ജനങ്ങളുടെ ആരോഗ്യമാണ്​ വലുത്​; ആർ.ബി.ഐക്കെതിരെ സുപ്രീംകോടതി

ന്യൂഡൽഹി: മൊറ​ട്ടോറിയം കാല​ത്ത്​ വായ്​പകൾക്ക്​ പലിശ​ ഈടാക്കുന്നതുമായി ബന്ധപ്പെട്ട കേസിൽ ആർ.ബി.ഐക്കെതിരെ സു​പ്രീംകോടതി. സമ്പദ്​വ്യവസ്ഥയുടെ ആഘാതത്തേക്കാൾ വലുത്​​ ജനങ്ങളുടെ ആരോഗ്യമാണെന്ന്​ കേസ്​ പരിഗണിക്കുന്നതിനിടെ സുപ്രീംകോടതി നിലപാടെടുത്തു. മൊറ​ട്ടോറിയം കാലഘട്ടത്തിൽ പലിശ ഒഴിവാക്കുന്നതിനെതിരെ ആർ.ബി.ഐ സുപ്രീംകോടതിയിൽ സത്യവാങ്​മൂലം സമർപ്പിച്ചിരുന്നു.

പലിശ ഒഴിവാക്കിയാൽ ബാങ്കുകൾക്ക്​ രണ്ട്​ ലക്ഷം കോടിയുടെ നഷ്​ടമുണ്ടാവുമെന്ന്​ ആർ.ബി.ഐ സുപ്രീംകോടതിയെ അറിയിച്ചു. ഇത്​ ബാങ്കുകളെ സാമ്പത്തികമായി തകർക്കുമെന്നും ആർ.ബി.ഐ സത്യവാങ്​മൂലത്തിൽ ചൂണ്ടിക്കാട്ടി.

മൊറ​ട്ടോറിയം കാലയളവിൽ പലിശ ഒഴിവാക്കി നൽകണമെന്ന്​ ആവശ്യപ്പെട്ട്​ ഗജേന്ദ്ര ശർമ്മയെന്നയാളാണ്​ സുപ്രീംകോടതിയെ സമീപിച്ചത്​. ഉത്തർപ്രദേശിലെ ആഗ്രയിൽ കണ്ണട കട നടത്തുന്ന ശർമ്മ ഐ.സി.ഐ.സി.ഐ ബാങ്കിൽ നിന്ന്​ 37 ലക്ഷം രൂപയാണ്​ വായ്​പയെടുത്തത്​. ആഗസ്​റ്റ്​ 31 വരെയാണ്​ ആർ.ബി.ഐ മൊറ​ട്ടോറിയം നീട്ടിയത്​.