കറുത്ത വെള്ളിയായില്ല; തിരിച്ച്​ കയറി ഓഹരി വിപണി

മുംബൈ: ചരിത്രത്തിലെ ഏറ്റവും വലിയ തകർച്ചയിൽ നിന്ന്​ കരകയറി സെൻസെക്​സും നിഫ്​റ്റിയും. ബോംബെ സൂചിക സെൻസെക്​സ് ​ 1,325 പോയിൻറ്​ നേട്ടത്തോടെയും ദേശീയ സൂചിക നിഫ്​റ്റി 365 പോയിൻറ്​ നേട്ടത്തോടെയും വ്യാപാരം അവസാനിച്ചു. 10 ശതമാനം നഷ്​ടത്തോടെ വ്യാപാരം ആരംഭിച്ച ഇരു സൂചികകളും പിന്നീട്​ വൻ തിരിച്ചു വരവാണ്​ ​നടത്തിയത്​. സൂചികകൾ ഒരു ദിവസം നടത്തുന്ന ഏറ്റവും വലിയ തിരിച്ചു വരവാണ്​ വെള്ളിയാഴ്​ചയുണ്ടായത്​.

എച്ച്​.ഡി.എഫ്​.സി, എസ്​.ബി.ഐ, റിലയൻസ്​ ഇൻഡസ്​ട്രീസ്​ തുടങ്ങിയ ഓഹരികളെല്ലാം വിപണിയിൽ നേട്ടമുണ്ടാക്കി. വെള്ളിയാഴ്​ച വ്യാപാരം ആരംഭിച്ചപ്പോൾ വൻ നഷ്​ടം നേരിട്ട നിഫ്​റ്റി പി.എസ്​.യു ബാങ്ക്​ ഇൻഡക്​സ്​ 30 ശതമാനമാണ്​ പിന്നീട്​ ഉയർന്നത്​​. ബാങ്കിങ്​ സ്​റ്റോക്കുകളിലുണ്ടായ ഷോട്ട്​ കവറിങ്ങാണ്​ വിപണികളിൽ നേട്ടത്തിനുണ്ടായ കാരണം. അതേസമയം, പ്രധാനപ്പെട്ട ഏഷ്യൻ ഓഹരികളെല്ലാം നഷ്​ടത്തിലാണ്​ വ്യാപാരം നടത്തുന്നത്​. നിക്കി, ഷാങ്​ഹായ്​, കോസപി, ഹാങ്​സാങ്​ തുടങ്ങിയ സൂചികകളെല്ലാം നഷ്​ടത്തിലാണ്​.

സംഭവബഹുലമായിരുന്നു വെള്ളിയാഴ്​ച ഇന്ത്യൻ ഓഹരി വിപണികൾ. വ്യാപാരം ആരംഭിച്ചയുടൻ 10 ശതമാനം നഷ്​ടം രേഖപ്പെടുത്തിയതോടെ വിപണികളിൽ 45 മിനിട്ട്​ നേരത്തേക്ക്​ വ്യാപാരം നിർത്തി. പിന്നീട്​ വ്യാപാരം പുനഃരാരംഭിച്ചപ്പോൾ വിപണി വൻ മുന്നേറ്റം നടത്തുകയായിരുന്നു.