ഫ്ലിപ്​കാർട്ടിൽ നിന്ന്​ സച്ചിൻ ബൻസാൽ വിട പറഞ്ഞു

മുംബൈ: ഫ്ലിപ്​കാർട്ടി​​െൻറ 77 ശതമാനം ഒാഹരികൾ വാൾമാർട്ടിന്​ വിറ്റതിന്​ പിന്നാലെ സഹസ്ഥാപകൻ സചിൻ ബൻസാൽ സ്ഥാപനത്തിൽ നിന്ന്​ പടിയിറങ്ങി. ഫ്ലിപ്​കാർട്ടിലെ ത​​െൻറ ദൗത്യം പൂർത്തിയായതായി സചിൻ പറഞ്ഞു. ഇത്​ ബാറ്റൺ കൈമാറേണ്ട സമയമാണ്​. എങ്കിലും പുറത്ത്​ നിന്ന്​ ഇനിയും ഫ്ലിപ്​കാർട്ടി​​െൻറ വളർച്ചയിൽ സന്തോഷിക്കുമെന്ന്​ സചിൻ ബൻസാൽ ഫേസ്​ബുക്ക്​ പോസ്​റ്റിൽ വ്യക്​തമാക്കി.

ഭാവിയിൽ വ്യക്​തിപരമായ ചില പ്രൊജക്​ടുകളുമായി മുന്നോട്ട്​ പോകാനാണ്​ താൽപര്യം. ഗെയിമിങിലുൾപ്പടെ ശ്രദ്ധകേന്ദ്രീകരിക്കുമെന്നും സചിൻ ബൻസാൽ പറഞ്ഞു.

സചിൻ ബൻസാലിനും ബിന്നി ബൻസാലിനും ഫ്ലിപ്​കാർട്ടിൽ ഏകദേശം 5 ശതമാനം ഒാഹരി പങ്കാളിത്തമാണ്​ ഉണ്ടായിരുന്നത്​. ഏകദേശം 1 ബില്യൺ ഡോളർ നൽകിയാണ്​ ഇരുവരുടെയും ഒാഹരികൾ വാൾമാർട്ട്​ വാങ്ങിയതെന്നാണ്​ റിപ്പോർട്ട്​. ഇടപാടിന്​ ശേഷവും ബിന്നി ഫ്ലിപ്​കാർട്ടിൽ തുടരുമെന്ന്​ അറിയിച്ചിട്ടുണ്ട്​. ഡൽഹി ​​െഎ.​െഎ.ടിയിലെ സഹപാഠികളായിരുന്ന സചിനും ബിന്നിയും ചേർന്ന്​ 2007ലാണ്​ ബംഗളൂരുവിൽ ഫ്ലിപ്​കാർട്ട്​ ആരംഭിച്ചത്​.