ഡൽഹി മെട്രോയുമായുള്ള തർക്കപരിഹാര കേസിൽ അനിൽ അംബാനിക്ക് നിർണായക​ ജയം

ന്യൂഡൽഹി: ഡൽഹി മെട്രോയുമായി നാല്​ വർഷമായി നിലനിന്നിരുന്ന തർക്കപരിഹാര കേസിൽ അനിൽ അംബാനിയുടെ ഉടമസ്ഥതയിലുള്ള റിലയൻസ്​ ഇൻഫ്രാസ്​ട്രക്​ച്ചറിന്​ ജയം. സുപ്രീംകോടതിയിലെ രണ്ടംഗ ബെഞ്ചാണ്​ കേസിൽ അനിൽ അംബാനിക്ക്​ അനുകൂലമായ വിധി പുറപ്പെടുവിച്ചത്​. 46.6 ബില്യൺ രൂപ മൂല്യമുള്ള കേസിലാണ്​ അംബാനിക്ക്​ വിജയം.

അംബാനിക്ക്​ നിർണായക വിജയം നൽകുന്നതാണ്​ സുപ്രീംകോടതി വിധി. വായ്​പകളുടെ പേരിൽ അംബാനി ജപ്​തി നടപടികൾ നേരിടുന്ന സാഹചര്യത്തിൽ കൂടിയാണ്​ സുപ്രീംകോടതിയിൽ നിന്ന്​ റിലയൻസിന്​ അനുകൂലമായ വിധിയുണ്ടായിരിക്കുന്നത്​. സുപ്രീംകോടതി വിധിക്ക്​ പിന്നാലെ റിലയൻസിന്‍റെ ഓഹരി വില അഞ്ച്​ ശതമാനം ഉയർന്നു.

കേസിൽ നിന്ന്​ ലഭിക്കുന്ന പണം വായ്​പ ബാധ്യത തീർക്കാനായി ഉപയോഗിക്കുമെന്ന്​ റിലയൻസ്​ അഭിഭാഷകൻ കോടതിയിൽ ബോധിപ്പിച്ചു. 2008ലാണ്​ റിലയൻസ്​ ഇൻഫ്രാസ്​ട്രക്​ച്ചറും ഡൽഹി മെട്രോയും തമ്മിൽ കരാറുണ്ടാക്കുന്നത്​. രാജ്യത്തെ ആദ്യ സിറ്റി റെയിൽ പ്രൊജക്​ട്​ 2038 വരെ നടത്താനായിരുന്നു കരാർ. എന്നാൽ, തർക്കങ്ങളെ തുടർന്ന്​ എയർപോർട്ട്​ മെട്രോ പ്രൊജക്​ടിൽ നിന്നും റിലയൻസ്​ പിന്മാറി. തുടർന്ന്​ കരാർ ലംഘനത്തിന്​ ഡൽഹി മെട്രോക്ക്​ എതിരെ കേസ്​ നൽകുകയും ചെയ്​തു.