ്​, ഷുൻവേ കാപ്പിറ്റൽ, ഫോസൺ കാപ്പിറ്റൽ തുടങ്ങിയ ചൈനീസ്​ സ്ഥാപനങ്ങൾക്കെല്ലാം ഇന്ത്യയിൽ നിക്ഷേപമുണ്ട്​. 

പേടിഎം, ഒല, സ്​നാപ്​ഡീൽ, സ്വിഗ്ഗി തുടങ്ങിയ കമ്പനികളെല്ലാം പ്രവർത്തിക്കുന്നത്​ ചൈനീസ്​ നിക്ഷേപത്തോടെയാണ്​. കഴിഞ്ഞ അഞ്ച്​ വർഷത്തിനിടെ 5.5 ബില്യൺ ഡോളർ ഇന്ത്യൻ സ്​റ്റാർട്ട്​ അപ്​ കമ്പനികളിൽ ചൈന നിക്ഷേപിച്ചുവെന്നാണ്​ കണക്കുകളിൽ നിന്ന്​ വ്യക്​തമാക്കുന്നത്​. 

കഴിഞ്ഞ ഒരു വർഷത്തിനിടെ മാത്രം ചൈനയിലേക്ക്​ ഇന്ത്യയിൽ നിന്നുള്ള കയറ്റുമതിയിൽ രേഖപ്പെടുത്തിയ വർധന 23 ശതമാനമാണ്​. പ്രതിവർഷം 4.5 ശതമാനം വർധനയുണ്ടായിരുന്ന സ്ഥാനത്താണ്​ ഇന്ത്യ-ചൈന വ്യാപാരം വീണ്ടും ഉയർന്നത്​.
ടെലികോം മേഖലയിൽ 5ജി കൂടി എത്തുന്നതോടെ ഇന്ത്യൻ സമ്പദ്​വ്യവസ്ഥയിലെ ചൈനീസ്​ സാന്നിധ്യം കൂടുതൽ ശക്​തമാകും. അമേരിക്കയുടെ എതിർപ്പ്​ അവഗണിച്ചാണ്​ ചൈനീസ്​ കമ്പനിയായ വാവേയ്​ക്ക്​ ഇന്ത്യ 5ജി പരീക്ഷണത്തിന്​ അനുമതി നൽകിയത്​.  നിയന്ത്രണരേഖയിലെ സംഘർഷത്തെ തുടർന്ന്​ സമ്പദ്​വ്യവസ്ഥയിലെ ​ചൈനീസ്​ സാന്നിധ്യം ഒഴിവാക്കുകയാണെങ്കിൽ അത്​ വലിയ പ്രത്യാഘാതമായിരിക്കും ഇന്ത്യയിൽ സൃഷ്​ടിക്കുക.

LATEST VIDEO