ആദിത്യ ഘോഷ്​ ഇൻഡിഗോ പ്രസിഡൻറ്​ സ്ഥാനമൊഴിഞ്ഞു

മുംബൈ: ഇന്ത്യയിലെ പ്രമുഖ വിമാന കമ്പനികളിലൊന്നായ ഇൻഡിഗോയുടെ പ്രസിഡൻറ്​ സ്ഥാനം ആദിത്യ ഘോഷ്​ ഒഴിഞ്ഞു. 2018 ജൂലൈ 31ന്​ മുമ്പ്​ കമ്പനി വിടുമെന്നും ആദിത്യ ഘോഷ്​ വ്യക്​തമാക്കിയിട്ടുണ്ട്​. കമ്പനിയുടെ പ്രൊമോട്ടർമാരിലൊരാളായ രാഹുൽ ഭാട്ടിയയെ ഇടക്കാല സി.ഇ.ഒയാക്കാൻ ഇൻ​ഡിഗോ തീരുമാനിച്ചിട്ടുണ്ട്​.

പ്രധാനമായും രണ്ട്​ പ്രശ്​നങ്ങളാണ്​ ആദിത്യ ഘോഷ്​ കമ്പനി വിടുന്നതിലേക്ക്​ നയിച്ചതെന്നാണ്​ സൂചന. ഇൻഡിഗോയുടെ എയർബസ്​ എ320 നിയോ വിമാനങ്ങൾക്ക് ഡയറക്​ടറേറ്റ്​ ജനറൽ ഒാഫ്​​ സിവിൽ ഏവിയേഷൻ അനുമതി നിഷേധിച്ചത്​ കമ്പനിയെ കടുത്ത പ്രതിസന്ധിയിലേക്ക്​ നയിച്ചിരുന്നു. ഇതിനൊപ്പം ജീവനക്കാരുടെ പെരുമാറ്റം സംബന്ധിച്ച വിവാദങ്ങളും തിരിച്ചടിയായി. 

ഭാട്ടിയ ​രാജിവെച്ചതോടെ ഒഴിവ്​ വരുന്ന സ്ഥാനത്തേക്ക്​ എക്​സിക്യുട്ടീവ്​ വൈസ്​ പ്രസിഡൻറ്​ ഗ്രിഗറി ടെയ്​ലറിനെ നിയമിക്കാൻ കമ്പനിക്ക്​ പദ്ധതിയുണ്ട്​. സ്​പൈസ്​ ജെറ്റ്​, ഗോ എയർ തുടങ്ങിയ കമ്പനികളിൽ നിന്ന്​ കടുത്ത മൽസരം നേരിടു​േമ്പാഴും 39.5 ശതമാനം വിപണി വിഹിതം നില നിർത്താൻ ഇൻഡിഗോക്ക്​ സാധിച്ചിട്ടുണ്ട്​​.