ടാറ്റയോ സ്​പൈസ്​ജെറ്റോ ?; എയർ ഇന്ത്യയുടെ ഉടമയെ മൂന്നാഴ്​ച്ചക്കകം അറിയാം

ന്യൂഡൽഹി: എയർ ഇന്ത്യയുടെ ഓഹരി വിൽപനയുമായി ബന്ധപ്പെട്ട കാര്യങ്ങളിൽ മൂന്നാഴ്ചക്കകം തീരുമാനമുണ്ടാകുമെന്ന്​ കേന്ദ്രസർക്കാർ. രണ്ട്​ ഉന്നതാധികാര സമിതികൾ എയർ ഇന്ത്യയുടെ അന്തിമ വില നിശ്​ചയിക്കും. ഇൻവെസ്റ്റ്​മെന്‍റ്​ ആൻഡ്​ പബ്ലിക്​ അസറ്റ്​ മാനേജ്​മെന്‍റ്​ സെക്രട്ടറി അധ്യക്ഷനായ ഇന്‍റർ മിനിസ്​ട്രിയൽ ഗ്രൂപ്പായിരിക്കും കമ്പനിയുടെ വില നിശ്​ചയിക്കുക. കാബിനറ്റ്​ സെക്രട്ടറി അധ്യക്ഷനായ മറ്റൊരു സമിതി ഇത്​ പരിശോധിക്കും.

ടാറ്റയും സ്​പൈസ്​ജെറ്റ്​ ​പ്രമോട്ടർ അജയ്​ സിങ്ങുമാണ്​ എയർ ഇന്ത്യക്കായി രംഗത്തുള്ളത്​. എത്രയും പെ​ട്ടെന്ന്​ ലേല നടപടികൾ പൂർത്തിയാക്കുകയാണ്​ കേന്ദ്രസർക്കാറിന്‍റെ ലക്ഷ്യം. ലേലത്തിന്‍റെ നിർണായക ഘട്ടത്തിലൂടെയാണ്​ ഇപ്പോൾ കടന്നു പോകുന്നതെന്നും കേന്ദ്രസർക്കാർ വൃത്തങ്ങൾ അറിയിച്ചു.

എയർ ഇന്ത്യയുടെ വില സംബന്ധിച്ച്​ അന്തിമ തീരുമാനത്തിലെത്തിയാൽ ടാറ്റയുടേയും അജയ്​ സിങ്ങിന്‍റെ അപേക്ഷകൾ കേന്ദ്ര ആഭ്യന്തര മന്ത്രി അമിത്​ ഷാ അധ്യക്ഷനായ സമിതിക്ക്​ മുന്നിലേക്ക്​ എത്തും. ധനകാര്യമന്ത്രിയും വാണിജ്യ മന്ത്രിയും വ്യോമയാനമന്ത്രിയും ഈ സമിതിയിൽ അംഗങ്ങളായിരിക്കും. ഇവരുടെ അനുമതിക്ക്​ ശേഷം ഇന്ത്യയിലെ കോംപറ്റീഷൻ കമ്മീഷ​േന്‍റയും എയർ ഇന്ത്യക്ക്​ വായ്​പ നൽകിയ സ്ഥാപനങ്ങളുടേയും അംഗീകാരം കൂടി ലഭിച്ചാൽ കമ്പനിയുടെ വിൽപന പൂർത്തിയാകും.