വരുമാനം മുന്നോട്ട്​; വളർച്ചനിരക്ക്​ പിന്നോട്ട്​ 

വിനോദസഞ്ചാരികളിൽനിന്ന്​ കഴിഞ്ഞവർഷം കേരളത്തിന്​ ലഭിച്ച വരുമാനം 29,658.56 കോടി രൂപ. 2016ൽ കേരളം സന്ദർശിച്ചത് 10,38,419 വിദേശികൾ. 2015ലെ 9,77,479 എന്ന എണ്ണത്തേക്കാൾ 6.23 ശതമാനം കൂടുതൽ. വിദേശസഞ്ചാരികളിൽനിന്ന്​ കേരളത്തിന്​ ലഭിച്ച വിദേശനാണ്യം 7749.51 കോടി. മുൻവർഷത്തെ ​അപേക്ഷിച്ച്​ വർധനവ്​ 11.51 ശതമാനം.  2016ൽ കേരളം സന്ദർശിച്ച അഭ്യന്തര വിനോദസഞ്ചാരികളുടെ എണ്ണം 1,31,72,535. മുൻ വർഷത്തിലെ 1,24,65,571നേക്കാൾ 5.67ശതമാനം വർധനവ്​. കണക്കുകളിൽ ഇങ്ങനെ വർധനവുണ്ടെങ്കിലും വിനോദസഞ്ചാര രംഗത്തെ വളർച്ചയിൽ ദേശീയ ശരാശരിയേക്കാൾ കേരളം പിന്നോട്ടുപോയി എന്നതാണ്​ ആശങ്കയുണർത്തുന്ന വസ്​തുത.

കഴിഞ്ഞ വർഷം വിനോദസഞ്ചാര രംഗത്തെ വളർച്ചയു​െട ദേശീയ ശരാശരി 10.2 ശതമാനമായിരുന്നുവെങ്കിൽ കേരളത്തിൽ ഇത്​ 7.6 ​ശതമാനം മാത്രം. 2011ൽ 11 ശതമാനമായിരുന്ന സ്​ഥാനത്തുനിന്നാണ്​ 7.6 ശതമാനത്തിലേക്ക് കൂപ്പുകുത്തിയത്​. 2014ൽ ദേശീയ ശരാശരിയേക്കാൾ മുകളിൽനിന്ന സ്​​ഥാനത്തുനിന്നാണ്​ തിരിച്ചിറക്കം. കേന്ദ്ര വിനോദസഞ്ചാര വകുപ്പി​​​െൻറ തലപ്പത്ത്​ മന്ത്രിയായി മലയാളിയായ അൽഫോൻസ്​ കണ്ണന്താനം എത്തു​േമ്പാൾ കേരളത്തിലെ വിനോദസഞ്ചാര രംഗം ഒരു​ തിരിച്ചുകയറ്റം പ്രതീക്ഷിക്കുന്നു. കൂടുതൽ പദ്ധതികളും കേന്ദ്ര ഫണ്ടും എത്തുമെന്ന പ്രതീക്ഷയിൽ. 

വടക്കോട്ടും വേണം വികസനം
വിനോദസഞ്ചാര രംഗത്തെ പദ്ധതികളിൽ ഏറെയും മധ്യ^ദക്ഷിണ കേരളത്തിൽ കേന്ദ്രീകരിക്കപ്പെടുന്നുവെന്നതാണ്​ ‘ദൈവത്തി​​​െൻറ സ്വന്തം നാട്​’ എന്ന്​ വിശേഷിപ്പിക്കപ്പെടുന്ന കേരളത്തിലെ പ്രധാന പോരായ്​മയെന്ന്​ ഇൗ രംഗത്തു പ്രവർത്തിക്കുന്നവർ പറയുന്നു. കേരളത്തിലെത്തുന്ന വിദേശികളടക്കം വിനോദസഞ്ചാരികളുടെ മുന്നിൽ ഉത്തര കേരളത്തിലെ സഞ്ചാര സാധ്യതകൾ തുറന്നുകാട്ടപ്പെടുന്നില്ല. മിക്ക ടൂറിസം പാക്കേജുകളും കൊച്ചിയിൽനിന്ന്​ മൂന്നാർവഴി കോവളത്തേക്ക്​ മാത്രം നീളുന്ന വിധത്തിൽ ക്രമീകരിക്കപ്പെടുന്നവയാണ്​. 

വിനോദസഞ്ചാരികളെ മധ്യകേരളത്തിൽനിന്ന്​ വടക്കോട്ട്​ ആകർഷിക്കാൻ കേരള വിനോദ സഞ്ചാര വകുപ്പുതന്നെ പദ്ധതികൾ ആസൂത്രണം ചെയ്​തിരുന്നു. കൊടുങ്ങല്ലൂർ മുസിരിസ്​ പദ്ധതി മുതൽ കണ്ണൂരിലെ വിവിധ വിനോദസഞ്ചാര മേഖലകൾ വരെ ബന്ധിപ്പിക്കുന്ന പദ്ധതികളാണ്​ ആലോചിച്ചിരുന്നത്​. പക്ഷേ, ആലോചനക്കപ്പുറത്തേക്ക്​ കാര്യങ്ങൾ ഇനിയും എത്തിയിട്ടില്ല. 

പൈതൃക ടൂറിസം രംഗത്ത് കേരളം മുന്നോട്ടുവെച്ച പ്രമുഖ ആകർഷണമായ ‘മുസിരിസ്​ പദ്ധതി’ ഇനിയും പൂർത്തിയാകാത്തതാണ്​ മുഖ്യ പോരായ്​മ. കഴിഞ്ഞ അഞ്ചുവർഷത്തിനിടെ 100 കോടി രൂപ മുടക്കിയെങ്കിലും ഇപ്പോഴും നിർമാണ വഴിയിൽതന്നെയാണ്​. പദ്ധതിയുടെ ഭാഗമായി 20 മ്യൂസിയങ്ങളാണ് നിർമിക്കാൻ പദ്ധതിയിട്ടത്. ഇതിൽ പകുതിപോലും പൂർത്തീകരിക്കപ്പെട്ടില്ല. ഇതോ​െടാപ്പം കോട്ടപ്പുറം, പറവൂർ മാർക്കറ്റുകൾ പഴയകാലത്തേതുപോലെ പുനരാവിഷ്​കരിക്കുക, മുസിരിസ്​ പ്രദേശത്തെ പഴയകാല ആരാധനാലയങ്ങൾ, പുരാതന വ്യാപാരകേന്ദ്രങ്ങൾ, ഇതര കെട്ടിടങ്ങൾ തുടങ്ങിയവ പുനഃസ്​ഥാപിക്കുക തുടങ്ങിയവയൊക്കെ പദ്ധതിയിലുണ്ട്​. പക്ഷേ, 100 കോടിയെങ്കിലും ഇനിയും മുടക്കിയാലേ ഇതൊക്കെ സാധ്യമാകൂ. 

ഉത്തര കേരളത്തിൽ ബേക്കൽ കോട്ട, കണ്ണൂർ മുഴുപ്പിലങ്ങാട് ബീച്ച് പോലെ നിരവധി കേന്ദ്രങ്ങൾ സാധ്യതകളേറെയുള്ള സ്​ഥലങ്ങളാണെന്ന്​ വി​േനാദസഞ്ചാര വകുപ്പ്​ കണ്ടെത്തിയിട്ടുണ്ട്​. സമഗ്ര വികസന പദ്ധതികളും മുതൽ മുടക്കും മാത്രമില്ല.

സംരംഭകർ മുന്നോട്ടുവെക്കുന്ന നിർദേശങ്ങൾ

• വിനോദസഞ്ചാര കേന്ദ്രങ്ങൾ വൃത്തിയുള്ളതാക്കുക.
• വിനോദസഞ്ചാര മേഖലകളിലേക്കുള്ള റോഡുകൾ യാത്രാ യോഗ്യമാക്കുക.
• വിമാനത്താവളങ്ങൾ, റെയിൽവേ സ്​റ്റേഷനുകൾ, ബസ്​ സ്​റ്റാൻഡുകൾ എന്നിവിടങ്ങളിൽ ഹെൽപ് ഡെസ്​ക്കുകൾ സ്​ഥാപിക്കുക. യാത്രാമാർഗം, നിരക്ക്​, സൗകര്യങ്ങൾ എന്നിവ സംബന്ധിച്ച്​ വിശദീകരണം നൽകുക. 
• പ്രധാന കേന്ദ്രങ്ങളിൽ വിദേശഭാഷ വിദഗ്​ധരുടെ സേവനം ലഭ്യമാക്കുക. 
• ഭിന്നശേഷിക്കാരായ വിനോദസഞ്ചാരികളെ സഹായിക്കാൻ സൗകര്യങ്ങളൊരുക്കുക.
• ശ്രവണശേഷി ഇല്ലാത്തവർക്ക് സൈൻ ലാംഗ്വേജ് വിദഗ്​ധരുടെ സേവനം ലഭ്യമാക്കുക.
• ഹോം സ്​റ്റേകൾ, റിസോർട്ടുകൾ എന്നിവയുടെ പ്രവർത്തനം ഉത്തരവാദിത്ത പൂർണവും കാര്യക്ഷമവുമാക്കുക.

പേരുദോഷവും മാറ്റണമെന്ന്​ പഠനം
7.6 ശതമാനത്തിലേക്ക്​ വളർച്ചനിരക്ക്​ കുറഞ്ഞത്​ സംബന്ധിച്ച്​ വിനോദസഞ്ചാര വകുപ്പിന് കീഴിലുള്ള ഗവേഷണസംഘം പഠനം നടത്തിയിരുന്നു. വിവിധ കാരണങ്ങളാണ്​ കണ്ടെത്തിയത്​. ഇതിൽ മുഖ്യം  ശുചിത്വക്കുറവ് സംബന്ധിച്ച പേരുദോഷം. സംസ്​ഥാനത്തെ മുഖ്യ ആകർഷണമായ കായൽ യാത്രകളിൽ വിനോദസഞ്ചാരികൾ കാണുന്നത്​ വെള്ളത്തിലൂടെ ഒഴുകുന്ന മാലിന്യങ്ങളും തീരത്ത്​ വന്നടിഞ്ഞ മാലിന്യക്കൂമ്പാരങ്ങളുമാണ്​. 

രൂക്ഷ ദുർഗന്ധമുള്ള കോഴി മാലിന്യങ്ങളടക്കം ചാക്കിൽകെട്ടി കായലിലേക്ക്​ വലിച്ചെറിയുന്നവർ ചെയ്യുന്നത്​ വിനോദസഞ്ചാരത്തി​​െൻറ കടക്കൽ കത്തിവെക്കുക കൂടിയാണ്​. ഇതോടൊപ്പം തകർന്ന റോഡുകളും ഗതാഗത സൗകര്യങ്ങളുടെ നിലവാരമില്ലായ്​മയും തിരിച്ചടിക്ക്​ കാരണമാകുന്നുണ്ട്​​.