പതഞ്​ജലിയുടെ തേനിൽ മായം; ചേർക്കുന്നത്​ ചൈനീസ്​ പഞ്ചസാര

ന്യൂഡൽഹി: പതഞ്​ജലി ഉൾപ്പടെയുള്ള ഇന്ത്യയിലെ പ്രമുഖ ബ്രാൻഡുകൾ വിൽക്കുന്ന തേനിൽ മായമെന്ന്​ കണ്ടെത്തൽ. പതഞ്​ജലിയെ കൂടാതെ ഡാബർ, സാൻഡു തുടങ്ങിയ കമ്പനികൾ വിൽക്കുന്ന തേനിലും വ്യാപകമായി ചൈനയിൽ നിന്നുള്ള പഞ്ചസാര ചേർക്കുന്നുണ്ടെന്നാണ്​ സി.എസ്​.ഇയുടെ(സെൻറർ ഫോർ സയൻസ്​ ആൻഡ്​ എൻവയോൺമെൻറ്​) കണ്ടെത്തൽ.

അതേസമയം, എഫ്​.എസ്​.എസ്​.എ.ഐയുടെ മാനദണ്ഡങ്ങൾ പാലിച്ചാണ്​ പ്രവർത്തിക്കുന്നതെന്നും തേനിൽ മായമില്ലെന്നും കമ്പനികൾ വിശദീകരിച്ചു. പഞ്ചസാരയുടെ സിറപ്പ്​ ചേർത്താണ്​ ഇന്ത്യയിലെ പ്രമുഖ ബ്രാൻഡുകളെല്ലാം തേൻ വിൽക്കുന്നതെന്ന്​ സി.എസ്​.ഇയുടെ പഠനത്തിൽ വ്യക്​തമായതായി ഡയറക്​ടർ ജനറൽ സുനിത നരേൻ പറഞ്ഞു.

കരിമ്പ്​, ചോളം, അരി, ബീറ്റ്​റൂട്ട്​​ എന്നിവയിൽ നിന്നുള്ള പഞ്ചസാര മധുരം കൂട്ടാനായി തേനിൽ ചേർക്കുന്നു. പ്രത്യേക ടെസ്​റ്റുകൾ നടത്തിയാൽ മാത്രമേ ഇത്​ തിരിച്ചറിയാൻ സാധിക്കു. ചൈനീസ്​ പഞ്ചസാര ന്യൂക്ലിയർ മാഗ്​​നെറ്റ്​ റിസോൻസ്​ ടെസ്​റ്റിലാണ്​ കണ്ടെത്താൻ കഴിയുക. 13 ബ്രാൻഡുകൾ ടെസ്​റ്റ്​ ചെയ്​തതിൽ മൂന്നെണ്ണത്തിന്​ മാത്രമാണ്​ ഗുണനിലവാരമുണ്ടെന്ന്​ കണ്ടെത്തിയത്​. സ​ഫോള, മാർക്​​ഫെഡ്​ സോൻഹ, നെക്​ടർ എന്നിവയാണ്​ ടെസ്​റ്റിൽ വിജയിച്ചത്​.