ചെറുകിട-ഇടത്തരം വ്യവസായങ്ങൾക്കായി 1,873 കോടിയുടെ സഹായം പ്രഖ്യാപിച്ച്​ ആമസോൺ

ന്യൂഡൽഹി: ​ഇന്ത്യയിലെ ചെറുകിട-ഇടത്തരം വ്യവസായങ്ങൾക്കായി 1,873 കോടി രൂപയുടെ സഹായം പ്രഖ്യാപിച്ച്​ ആമസോൺ. വ്യവസായങ്ങളുടെ ഡിജിറ്റൽവൽക്കരണത്തിനും കാർഷിക, ആരോഗ്യ വ്യവസായ രംഗത്തെ പുതിയ സംരംഭങ്ങൾക്കുമായാണ്​ തുക ചെലവഴിക്കുക.

എല്ലാ സമ്പദ്​വ്യവസ്ഥകളുടേയും ഇന്ധനം ചെറുകിട-ഇടത്തരം വ്യവസായങ്ങളാണ്​. ഇന്ത്യയിൽ ഇത്​ വളരെ കൃത്യവുമാണ്​. അതുകൊണ്ടാണ്​ മേഖലക്കായി സഹായം ചെയ്യുമെന്ന്​ പ്രഖ്യാപിച്ചതെന്ന്​ ആമസോൺ വെബ്​ സർവീസ്​ സി.ഇ.ഒ ആ​ൻഡ്രോ ജേസി പറഞ്ഞു.

ഇതിന്‍റെ ഭാഗമായാണ്​ 250 മില്യൺ ഡോളറിന്‍റെ ആമസോൺ "സംഭവ്​ വെൻച്വർ ഫണ്ട്​" പ്രഖ്യാപിച്ചത്​. പുതിയ കണ്ടെത്തലുകളുമായി കൂടുതൽ പേർ ചെറുകിട-ഇടത്തര വ്യവസായ രംഗത്തേക്ക്​ കടന്നു വരാൻ പദ്ധതി സഹായിക്കുമെന്നാണ്​ പ്രതീക്ഷയെന്നും ജേസി വ്യക്​തമാക്കി.

കഴിഞ്ഞ വർഷമാണ്​ ചെറുകിട-ഇടത്തരം വ്യവസായങ്ങളെ സഹായിക്കുന്നതിനായി ആമസോൺ സംഭവ്​ വെൻച്വർ ഫണ്ട്​ പ്രഖ്യാപിച്ചത്​.