സ്റ്റാർട്ടപുകൾക്ക് 250 കോടി വെഞ്ച്വര്‍ കാപിറ്റല്‍ ഫണ്ട്

തിരുവനന്തപുരം: കേരളത്തിലെ സ്റ്റാര്‍ട്ടപ്പുകളുടെ വളര്‍ച്ചക്ക് സര്‍ക്കാര്‍ സ്‌പോണ്‍സര്‍ ചെയ്യുന്ന വെഞ്ച്വര്‍ കാപിറ്റല്‍ ഫണ്ട് സജ്ജീകരിക്കാൻ മന്ത്രിസഭ യോഗം തീരുമാനിച്ചു. 2021-22 ലെ ബജറ്റിന്‍റെ അടിസ്ഥാനത്തിലാണിത്. ചെറുകിട സംരംഭങ്ങളുടെയും സ്റ്റാര്‍ട്ടപുകളുടെയും വളര്‍ച്ചക്കാണ് വെഞ്ച്വര്‍ കാപിറ്റല്‍ ഫണ്ട് ആരംഭിക്കുന്നത്.

പ്രാരംഭ ചെലവിനായി ഒരു കോടി രൂപ വകയിരുത്തിയിരുന്നു. 250 കോടി രൂപയുടെ ഫണ്ട് സമാഹരിക്കാനുള്ള നിർദേശമാണ് മുന്നോട്ടുവെക്കുന്നത്.

സര്‍ക്കാറിനുവേണ്ടി കെ.എഫ്.സി, കെ.എസ്.എഫ്.ഇ, കെ.എസ്.ഐ.ഡി.സി എന്നീ ഏജന്‍സികള്‍ അല്ലെങ്കില്‍ കേരള സര്‍ക്കാര്‍ ഉടമസ്ഥതയിലുള്ള/നിയന്ത്രണത്തിലുള്ള മറ്റേതെങ്കിലും ധനകാര്യ സ്ഥാപനങ്ങള്‍ എന്നിവയില്‍നിന്ന് സംയുക്തമായി സ്‌പോണ്‍സര്‍ ചെയ്യുന്ന ട്രസ്റ്റായാണ് ഫണ്ട് രൂപവത്കരിക്കുക.