ശമ്പളം കുറവായതിനാൽ വിവാഹം മുടങ്ങി; ​2.4 ബില്യൺ ഡോളർ ആസ്​തിയിലേക്ക്​ വളർന്നതിന്‍റെ കഥയുമായി​ വിജയ്​ ശർമ്മ

മുംബൈ: ഇന്ത്യൻ ഓഹരി വിപണിയിൽ പേടിഎം ഔദ്യോഗികമായി ലിസ്റ്റ്​ ചെയ്​ത്​ വ്യാപാരത്തിന്​ തുടക്കം കുറിച്ചിരിക്കുകയാണ്​. ആദ്യ ദിവസത്തിലെ വ്യാപാരത്തിൽ ​തിരിച്ചടി നേരിട്ടുവെങ്കിലും അവിശ്വസനീയമാണ്​ പേടിഎം എന്ന ഡിജിറ്റൽ പണമിടപാട്​ സ്ഥാപനത്തിന്‍റെ ദലാൽ സ്​ട്രീറ്റിലേക്കുള്ള യാത്ര. പേടിഎമ്മിന്‍റെ യാത്രയിൽ വിസ്​മരിക്കാൻ കഴിയാത്ത പേരാണ്​ വിജയ്​ ശേഖർ ശർമ്മ. 10,000 രൂപ ശമ്പളം വാങ്ങുന്ന ജീവനക്കാരനിൽ നിന്നും 2.5 ബില്യൺ ഡോളർ ആസ്​തിയിലേക്കാണ്​ പേടിഎമ്മിലൂടെ വിജയ്​ ശേഖർ ശമ്മ എന്ന വ്യവസായി വളർന്നത്​.

10,000 രൂപ ശമ്പളം ലഭിക്കുന്ന ജോലിയാണ്​ തനിക്ക്​ ആദ്യമുണ്ടായിരുന്നതെന്ന്​ ശർമ്മ പറയുന്നു. 30,000 രൂപ ശമ്പളം ലഭിക്കുന്ന ജോലിയെങ്കിലും കണ്ടെത്താനായിരുന്നു പിതാവിന്‍റെ അക്കാലത്തെ ഉപദേശം. ശമ്പളം കുറവായതിനാൽ തന്‍റെ പല വിവാഹാലോചനകളും മുടങ്ങി. തനിക്ക്​ 10,000 രൂപയാണ്​ ശമ്പളമെന്ന്​ അറിഞ്ഞതോടെ പല പെൺകുട്ടികളും വിവാഹത്തിൽ നിന്നും പിന്മാറുകയായിരുന്നുവെന്നും വിജയ്​ ശേഖർ ശർമ്മ റോയി​േട്ടഴ്​സിന്​ നൽകിയ അഭിമുഖത്തിൽ​ പറഞ്ഞു.

18,300 കോടിയുടെ പേടിഎം ഐ.പി.ഒ ഇന്ത്യയിലെ ഏറ്റവും വലിയ ഓഹരി വിൽപനകളിലൊന്നായിരുന്നു. റീടെയിൽ നിക്ഷേപകരിൽ നിന്ന്​ ഓഹരി വിൽപനക്ക്​ മികച്ച പ്രതികരണവും ലഭിച്ചിരുന്നു. 2010ലാണ്​ എൻജീനിയറിങ്​ ബിരുദദാരിയായ വിജയ്​ ശേഖർ ശർമ്മ പേടിഎമ്മിന്​ തുടക്കം കുറിച്ചത്​. 2016ലെ നോട്ട്​ നിരോധനത്തിന്​ പിന്നാലെ പേടിഎം ഉപയോക്​താക്കളുടെ എണ്ണത്തിൽ വൻ വർധന രേഖപ്പെടുത്തിയിരുന്നു. എന്നാൽ, ഈ മികവ്​ പിന്നീട്​ നിലനിർത്താൻ കമ്പനിക്ക്​ സാധിച്ചില്ല. പുതിയ പണമിടപാട്​ ആപുകളുടെ വരവ്​ പേടിഎമ്മിന്​ തിരിച്ചടിയുണ്ടാക്കിയെന്നാണ്​ റിപ്പോർട്ട്​.